भांगरभूंय | प्रतिनिधी
पणजीः सुण्यांचें वासिनीकरण आनी निर्बिजीकरण करपाक पंचायत तशेंच पालिके कडल्यान सहकार्य मेळना. हे खातीर आमी तांकां वर्ल्डवायड व्हेटेनरी सर्विसेस (ड्ब्ल्यूव्हीएस) ह्या एनजीओ वांगडा कबलात करपाक सांगलां. गोंय हें रेबीस मुक्त आसा, अशें पशुसंवर्धन मंत्री नीळकंठ हळर्णकार हांणी सांगलें.
शिवोलेची आमदार डिलायला लोबो हांणी रस्ताद सुण्यांचो लोकांचेर जावपी हल्ल्यांचो विशय सभाघरांत मांडलो.
सरकार वासिनीकरण आनी निर्बिजीकरण करता अशें सांगता, मात दिसान दीस रस्ताद सुण्यां कडल्यान घांस मारपाच्यो घडणुको वाडत आसात. ह्या वर्सा जानेवारी ते आतां मेरेन 1781 रस्ताद सुण्यांनी घांस मारपाच्यो घडणुको घडल्यात. दिसाक सरासरी 57 सुण्यां कडल्यान घांस मारपाच्यो घडणुको घडटात. दर वर्सा सुण्यांनी घांस मारपाचे घडणुकेंत वाड कित्याक जाता हे विशींचो अभ्यास सरकारान केला काय कितें असो प्रस्न डिलायला लोबो हांणी विचारलो.
रस्त्याद सुण्यांचें निर्बिजीकरण आनी वासिनीकरण करून घेवपाची जापसालादरकी पंचायत आनी पालिकांची आसा. मात चडश्यो पालिका आनी पंचायती तें करपाक फुडें सरनात. 2 मार्चाक केंद्रान केल्ले सुण्यांचे जनगणने प्रमाण गोंयांत ३,५०० रस्ताद सुणीं आसात. हांचें निर्बिजीकरण आनी वासिनीकरण करपा खातीर आमकां पालिकांचें आनी पंचायतींचें सहकार्य जाय आनी देखून तांकां डब्ल्यूव्हीएस ह्या एनजीओ वांगडा कबलात करपाक सांगलां अशी म्हायती हळर्णकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
