भांगरभूंय | प्रतिनिधी
उच्च न्यायालयाचो निवाडो न्हय तर वेंचणूक आयोगाच्या निर्णयान धपको
पणजी : रवी नायक हांकां आर्गां ओपपा खातीर तांचे पूत रितेश नायक हांकां भाजपान फोंडें पोटवेचणुकेची उमेदवारी दिली. हेच भशेन सर्गेस्त मनोहर पर्रीकार हांकां आर्गां कित्याक ओपलीं ना? असो प्रस्न उत्पल पर्रीकार हांणी केला. उच्च न्यायालयाच्या निवाड्या परस फोंडें पोटवेचणुकेची तारीख उसरां जाहीर करपाचो वेंचणूक आयोगाचो निर्णय धक्को दिवपी आसा, अशेंय तांणी म्हणलां.
आदले मुख्यमंत्री मनोहर पर्रीकार हांचे पूत आनी समाजीक वावुरपी उत्पल पर्रीकार हांणी पणजे पत्रकार परिशद घेतली.
हे वेळार ताणी ही म्हायती दिली. पणजी म्हापालिका वेचणुकेंत मतदान गोपनीयतेचो भंग जाला. हाका लागून म्हापालिका वेंचणुकेक जिल्लो न्यायालयांत आव्हान दिला. फोंडें पोटवेंचणूके प्रमाण पणजी म्हापालिका वेंचणूक रद्द जावपी निवाडो येतलो, अशी म्हाका खात्री आसा. म्हापालिका वेचणुकेंत प्रभाग फेररचणूक प्रक्रिया नगरपालिका प्रशासन संचालनालयान केली. प्रभाग फेररचणूक राज्य वेचणूक आयोगान करपाक जाय आसली. तशेंच मतदान यंत्राचे सुवातेर मतपत्रिकेचो वापर मतदाना खातीर कित्याक केलो? हाचे पयलीं म्हापालिका वेंचणुकेंत मतदान यंत्राचो वापर जाला. मतपत्रिकेक लागून गोपनीयतेचो भंग जावपाक वाव मेळ्ळो. हे मुद्दे याचिकेंत आसा. आतां नगरपालिका वेंचणूक जावपाची आसा. वेंचणूक जावपी नगरपालिका प्रभाग फेररचणूक सारकी जावची आनी वेंचणूक योग्य तरेन जावची हो हेत ही याचिका दाखल करपा फाटल्यान आसा.
फोंडें पोटवेचणूक रद्द जाल्ल्यान फोंडें मतदारसंघ आतां फुडले वेंचणूके मेरेन आमदारा शिवाय उरतलो अशी खंत तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
