रशियेंतल्यान भारतांत कच्च्या तेलाचे आयातींत दुपेट वाड
भांगरभूंय | प्रतिनिधी
माॅस्को, खबरां संस्था : रशियेंतल्यान भारतांत जावपी आयात दुपेटीन वाडिल्ल्याचें उजवाडाक आयलां. एप्रिल- जुलयांत रशियेंतल्यान भारतांत आयात दुपेटीन वाडून 20.45 अब्ज डॉलर जाल्या. एप्रिल- जुलय 2022 वर्सा रशियेंतल्यान 10.42 अब्ज डॉलर आयात जाल्ली. तेल आनी सारें हांची आयात वाडिल्ल्यान रशिया चालू अर्थीक वर्सात म्हळ्यार एप्रिल ते जुलय म्हयन्यांत भारताचो दुसरो व्हडलो आयात स्रोत थारला, अशें वाणिज्य मंत्रालयान सांगलां.
रशियेचेर अमेरिकेन अर्थीक निर्बंध घालतकच भारताक चड तेल आयात करपाची संद मेळ्ळी. चीन आनी अमेरिके उपरांत कच्च्या तेलाची आयात करपी भारत हो संवसारांतलो तिसरो देश. युक्रेनाचेर लश्करी कारवाय जाले उपरांत अस्तंतेकडल्यान रशियेचेर अर्थीक निर्बंध घाल्ले, उपरांत भारताक सवलतीच्या दरान कच्चें तेल विकतें घेवपाची संद मेळ्ळी. चीनांतल्यान भारताची आयात फाटल्या वर्साच्या ह्याच काळांत 34.55 अब्ज डॉलर आशिल्ली ती आयज 32.7 अब्ज डॉलर इतली देंवल्या.
अमेरिकेंतल्यान भारताची आयात फाटल्या वर्सा 17.16 अब्ज डॉलर आशिल्ली ती 14.23 अब्ज डॉलर मेरेन उणी जाल्या. संयुक्त अरब अमीरातांतल्यानय एप्रिल- जुलय 2023 वर्सा आयात 13.39 अब्ज डॉलर जाली, जाल्यार फाटल्या वर्साच्या ह्याच काळांत 18.45 अब्ज डॉलर जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
