भांगरभूंय | प्रतिनिधी
फेरबदल जातलोच, पूण केन्ना तें अजून स्पश्ट ना
भांगरभूंय । प्रतिनिधी
पणजी : गोंयांत मंत्रीमंडळ फेरबदलाची चर्चा चालू आसतनाच भाजप प्रदेशाध्यक्ष दामू नायक हांणी मंत्री रवी नायक हांची फोंड्या वचून भेट घेतली. ताका लागून गोंयच्या राजकी मळार खूबशे अदमास उक्तायताले. दामू – रवी हांचे भेटी उपरांत रवी नायक हांचें मंत्रीपद वतलें, अशीय शक्यताय उक्तायताले. पूण रवी नायक हांच्या मंत्रीपदाक कसलोच भंय ना, अशें भाजपांतल्या सुत्रांनी शुक्रारा ‘भांगरभूंय’ कडेन उलयतना सांगलें.
कांय दिसां आदीं प्रुडंट खबरां चॅनला वयले ‘हेडऑन’ कार्यावळींत उलयतना मुख्यमंत्री डॉ. प्रमोद सावंत हांणी मंत्रीमंडळ फेरबदला विशीं स्पश्ट संकेत दिल्ले. फुडल्या काळांतल्या वेंचणुकांचो विचार करून एका – दोगांक मंत्रीमंडळांतल्या काडपाचो निर्णय पक्ष घेवपाक शकता, अशेंय तांणी म्हणिल्लें. मुख्यमंत्र्यांच्या ह्या संकेताक लागून गोंय मंत्रीमंडळांत फेरबदल जातलो हें निश्चीत जालां. पूण हो फेरबदल नेमको केन्ना जातलो, खंयच्या मंत्र्यांक काडटले आनी खंयच्या आमदारांक मंत्रीपदां मेळटलीं, हाचेर अजून म्होर लागूंक ना. मंत्रीमंडळ फेरबदलाची लोक वाट पळयतनाच, बिरेस्तारा अचकीत भाजप प्रदेशाध्यक्ष दामू नायक हांणी फोंड्यां वचून मंत्री रवी नायक हांची भेट घेतली. ह्या दोनूय फुडाऱ्यां मदीं कांय वरां बंद दारा फाटल्यान चर्चा लेगीत जाली. ताका लागून घडये रवी नायक हांकां मंत्रीमंडळांतल्यान काडपाक शकतात, ते संबंदांत चर्चा करचे खातीर दामू नायक हांणी तांची भेट घेतल्या आसुये, अश्यो चर्चा गोंयभर जावपाक लागल्यो. पूण रवी नायक हांच्या मंत्रीपदाक कसलोच धोको ना. मंत्री म्हूण तांची कामगिरी दर्जेदार आसा, अशें मुख्यमंत्री डॉ. सावंत हांकां लेगीत पटलां. ताका लागून रवी नायक हांकां मुख्यमंत्री मंत्रीमंडळांतल्यान काडपाक शकना, अशेंय सुत्रांनी सांगलें.
फक्त कार्यकर्ता मेळाव्या विशीं चर्चा : दामू
प्रदेशाध्यक्षपदाचीं सुत्रां स्विकारीत सावन भाजप संघटन आनीक घटमूट करचे खातीर आपूण गोंयभर भोंवडी करून पदाधिकारी, कार्यकर्त्यांक मेळटा. सगळ्याच मतदारसंघांनी कार्यकर्त्यांचे मेळावे घेवपाचें सत्र आपणे सुरू केलां. फोंड्यां अजून कार्यकर्त्यांचो मेळावो जावंक ना. ताच्या आयोजना संबंदांत चर्चा करचे खातीर आपणे मंत्री रवी नायक हांची भेट घेतली. रवी नायक हे भंडारी समाजाचे व्हड आनी अणभवी फुडारी आसात. ते आमच्या पक्षाचे आमदार आसात. प्रदेशाध्यक्ष ह्या नात्यान संघटना संबंदांतल्या विशयाचेर आपल्याक तांचे कडेन उलोवचें पडटा. अश्यो गजाली सगळ्यां मुखार उलोवपाच्यो आसनात. आमचे मदीं फक्त कार्यकर्ता मेळावो आयोजीत करपा संबंदांत चर्चा जाली. मंत्रीमंडळ फेरबदला संबंदांत कसलीच चर्चा जावंक ना.
फेरबदलाचो निर्णय मुख्यमंत्र्यांक लागता : रवी
दामू नायक हांणी घेतिल्ले भेटी संबंदांत मंत्री रवी नायक हांचे कडेन संपर्क केलो, तेन्ना तांणी लेगीत दामू नायक हांचे वांगडा आपली फक्त मेळावो आयोजीत करपा संबंदांत चर्चा जाली अशें सांगलें. मंत्रीमंडळ फेरबदलाचो विशय मुख्यमंत्री डॉ. प्रमोद सावंत हांकां लागता. ताका लागून हे संबंदांत दामू नायक हांचे कडेन चर्चा जावपाचो प्रस्नूच येना, अशेंय तांणी सांगलें.
सुदिन ढवळीकार हांकां काडपाची शक्यताय
मंत्रीमंडळ फेरबदल करतना फोंडें म्हालांतल्या चार मदल्या एका मंत्र्याक काडपाचो विचार मुख्यमंत्री डॉ. प्रमोद सावंत हांणी केला. अशे स्थितींत मगो पक्षाक सत्ते भायर काडून सुदिन ढवळीकार हांचें मंत्रीपद काडून घेवपाक शकता, अशी म्हायती सुत्रांनी दिली. फुडल्या कांय दिसांनी मुख्यमंत्री डॉ. सावंत आनी भाजप प्रदेशाध्यक्ष दामू नायक दिल्ली वचून हे संबंदांत वरिश्ठ फुडाऱ्यांक मेळटले. ते उपरांतूच मंत्रीमंडळ फेरबदलाचें पुराय चित्र स्पश्ट जातलें, अशेंय सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
