भांगरभूंय | प्रतिनिधी
गोड, रसाळ आंबो कोणाक आवडना असो ना. आंब्याचे जायते प्रकार आसतात. मात तुमकां खबर आसा? बाजारांत येवपी आंब्यांचेर रसायनांचो व्हडा प्रमाणांत उपेग जाता. आंबो बेगीन पिकपाक तशेंच रसाळ दिसपाक जायत्या रसायनांचो वापर करतात. आंब्याचेर मारिल्लें रसायन आंब्यांक बेगीन पिकपाक फायद्याचें मात भलायकेक हें खूब माल. अशे परिस्थितींत रसायनां नाशिल्ले आंबे कशे वळखप हाचेर आयज कांय उपाय आमी सांगतले.
रसायनीक रितीन पिकयल्ल्या आंब्यांत चड करून कॅल्शियम कार्बायड नांवाचें रसायन आसता. ताका लागून गॅस, पोट फुगप आनी पोटांत इबाडपाक शकता. आंब्याचेर केल्ल्या जायत्या संशोधनांतल्यान रसायनीक रितीन वाडिल्ले आंबे चड खाल्यार कॅन्सराचो धोको वाडटा. ह्या आंब्यांनी जिवनसत्वां आनी खनिजां उणीं आसतात आनी विखारी पदार्थ चड आसतात, जाका लागून काळजाचें दुयेंस, गोडेंमूत आनी मूत्रपिंडाचे दुयेंस जावंक शकता. केन्ना केन्नाय कीटकनाशकांक लागून कांतीची एलर्जी जावपाचो धोको आसता. रसायनीक पद्दतीन पिकयल्ल्या आंब्यांत सैमीक रितीन पिकिल्ल्या आंब्यांपरस अ जीवनसत्व, क जीवनसत्व आनी हेर पोशक तत्वां उणीं आसतात. रसायनीक पद्दतीन पिकिल्ले आंबे विकत घेतनाच तांची वळख करप कशें तें पळोवया.
रंग वळखप
सादारणपणान सगळेच आंब्यांचो रंग पळोवन विकत घेतात. ह्या रंगा वयल्यान आंब्याची लागवड रसायनांचो उपेग करून केल्या काय ना हें वळखुपाक मेळटा. सैमीक रितीन आंब्याची लागवड केल्यार ताचो रंग हळदुवो वा पांचवो आसता. रसायनीक रितीन पिकिल्ले आंबे हळदुवेच आसता. तशेंच ताचेर पांचवे दाग दिसतात.
चिन्न पळयात
आंब्याचेर आशिल्लीं चिन्नां ताचेर रसायनां वापरल्यांत काय ना हें वळखुपाकय आदार करतात. कांय आंब्यांचे कांतीचेर जायते निळे, काळे वा धवे टिपके आसतात. अशे आंबे विकते घेवचे न्हय. आंब्यांचेर चड प्रमाणांत रसायनां घाल्ल्यान अशे थिबके पडटात.
बकेटाची चांचणी करात
आंबो विकत घेतल्या उपरांत लेगीत जायत्यो साद्यो चांचण्यो करून रसायनांचो सोद घेवंक मेळटा. घरांत हाडिल्ले सगळे आंबे उदकान भरिल्ले बालदेंत घालचे. उदकांत बुडपी आंबो सैमीक रितीन पिकयला. जाल्यार उदकार उफेंवपी आंबे रसायनांचो उपेग करून पिकयल्ले आसूंक शकतात.
कट टेस्ट करात
आंब्यांचो रंग कापले उपरांत सामको हळदुवोच आसल्यार तो सैमीक रितीन पिकिल्लो आसता. आंब्याचो देंठ काळो आनी ताचो रंग हळदुवो आल्यार मागीर तो रसायनांच्या आदारान पिकयला हें वळखूचें.
वास म्हत्वाचो
आंब्याचो वास खूब म्हत्वाचो. रसायनीक पद्दतीन पिकयल्ल्या आंब्यांक वास सामको उणो आसता. केन्ना केन्नाय वास मातूय येना. मात सैमीक रितीन पिकिल्ल्या आंब्याक घमघम सुटिल्लो आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
