भांगरभूंय | प्रतिनिधी
केरळ उच्च न्यायालयाचो जनावर मोगींक सल्लो
कोची, खबरां संस्था ः केरळ उच्च न्यायालयान रस्ताद सुण्यां संबंदीं म्हत्वाची टिप्पणी केल्या. उच्च न्यायालयांत दाखल केल्ले याचिकेचेर सुनावणी करतना न्यायालयान म्हणलें, रस्ताद सुण्यां परस मनशांक चड प्राधान्य दिवचें. तशेंच रस्ताद सुणे व्हड धोको निर्माण करतात. न्यायाधीश पी. व्ही. कुन्हिकृष्णन हांणी म्हणलें, सुण्यां मोगींनी खबरांपत्रांनी बरोवचे परस, खबरां चॅनलांचेर उलोवपा परस थळाव्या संस्थांच्या आनी सरकारी संघटनांच्या मजतीक मुखार येवचें.
लायव्ह लॉच्या अहवाला प्रमाण, सुण्यांचे मोगी थळाव्या अधिकाऱ्यां कडेन वचून पशू जल्म नियंत्रण कायदो आनी केरळ नगरपालिका कायद्याच्या तरतुदी खाला रस्ताद सुण्यांक सांबाळपाक वा तांची देखरेख करपाक परवानो मेळोवंक शकतात, अशें न्यायालयान सांगलां. जायते जनावर मोगी दिसाळ्यांनी बरयतात, खबरां चॅनलांच्या कॅमेऱ्या मुखार उलयतात. पूण, हीं कामां करचे परस, रस्ताद सुण्यांच्या सुरक्षे खातीर आनी देखरेखी खातीर तांणी मुखार येवंक जाय. तशेंच ह्या जनावर मोगींक रस्ताद सुण्यांचो खरो हुस्को आसल्यार तांणी रस्ताद सुण्यांची राखण करपाचो अधिकृत परवानो मेळोवचो आनी एबीसी नेम 2023 आनी कायदेशीर तरतुदी प्रमाण रस्ताद सुण्यांचो सांबाळ करचो.
भुरगीं, तरणाटे आनी जाण्ट्यांचेर रस्ताद सुण्यांच्या हल्ल्याच्यो वाडत वचपी घडणुको लक्षांत घेवन न्यायालयान रस्ताद सुण्यांची राखण करची अशें सांगलें. पूण, ताचे बदला मनशाच्या जिवाचें मोल मेजप बरोबर न्हय. देखून सुण्यां परस मनशांच्या जिवाक चड म्हत्व दिवचें अशें न्यायालयाक दिसता.
केरळांतल्या कन्नूर जिल्ह्यांतल्या मुजहतदाम वॉर्डांत रावपी कांय जाणांनी राजीव कृष्णन नांवाच्या जनावर मोगीच्या वावराक बेजारुन उच्च न्यायालयात ही याचिका दाखल केल्ली. ह्या प्रकरणांत नागरिकांनी दाखल केल्ली याचिकाचेर सुनावणी करतना न्यायालयान हो निकाल दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
