भांगरभूंय | प्रतिनिधी
नवी दिल्ली, खबरां संस्था ः केंद्रीय रस्तो येरादारी आनी म्हामार्ग मंत्री नितीन गडकरी हांणी अपघात पिडेस्तांक खातीर ‘कॅशलेस ट्रीटमेंट’ येवजण जाहीर केल्या. हे येवजणे खाला रस्तो अपघात पिडितां खातीर सात दिसांच्या उपचारा खातीर सरकार देड लाख रुपया मेरेन खर्च करतले.
हे येवजणे विशीं उलयतना गडकरी हांणी फुडें सांगलें, आमी कॅशलेस ट्रीटमेंट नांवाची नवी येवजण सुरू केल्या. हे येवजणे वरवीं अपघाता उपरांत 24 वरां भितर हॉस्पिटलांत दाखल जाल्ल्या दुयेंतीचेर सात दिसांच्या उपचाराचो खर्च सरकार करतलो. हे येवजणे वरवीं चडांत चड 1.5 लाख रुपया पिडेस्ताच्या उपचारा खातीर खर्च करतले. मजगतीं, हे येवजणेचो लाव मेळोवपा खातीर अपघाता विशीं म्हायती पुलिसांक दिवप सक्तीचें आसा. हाचे वांगडाच हिट अँड रन प्रकरणांत मरण आयिल्ल्या मनशाक सरकार 2 लाख रुपया दितलें.
नितीन गडकरी हांणी दिल्लीच्या भारत मंडपम हांगा सगल्या राज्यांच्या आनी केंद्रशासित प्रदेशांच्या येरादारी मंत्र्यां कडेन जाल्ले बसकेंत ही म्हायती दिली.
वर्स भरांत जाल्ल्या अपघातांत 18 ते 34 वर्सां पिरायेच्या तरणाट्यांचो आंकडो चड आशिल्लो. भारतांत 2024 वर्सा रस्ते अपघातांत सुमार 1.80 लाख लोकांक मरण आयल्लें. ह्या भिरांकूळ आंकडेवारीचो उल्लेख करून रस्त्याची सुरक्षीतताय ही सरकाराचें पयलें प्राधान्य आसा अशें तांणी सांगलें. हातूंतल्या 30 हजार लोकांक हेल्मेट घालूंक नाशिल्ल्यान मरण आयिल्ल्याचें गडकरी हांणी सांगलें.
भुरग्यांच्या सुरक्षेच्या गंभीर प्रस्नाचेर टिप्पणी करतना नितीन गडकरी हांणी सांगलें, 2024 वर्सा शाळा आनी म्हाविद्यालयां लागसार मुळाव्या साधनसुविधांचो उणाव आशिल्ल्यान सुमार 10 हजार भुरग्यांक मरण आयले. सुरक्षेच्या उपायांचो एक भाग म्हूण ऑटोरिक्शा आनी शाळेच्या मिनीबसां खातीर नवे नेम लागू करतले, जाल्यार सुरक्षेच्या उपायांचे एक भाग म्हूण अपघातांचे ‘ब्लॅक स्पॉट्स’ वळखून तांतूत दुरुस्ती करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
