भांगरभूंय | प्रतिनिधी
आमदार कामत : काम झुजा पावड्यार करपाचे मुख्यमंत्र्यांचे निर्देश
मडगांव : मडगांव रवींद्र भवनाचे इमारतीचें दुरुस्तीचें काम बांदकाम खातें करता. हाका लागून वेगवेगळ्यो पांच कामांच्यो निविदा काडटले. तांतल्यो तीन निविदा सोमार मेरेन, जाल्यार हेर निविदा फुडल्या सप्तकांतूच जारी जातल्यो. मुख्यमंत्र्यां कडल्यान कामांक मंजुरी दिवन झुजां पांवड्यार काम हातांत घेवपाचे निर्देश दिल्यात, अशी म्हायती आमदार दिगंबर कामत हांणी दिली.
रवींद्र भवनाचें सभाघर सध्या बंद अवस्थेंत आसा. सभाघर बंद जाले उपरांत आजूनय कामांक सुरवात जावंक ना, हाका लागून कला राखण मांडच्या पदाधिकार्यांनी रवींद्र भवन अध्यक्ष राजेंद्र तालक हांची भेट घेतली. उपरांत कामा विशीं अध्यक्षांकूय योग्य म्हायती नाशिल्ल्यान कलाकारांक कला सादरीकरणा खातीर आनीक कितली वाट पळोवची पडटली? असो प्रस्न केल्लो. हे विशीं मडगांवचे आमदार कामत हांका विचारलें तेन्ना सोमारा मेरेन तीन निविदा जारी करतले, अशें सांगलें.
आमदार कामत हांणी, रवींद्र भवन मडगांवच्या दुरुस्तीचें काम बांदकाम खातें करता. मुख्यमंत्री डॉ. प्रमोद सावंत हांणी हें काम झुजा पांवड्यार करपाचे निर्देश दिल्यात. विवीध कामांच्यो पांच निविदा काडटले. तांतल्या तीन निविदां विशीं फायल्स मुख्यमंत्र्यां कडेन पावल्यात आनी कामां बेगीन हातांत घेवपाच्यो सुचवण्यो केल्ल्याचें सांगलें.
रवींद्र भवनाक 17 वर्सां जाले उपरांत ही इमारत बांदकाम खात्यान दिवंक ना, हे विशीं आमकां कांयच म्हायती ना. रवींद्र भवन नवेंच बांदिल्लें तेन्ना हांव अध्यक्ष आशिल्लों. हस्तांतरणा खातीर जायत्यो गजाली करच्यो आसतात, प्रकल्प पुराय जावप आनी ताचे उपरांत जायत्यो गजाली आसतात. मात राज्यांतल्या रवींद्र भवनाच्या खंयच्याय इमारतीचो ताबो बांदकाम खात्या वतीन हस्तांतरीत करूंक ना. मात, हे इमारतींतलें वेवस्थापन हें कला आनी संस्कृती खात्याच्या अखत्यारीत आसा, अशें आमदार दिगंबर कामत हांणी सांगलें.
इफ्फी पयलीं कामां जातलीं
दुरुस्तीच्या कामांच्यो फायली मुख्यमंत्र्यांन बेगोबेग कामां हातांत घेवपाची टिपणी करुन मुखार धाडल्यात. प्रशासकी मंजुरी मेळ्ळी काय सोमार मेरेन तीन निविदा जारी करतले. निविदा जारी जाले उपरांत कामां केन्ना पुराय जातलीं हाची योग्य म्हायती मेळटली. इफ्फी हांगा जातलीच. हाका वेळ आसा. ताचे पयलींच हीं कामां पुराय जातलीं, अशेंय आमदार कामत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
