रस्ताद सुणीं; न्यायालयाचो योग्य निर्णय

भांगरभूंय | प्रतिनिधी

आयजूय खुबश्या राज्यांनी रस्ताद सुण्यांची भिरांकूळ दहशत आसा. हे फाटभुंयेर सर्वोच्च न्यायालयाचो निर्णय योग्य आनी जनहितार्थ आशिल्ल्याचें हांव समजतां.

रस्ताद सुण्यांच्यो भिरांकूळ घडणुको पळयत जाल्यार याचिकाकर्त्याक सर्वोच्च न्यायालयान दिल्ली जाप येवकार दिवपीच आसा. मनशाचे राखणे खातीर रस्ताद सुण्यांक रस्त्यार खावपाक घालप अयोग्यूच आसा. जांकां रस्दात सुण्यांची दया येता आसत जाल्यार तांणी आपल्या घरांत खावंक घालचें. हाका सगल्याच मळा वेल्यान येवकार मेळटलो. दया हें मनशाचे नदरेन व्हड कार्य आसा. पूण हे खातीर रस्ताद सुण्यांक खावंक घालपा वेल्यान एखाद्याचो थळावे लोक छळ करतात आसत जाल्यार? नेमक्या अशा एका प्रकरणांत छळा खातीर सर्वोच्च न्यायालयांत दाद मागपी याचिकाकर्त्याक सर्वोच्च न्यायालयान बरोच धारेर धरलो आनी म्हणलें, अशा सुण्यांक रस्त्यार खावंक घालचे परस तुमी तुमच्या घरांत कित्याक खावंक घालिनात? असो प्रस्न न्यायालयान केलो.
नोएडांतल्या एका याचिकाकर्त्याचे सुनावणेंत रस्ताद सुण्यां विशीं याचिकाकर्त्याच्या वकिलान म्हणलें, प्राण्यांक खावंक घालपाच्या कामांत आमच्या याचिकाकर्त्याक त्रास जाता. आमी पशू नियंत्रण नेमा खाला काम करीत आसून लेगीत आमकां त्रास कित्याक दितात? हाचेर न्यायालयान म्हणलें, आमी कितले रस्ते आनी लेनी जनावर मोगीं खातीर सोडप? दरेक कडेन जनावरां खातीर सुवात आसा. मनशां खातीर ना. तुमच्या सारक्या लोकांक जनावरांचो पुळको आसा जाल्यार तांणी आपल्या घरांत तांकां राबितो घर सुरू करचें. सगल्याच रस्ताद सुण्यांक तुमी थंयच खावंक घालात. तुमकां हें करपा पसून कोणूच आडावचो ना. देशांत रस्ताद सुणयांच्यो खुबश्यो आंगार कांटो हाडपी घडणुको आमी सोशल मिडियाच्या माध्यमांतल्यान आनी दिसाळ्यांतल्यान पळयल्यात वा वाचल्यात. अशे परिस्थितींत रस्ताद सुण्यांक आळो घालप काळाची गरज आसा.
पूण कांय प्राणी मोगीं रस्त्या वेल्या सुण्यांक खावंक घालतात आनी हाचो विपरीत परिणाम सर्वसामान्य मनशाक भोगचो पडटा. कारण सुण्यांक तांच्या टायमार खावंक मेळ्ळें जाल्यार बरें आसा. जर तांकां वेळार खावंक मेळ्ळें ना जाल्यार ते उग्र रूप धारण करतात. अशे परिस्थितींत चलून वचपी, दुचाकी वेल्यान वचपी, शाळेंतलीं भुरगीं, सायकलीन वचपी अशा लोकांचेर सुणीं आक्रमण करतात आनी घांस मारपाचो यत्न करतात. आमी घांस मारपाच्यो भिरांकूळ घडणुको दिसाळ्यांतल्यान वा मिडियाच्या माध्यमांतल्यान पळयल्यात. ताका लागून प्राण्यांची सेवा करप वायट अशें न्हय. तांची सेवा करूंकच जाय. पूण ताचे पसून कोणाकूच लुकसाण जावचें ना हाचीय जतनाय घेवंक जाय. कारण ती मोनजात. पूण तांचे पसून कोणाकूच जखम वा त्रास जावचो ना हें लेगीत तितलेंच म्हत्वाचें आसा.
देशांत सुमार स कोटी 20 लाख रस्ताद सुण्यांची संख्या आसा. तातूंत हेर राज्यांचे तुळेन फक्त एका महाराष्ट्रांत 12 लाख 76 हजार रस्ताद सुण्यांची संख्या आसा. भारतांत दर वर्सा सुण्यान घांस मारिल्ल्यान 20 हजार लोकांक मरण येता अशें एका अभ्यासांत म्हणलां. भारतांत सद्याचे परिस्थितींत सोरपान घांस मारून मरण येवपाच्या प्रमाणा परस सुण्यान घांस मारिल्ल्यान चड लोकांक मरण आयलां. रेबीज दुयेंसाक लागून जावपी 36 टक्के मरण भारतांत जाता. हाचे वेल्यान आमी समजूंक शकतात की सुण्यान घांस मारप म्हणल्यार कितलें भिरांकूळ आसता आनी ताचे वायट परिणाम सगल्यां मुखार आसात. सरकार सुण्यांची नसबंदी कितले मेरेन करतात आनी ती कितले मेरेन फळादीक जाता हाचेरूय प्रस्न उप्रासता.
आयजूय खुबश्या राज्यांनी रस्ताद सुण्यांची भिरांकूळ दहशत आसा. हे फाटभुंयेर सर्वोच्च न्यायालयाचो निर्णय योग्य आनी जनहितार्थ आशिल्ल्याचें हांव समजतां. तेच बरोबर खूबशीं गोरवां रस्त्यार वा रस्त्याचे कुशीक बसून आसतात. केन्ना केन्ना दुर्घटनाग्रस्त लेगीत जातात. हाचेरूय सरकारान आनी थळाव्या प्रशासनान योग्य ती उपाय येवजण करूंक जाय. पूण रस्त्या वेल्या सुण्यां विशीं जांकां भावनीक वा चड काळजी दिसता आसत जाल्यार तांणी अशा रस्ताद सुण्यांची वेवस्था स्वता करची. जेणे करून तांचो त्रास सर्वसामान्य लोकांक जावचो ना. मोनजातीची सेवा करप हो मनीस धर्म. पूण ताचे वायट परिणाम आनी सर्वसामान्यांक त्रास जावचो ना हाची काळजी घेवची. देशांतल्या सगल्या राज्य सरकारांक विनंती आसा की रस्ताद सुण्यांच्यो भिरांकूळ घडणुको पळयत जाल्यार थळाव्या प्रशासना वतीन हाचेर योग्य ती उपाय येवजण करची.

रमेश कृष्णराव लांजेवार
9921690779