भांगरभूंय | प्रतिनिधी
जो रस्ताद सुणे वा हेर मोनजातीक जेवण, उदक दिता तो आपल्या आत्म्याची भूक- तान भागयता, अशें मानतात. फाटल्या कांय दिसां सावन रस्ताद सुण्यांच्या विशयाचेर कांय दिसाळ्यांनी द्वेशमूलक मोहीम चलयल्या. रस्ताद सुण्यांचेर बरयतना सरसकट पाळीव सुण्यां पसूनय जावपी उपद्रव, घांस मारपाचें प्रमाण सामकें एकठांय करुन रस्ताद सुण्यांच्या माथ्यार थांपप आनी तांकां खाण घालपी मोनजात मोग्यांक कंसप अशी ही पद्दतशीर मोहीम चल्ल्या. मिडियांक हें सोबना!
केरळा सारक्या राज्यांत रस्ताद सुण्यां आड सरकारी यंत्रणांच्या पालवान अशीच दुस्वासी मोहीम चालू जाल्ली आनी मागीर ह्या सुण्यांक मारुन वडोवपाची मोहीम चलिल्ली, जी कांय मोनजात मोग्यांनी न्यायालयांत धांव मारुन बंद वडयिल्ली. गोंयांतय कांय पत्रकार त्याच हेतान सुण्यां आड आनी तांकां जेवण घालपी मोनजात मोग्यां आड समाजाक चाळोवन घालपाक ही मोहीम चलयतात, असो दुबाव मारता. ‘कॉल अ डॉग मॅड, अॅण्ड शूट इट’ अशी एक इंग्लेज ओंपार आसा. ते धर्तेर हें चलता. गोंयांत सुण्यांच्या रॅबीस दुयेंसा आड मोहीम चलून तो पूर्णपणान नियंत्रणा सकल हाडपी गोंय राज्य मानतात. जर हें अशें उरपाक जाय तर सरकाराचें मोनजात खातें आनी लोक राज्य यंत्रणा म्हळ्यार पंचायती आनी नगरपालिका हांणी समन्वयान सुण्यांचें निर्बीजीकरण करपाक जाय. हातूंत मोनजात मोगी संघटना आनी रस्ताद सुण्यांक खाण घालपी लोकांचे सहकार्य घेवपाक जाय. तेच परीन घरांत सुणें पाळप्यांकय हातूंत वांटेकार करुन घेवंक जाय. हें तर चड म्हत्वाचें, कारण जायते सुणें पाळपी लोक आपलीं पाळीव सुणीं भायर पासयक व्हरतात, भायर सोडटात आनी तांचें निर्बिजीकरण करपाची जापसालदारकी घेनात. तेन्ना रस्ताद सुण्यां मदीं हे सुणे गर्भधारणा करपाक चड कारणीभूत जातात. मागीर रस्ताद सुण्यांचो आंकडो वाडत वता. जायते फावटी आपली मिजास दाखोवपाक 3- 4 सुणी पोंसपी गिरेस्त लोक असल्या सुण्यांक रातीच्या वेळार, सांजवेळार भायर भोंवडावपाक व्हरतात, तांचे गळ्याचे पट्टे सोडून आपूण एक तर मोबायलाचेर आसतात वा हेरां कडेन चकाटां मारतात. अशें जायते सुणें लोकांक घास मारतात. ही बिरमतय मागीर रस्ताद सुण्यांचेर घालप जाता.
रस्ताद सुण्यांचें निर्बिजीकरण जावपाक जायच. पूण हाचे बाबतींत सातत्यान रस्ताद सुण्यांक खाण घालपी चडांत चड लोक ह्या वावरांत सहकार्य करतात. मात, हें काम फकत तांणीच करचें, पंचायत वा नगरपालिका ही जापसालदारकी घेवंची ना, हो खंयचो न्याय? रस्ताद सुण्यांक आपलो वेळ, पयसो खर्चून अशें जेवण घालपी लोक आसता ताचे परस चड दुश्ट लोक सरभोंवतणी आसता. तांकां दया- माया नासता. जायत्यो बायलो, दादले, तरणाटे अश्या जेवणाक पातीशेर सुण्यांक फातर मारतात, बडी मारतात. उपद्रव करतात. चडशे अशे सुणें ‘कुंय- कुंय’ करुन सोंसून पळून वतात वा मार खातात. पूण कांय सुणें प्रतीकार करतात. कांय वेळार घांस मारू येतात.
