भांगरभूंय | प्रतिनिधी
संकल्प आमोणकार: बायणा जाल्ले आर्ट अॅण्ड पेंटींग कार्यशाळेक बरो प्रतिसाद
मुरगांव: ल्हान भुरग्यांक जो मेरेन खेळांत वा हेर कलागुणांनी आपली कला दाखोवपाची संद मेळना तो मेरेन तांची कला भायर सरना. रवींद्र भवन बायणा सारकें कला घर ल्हान भुरग्यां खातीर विवीध कार्यावळी आयोजीत करून भुरग्यांच्या कलागुणांक उर्बा दिता. असल्या कार्यशाळांचो भुरग्यांनी फायदो घेवचो असो उलो मुरगांवचे आमदार संकल्प आमोणकार हांणी मारलो.
रवींद भवन बायणा वतीन आयोजीत यत्ता पांचवी ते धावे मेरेनच्या विद्यार्थ्यां खातीर आर्ट अॅण्ड पेंटींग कार्यशाळेच्या समारोप कार्यावळी वेळार आमदार आमोणकार मुखेल सोयरे ह्या नात्यान उलयताले. ह्या वेळार माचयेर तांचे वांगडा रवींद भवन बायणाचे अध्यक्ष जयंत जाधव, उपाध्यक्ष डॉ. धर्मेंद प्रभुदेसाय आनी हेर मानेस्त हाजीर आशिल्ले.
ह्या वेळार हे कार्यशाळेंत वांटेकार जाल्ल्या विद्यार्थ्यांक मानेस्तां हस्तुकीं प्रमाणपत्रां भेटयलीं. मजगतीं, कार्यशाळेंत विद्यार्थ्यांनी केल्लें आर्ट आनी पेंटींग प्रदर्शन मिनी सभाघरा भायर भरिल्लें. पेंटींगांत दोनूय गटांतल्या तीन तीन सर्तकांची निवड करून तांकां भेटवस्त भेटोवन भोवमान केलो. हे कार्यशाळेंत वट्ट 48 विद्यार्थ्यांनी वांटो घेतिल्लो.
मजगतीं, ह्या वेळार मुखेल सोयरे मुरगांवचे आमदार संकल्प आमोणकार हांचे हस्तुकीं 10 ते 15 पिरायेच्या विद्यार्थ्यां खातीर 25 एप्रील ते 3 मे मजगतीं आयोजीत केल्ले नाच कार्यशाळेचें दिवली पेटोवन उक्तावण जालें. हे कार्यशाळेंत शिक्षक स्वप्नील दावरे विद्यार्थ्यांक मार्गदर्शन करतले. हे कार्यशाळेंत 50 विद्यार्थ्यांनी आपलो वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
