रस्ते अशीर, येरादारीची जाता कोंयडी

भांगरभूंय | प्रतिनिधी

पणजे कुशीकच्या बेतीं- वेरें, निल्लाच्यान कळंगूटे वचपी रस्त्याची रुंदाय पळयत जाल्यार शेळो घाम सुटले बगर रावना. दिसाक हजारांनी वाहनां हे वाटेन यो- वच करतात. गाडयो वाडल्यात, मात रस्तो आसा तसोच आसा. पुराय वाटेर लोकांचीं दुरगां आसात, शेडी आसात. कांय बेकायदेशीर आसात. हीं बांदकामां सामकीं रस्त्याक तेंकल्यांत.
येरादारीचो रस्तो म्हणजें आपल्याक हुंड्यांत मेळिल्ली वस्त, अशें भावनेन कांय लोक रस्त्या कुशीक गाडयो पार्क करून दवरतात. रातभर आनी दीसभरूय ह्यो गाडयो उब्यो आसतात. साळगांवचो आमदार मंत्री जावपाक शकता, मागीर ह्या रस्त्याची अवस्था कित्याक सुदारपाक शकना? ह्या प्रस्नाक घडये जाप आसची ना. हो रस्तो रुंद करपाचें धाडस राज्य आनी थळाव्या पांवड्या वयल्या लोकप्रतिनिधींक ना. कारण घरां, दुरगांचेर कारवाय केल्यार मतांक कातर लागतली. हांगाच न्हय, तर प्रत्येक तालुक्यांत हीच परिस्थिती आसतली. हेर वाहनचालक, नागरिकांची समस्या उणी करपाक सरकार खास पंगड नेमून हाचेर उपाय काडूं शकता? अशी आस्त बाळगुपाक हरकत नासची.
हांगा आनी गोंयांत हेर कडेन येरादारीचे कोंयडेक लागून दरेकल्याचें उणेंच अर्द वर तरी फुकट वता. कितलें लुकसाण हें राज्य आनी देशाक. कितलें इंधन फुकट वता आसतलें. हांगा गाडी कितल्या वेगान चलोवची, हाचे फलक लावचे आनी येरादारी पुलिसांचें घोळटें पथक दवरचें. कितेंय करात, पूण ह्या मार्गा वयली येरादारी सुरळीत करात.
बार बार देखो
3702 चौ. किलोमिटर आंवाठाच्या गोंयांत साडेआठ हजारां परस चड बार आसप, ही अभिमानाची गजाल मानपाची व्हय? गोंयांत खंय आतां बार्रांक परवानो मेळना, पूण वाडिल्ली संख्या दोळे घुंवडावपी आसा. प्रत्येक गांवांत उणेच पांच तरी बार पळोवपाक मेळटात. ते पर्यटकांक सेवा दितात अशें म्हणटात, पूण ह्या बार्रांक लागून थळावी पिळगी बरबाद जाता. हाचें भान बार्रवाल्यांक आनी सरकाराकूय ना.
जो तो जोडपाच्या फाटल्यान लागला. फक्त बार्देश म्हालांत दोन हजारां परस चड बार आसतले. लोकांक एकवेळ च्या पियेवपाक हाॅटेल उक्तें मेळचें ना, पूण बार उक्तो मेळटलो. रातीं उसरां मेरेन तो उक्तो आसता. देवळां, शाळा हांचे कुशीक पसून बार आसात. ताका लागून फुडली पिळगी सोऱ्याचे भकीक पडटली काय, अशी भिरांत दिसता. युवा पिळगी शिकोवपाची, घडोवपाची भास करपी फुडाऱ्यांक हो व्यसनांचो बाजार कित्याक दिसना, असो प्रस्न पडले बगर रावना.