भांगरभूंय | प्रतिनिधी
अर्थीक वर्साच्या पयल्या 11 म्हयन्यांत 7.9 अब्ज डॉलरांची बचत
नवी दिल्ली, खबरां संस्था ः रशियेंतल्यान अनुदानीत दरात आयात केल्ल्या खनिज तेलाक लागून भारतान 2023-24 अर्थीक वर्साच्या पयल्या 11 म्हयन्यांत 7.9 अब्ज डॉलराची बचत केल्या, जाका लागून देशांतल्यान आयात केल्ल्या खनिज तेल आनी उत्पादनांचो खर्च 15.2 टक्क्यांनी उणो जाला.
संवसारीक पांवड्यार खनिज तेलाचे दर उणे जाल्ल्यान आनी रशिये कडल्यान सवलतीच्या दरात मेळपी तेलाचो फायदो भारताक जावपाक लागला. फाटल्या अर्थीक वर्सा एप्रिल-फेब्रुवारी ह्या काळांत भारताचो खनिज तेल आयात खर्च 15.2 टक्क्यांनी उणो जाला.
क्रेडीट रेटिंग एजन्सी इक्रा हांणी दिल्ले म्हायती प्रमाण, भारताचो खनिज तेल आयात करपाचो खर्च 2022-23 अर्थीक वर्सा 5.1 अब्ज डॉलर आनी 2023-24 अर्थीक वर्सा 7.9 अब्ज डॉलर उणो जालो. फाटल्या अर्थीक वर्साच्या पयल्या इकरा म्हयन्यांत रशियेंतल्यान आयात केल्ल्या खनिज तेलाचे प्रमाण 36 टक्क्यांचेर पावलें. 2021-22 अर्थीक वर्सा हो आंकडो फकत 2 टक्के आशिल्लो. त्याच वेळार अस्तंत आशियांतल्या सावदी अरेबिया, संयुक्त अरब अमीराती आनी कुवेतांतल्यान खनिज तेलाची आयात फाटल्या अर्थीक वर्साच्या पयल्या 11 म्हयन्यांत 23 टक्क्यांनी देंवली. 2021-22 अर्थीक वर्सा हें प्रमाण 34 टक्के आशिल्लें.
खनिज तेलाची आयात देंवली
अंदूं मार्च म्हयन्याचे तुळेंत एप्रीलांत खनिज तेलाची आयात 8 टक्क्यांनी उणी जाल्या. देशांतलें उत्पादन वाडोवपा वांगडाच आयातांचेर आदारून रावप उणें करपा खातीर सरकार पावलां उबारपाक लागल्यात. मार्च म्हयन्यांत खनिज तेलाची वट्ट आयात दिसाक 49 लाख बॅरलां आशिल्ली. जी एप्रीलांत दिसाक 45 लाख बॅरलां मेरेन पावली अशें व्हॉर्टेक्सा संस्थेन सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
