भांगरभूंय | प्रतिनिधी
नवी दिल्ली, खबरां संस्था ः जानेवारीचे सुरवेक केंद्रीय येरादारी मंत्री नितीन गडकरी हांणी भारतांत रस्ते अपघातांचो आंकडो वाडत आशिल्ल्यान हुस्को उक्तायतना रस्ते अपघात पिडितांक सरकार बेगीनूच कॅशलेस उपचार येवजण सुरू करपाचो विचार करता अशें जाहीर केल्लें. ते प्रमाण रस्ते अपघातांत जखमी जाल्ल्या लोकांक आनी तांच्या कुटुंबांक मजत म्हूण कॅसलेश उपचार येवजण सोमार, 5 मे सावन लागू जाली.
रस्ते येरादारी मंत्रालयाच्या राजपत्रांतल्या अधिसुचोवणे प्रमाण मोटार वाहनाक लागून रस्तो अपघात जालो जाल्यार जखमी मनशाचेर हे येवजणे खाला उपचार करतले. हाचे खाला खंयच्या रस्त्यार अपघात जालो तरी जखमींक कॅशलेस उपचार दितले. हे खातीर जखमी मनशाक 1.5 लाख मेरेन पयशे दिवचे पडचे नात.
मोटार वाहन अपघातांत मनीस जखमी जाल्यार ताका भारताच्या खंयच्याय हॉस्पिटलांत कॅशलेस उपचार सुविधा मेळटली. हे येवजणे खाला जखमी मनशाक अपघाताच्या तारखे सावन सात दिसां खातीर मुफत वैजकी सुविधा दितले, जाची मर्यादा 1.5 लाख रुपया आसतली. ही सुविधा सरकारान अधिकृत केल्ल्या हॉस्पिटलांनी पुरायपणान लागू जातली. पूण उपचाराचो खर्च 1.5 लाख रुपया परस चड आसल्यार वाडिल्लें बिल दुयेंतीक वा ताच्या कुटुंबांतल्या वांगड्याक फारीक करचें पडटलें.
अपघाता उपरांतच्या पयल्या वराक ‘गोल्डन अवर’ अशें म्हण्टात. ह्या काळांत उपचार नाशिल्ल्यान जायत्या जाणांक मरण येता. हें उणें करपा खातीर ही येवजण सुरू केल्या.
वेळार उपचार मेळनात, देखून मरण येवपाचें प्रमाण वाडटा…
भारतांत 2023 वर्सा रस्ते अपघातांत सुमार देड लाख लोकांक मरण आयलें. 2024 वर्सा जानेवारी ते ऑक्टोबर ह्या काळांत 1.2 लाख लोकांक मरण आयलें. वेळार उपचार मेळूंक नाशिल्ल्यान 30-40% मरणां जाली.
तेच बरोबर रस्ते अपघात पिडेस्तांचेर उपचारा खातीर सरासरी 50 हजार ते 2 लाख रुपया खर्च येता. गंभीर प्रकरणांत खर्च 5-10 लाख रुपया मेरेन वता. देड लाख रुपया मेरेन कॅसलेश उपचार येवजणे खातीर दर वर्सा सुमार 10 हजार कोटी रुपया खर्च जाव येता असो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
