भांगरभूंय | प्रतिनिधी
रशियेंतल्यान येवपी तेलाचें भारत मुखेल गिरायक
मॉस्को, खबरां संस्था: रशिये कडल्यान तेल घेवपाचें बंद करपा खातीर अमेरिकेन भारताचेर बरेंच चेंपण हाडटा. भारत रशिये कडल्यान कच्चें तेल विकतें घेता देखून अमेरिकेन भारताचेर 50 टक्के शुल्क लादपाचें थारायलें. पूण भारतान अजून अमेरिकेच्यो अटी मान्य करूंक नात. चीना उपरांत संवसारांत भारत सगळ्यांत चड तेल रशिये कडल्यान विकतें घेता आनी हीच डोनाल्ड ट्रम्प हांची समस्या. तांणी नाटो देशांक पत्र बरयलें आनी चीनान रशिये कडल्यान तेल घेवप बंद करिना जाल्यार चीनाचेर बंदी घालची आनी 50 वा 100 टक्के शुल्क लादचें अशें सांगलां. अमेरिकेचो भारताक त्रासांत घालपाचो यत्न आसा.
रशिया हो संवसारांतलो सगळ्यांत व्हडलो तेल निर्यात करपी देश. सद्या रशिया जायत्या देशांक तेल निर्यात करता. पूण आतां रशियेन तेल निर्यातीचेर तात्पुरती बंदी घालपाची घोशणा केल्या आनी ताका लागून बोवाळ जाला. रशियेचे अर्थवेवस्थेक धक्को दिवपा खातीर अमेरिकेंतल्यान भारत आनी चीनाचेर रशिये कडल्यान तेल घेवचें न्हय असो दबाव आसा. आतां रशियेन तेल निर्यातीचेर तात्पुरती बंदी घालपाची घोशणा केल्या आनी ताका लागून जायते देश जागे जाल्यात.
डिझेल निर्यातीचेर वर्साचे निमाणे मेरेन बंदी घाल्या अशें रशियेन स्पश्ट केलां. पेट्रोल निर्यातीचेर आशिल्ली बंदी डिसेंबर मेरेन वाडयल्या. रशियेचे उपप्रधानमंत्री अलेक्झांडर नोवाक हांणी हे विशीं टिप्पणी केली. कांय दिसां आदीं युक्रेनाच्या ड्रोन हल्ल्यांत रशियन शुद्धीकरण कारखान्यांचें व्हड लुकसाण जालें. हाका लागून इंधनाची पुरवण करपाक त्रास जावपाक लागले. म्हणून रशियेन तेल निर्यातीचेर बंदी घालपाचो निर्णय घेतला.
ड्रोन हल्ल्यांत युक्रेनान रशियन तेल शुद्धीकरण केंद्रांक टार्गेट केल्लें आनी हाका लागून व्हड लुकसाण केल्लें. हे विशीं उलयतना रशियेच्या उपप्रधानमंत्रीन सांगलें, तेल केंद्रांचेर युक्रेनाच्या ड्रोन हल्ल्यांक लागून पेट्रोलियम उत्पादनांचो मात्सो उणाव जाला. पूण हो उणाव आमी भरून काडटले आनी ही समस्या बेगीन सोडयतले. हे बंदीचो भारताचेर कसलोच परिणाम जावचो ना. रशियेंतल्यान येवपी तेलाचो भारत मुखेल गिरायक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