आमी फेसबूक सारक्या समाज माध्यमांचेर मनोरंजनाच्या नावां खाला जायते व्हिडियो पळयतात. तातूंत कांय आल्मपेड्ड्यार तरणाटे वाघ/ शिंवाचे मुखवटे, धांपपाचे तोप वा खोटले घेवन अश्या रस्ताद सुण्यांक न्हिदिल्लें कडेन सतयतात. अशें सुणे खाण- जेवण नासतना खंयूय बाबडे न्हिदून वेळ सारतात. पूण असलें दुश्ट लोक तांचेर व्हिडीयो करतात, जातूंत हे सुणे जिवाच्या आकांतात हे वटेन- ते वटेन धांवतात. मागीर हांतल्यान रस्तो अपघात जावं येतात. हे आकंजार सुणें त्या वाटेन येवपी- वचपी भुरगीं, लोक हांकां आबूज जावन घांस मारुं येतात. मागीर ताचे संदर्भ दिनास्तना व्हिडियो करुन हेच लोक रस्ताद सुणीं कशीं उपद्रव करतात ताचेर व्हिडियो घालपाक आनी मिडीयाक मसालो दिवपाक वावुरतात. दोश मात सुण्यांक खावंक- पियेवंक दवरप्यांचेर!
रस्ताद सुण्यांक जेवण घालपी मोनजात मोगी सांगतात, ‘अशे तरेन पोटाक पडपी सुणे सहसा कोणाचे वाटेक वचनात. ते भुकेल्ले आसतात, वताच्या रखरखांत तानेल्ले उरतात तेन्नाच ते चाळवल्ले, उपद्रवी थारुं येतात. गोंयांतय ‘वॉटर फॉर व्हॉयसलेस’ म्हणून एक मोनजात मोगींची संघटना व्हडा प्रमाणार सुण्यांक आनी हेर प्राण्यांक उदकाची आयदनां वता थंय दवरतात. मोनजात मोग्यांच्या पालवान ते नेमान भरुन दवरतात. अशें उदक वताच्या रखरखांत पियेवपाक मेळपी सुणें, गोरवां, मनश्यांचे बेठींच वाटेक वचनात. जायते उपद्रवी लोक हीं दवरिल्लीं मातयेचीं आयदनां आपटून, फोडून वडयतात. कांय बेबद्यांचोय हातूंत चड आसपाव आसता. कारण पणजे सारक्या शाराच्या भायल्या वाठारांनी जायते भोंवडेकार आनी हेर लोक रात जातकच बाटल्यो घेवन पियेवपाक बसतात. कांय जाण तर्रऽऽ जावन हालत- धोलत वचपाक लागतकच रस्ताद सुणें तांकां भोंकतात. मागीर रागान असले बेबदे सुण्यांची उदकांची आयदनां फोडटात वा शेवटून मारतात. मागीर हे लोक पिल्ले नासतनाय दिसले तरी हीं सुणीं तांकां भोंकतात, तांच्या फाटल्यान लागतात. गांधीजी म्हणी, खंयच्याच देशाचे संस्कृतीचो दर्जो तपासतले तर त्या देशांत मोनजातीक कशे वागयतात तें पळोवपाचें. आमच्या देशांत आयचे घडयेक समाज माध्यमांचेर येवपी सुण्यांक आनी गोरवांक छळपी व्हिडियो इतले पळोवंक मेळटात कीं आमच्या देशाची संस्कृती कितली घसरल्या तें कळटा. हाचेर कसलेंच नियंत्रण ना.
आमच्या देशांत मोनजातीचो छळ करप्यां आड कायदो आसा. पूण, तातूंत जी दंडाची तजवीज आसा ती शिवाजी महाराजांच्या काळा वेली. आमच्या सरकारांक ती सुधारुन मोनजाती आड वावुरपी लोकांक धाक घालचो, अशें दिसना. समाजांत ती सहसंवेदनाच सामकी उणी. कारण मोनजातीक मतां खंय आसात? मोनजातीक छळपी लोकांचें फावता, कारण जनावरांक उलोवंक येना, कागाळ करपाक तोंड ना, आनी तांचे वटेन उबो रावपी समाज सामको उणो. गांधी फकत वक्ल आनी दांडो घेवन जायराती पासत उरला!!!
प्रकाश वामन कामत
9422443093
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
