रस्ते अपघातांतल्या जखमींक मेळटलो देड लाखा मेरेन मुफत उपचार

भांगरभूंय | प्रतिनिधी

नवी दिल्ली, खबरां संस्था ः रस्ते अपघातांत जखमी जाल्ल्यांक ह्या म्हयन्या सावन म्हळ्यार मार्च 2025 सावन देड लाख रुपया मेरेन मुफत उपचार मेळटले. खाजगी हॉस्पिटलांकय हो नेम सक्तीचो आसतलो. ही पद्दत देशभर लागू जातली. हाचे खातीर एनएचआय (NHI) नोडल एजन्सी म्हूण काम करतली.
राष्ट्रीय म्हामार्ग प्राधिकरणाच्या (NHAI) अधिकाऱ्याच्या म्हणण्या प्रमाण, हे येवजणे खातीर मोटार वाहन कायदो, 1988 च्या कलम 162 त पयलींच दुरुस्ती केल्या. ही येवजण पुरायपणान चालीक लावचे पयलीं फाटल्या 5 म्हयन्यांत पुद्दुचेरी, आसाम, हरियाणा, पंजाब सयत स राज्यांनी पायलट प्रकल्प चालीक लायिल्लो आनी तो यशस्वी जालो.

कॅशलेस उपचार येवजण सुरू केल्ली….

रस्तो येरादारी आनी म्हामार्ग मंत्रालयान रस्ते अपघातांतल्या पिडितांक कॅशलेस उपचार दिवपा खातीर 14 मार्च 2024 वर्सा कॅशलेस उपचार येवजण हो पायलट प्रकल्प सुरू केल्लो. हाचे उपरांत 7 जानेवारी 2025 दिसा गडकरी हांणी देशभरांत ही येवजण अधिकृतपणान सुरू करपाची घोशणा केली. हे येवजणे खाला देशांत खंयच्याय सुवातेर रस्तो अपघात जाल्यार जखमी मनशाक उपचारा खातीर भारत सरकारा कडल्यान चडांत चड देड लाख रुपया मजत दितले. पूण उपचाराचो खर्च देड लाख रुपया परस चड आसल्यार वाडिल्लें बिल दुयेंतीक वा ताच्या कुटुंबांतल्या वांगड्याक फारीक करचें पडटलें. खरें म्हणल्यार अपघाता उपरांतच्या पयल्या वराक ‘गोल्डन अवर’ अशें म्हण्टात. ह्या काळांत उपचार मेळूंक नाशिल्ल्यान जायत्या जाणांक मरण येता. हें उणें करपा खातीर ही येवजण सुरू करतात.

लाखांनी लोक मरतात

भारतांत 2023 वर्सा रस्ते अपघातांत सुमार देड लाख लोकांक मरण आयलें. जानेवारी ते ऑक्टोबर 2024 ह्या काळांत 1.2 लाख लोकांक मरण आयलें. वेळार उपचार मेळूंक नाशिल्ल्यान 30-40% लोकांक मरण येता.
तेच बरोबर रस्त्याच्या अपघातांत बळी पडपी लोकांक उपचाराचो सरासरी खर्च 50 हजार ते 2 लाख रुपया मेरेन आसता. गंभीर प्रकरणांत खर्च 5-10 लाख रुपया मेरेन वता. देड लाख रुपया मेरेन मुफत उपचार येवजणेचेर दर वर्सा सुमार 10 हजार कोटी रुपयांचो भार पडटलो असो अदमास आसा.