भांगरभूंय | प्रतिनिधी
एलडीसी 22 पदांची भरती प्रक्रिया रद्द करपाचो निर्णय बेकायदाे, गोयांतल्या मुंबय उच्च न्यायालयाचो निवाडोपणजी : नगर नियोजन खात्यान (टीसीपी) 27 फेब्रुवारी 2019 दिसा जायरात दिल्ली एलडीसीची 22 पदां रद्द करपाचो सरकाराचो निर्णय बेकायदाे आसून भरतीची प्रक्रिया 6 म्हयन्यांत पुराय करपाचो आदेश गोंयांतल्या मुंबय उच्च न्यायालयान दिला. ही पदां रद्द करपाचो निर्णय जेन्ना जालाे, त्या पांवड्या सावन भरतीची प्रक्रिया पुराय करची, असो आदेश दिला.
गोंयांतल्या मुंबय उच्च न्यायालयाचे न्यायाधीश निवेदिता मेहता आनी एम. एस. कर्णीक हांणी हो निवाडो दिला. नगर नियोजन खात्यान 27 फेब्रुवारी 2019 दिसा नियोजन सहाय्यक, ओवरसीर, ड्राफ्टसमॅन, ज्युनियर स्टेनोग्राफर, एलडीसी आनी एमटीएस पदां भरपा खातीर जायरात दिल्ली. एलडीसीचीं 22 पदां सोडून हेर पदां भरपाची प्रक्रिया सरकारान पुराय केली. मात परिक्षेचो निकाल जाहीर जाले उपरांत 8 फेब्रुवारी 2023 दिसा नगर नियोजन मंत्र्यांनी एलडीसीची भरती प्रक्रिया रद्द करपाचो निर्णय घेतलो. हाका लागून एलडीसीच्या 22 पदांची भरती प्रक्रिया पुराय जाली ना. हाका एलडीसी पदा खातीर इत्सूक आशिल्ल्या 13 जाणांनी उच्च न्यायालयांत आव्हान दिलें. ह्या आव्हान याचिकेचेर उच्च न्यायालयान निवाडो दितना एलडीसी पदांची भरती रद्द करपाचो निर्णय बेकायदाे आशिल्ल्याचे स्पश्ट केलें.
दिनेश गडकरी (वाडें सांगें), हर्षा सांबारी (सांगें), रत्नाकर वेळीप (खोला), शिल्पा पाटील (शिरवय केपें), प्रिन्स फर्नांडीस (केपें), सुनीता झोरे (बेतूल केपें), दिनेश साळगांवकार (बाळ्ळी कुंकळ्ळी), सुरेश वेळीप (बार्से केपें), मिशेल पेरेरा (केपें), संजय कार्दोजो (आंबावली केपें), स्वप्नील खोर्जुवेंकार (कोलवाळ), गणेश नायक (पोंटेमळ कुडचडें), प्रणीता खर्डे (सडा मुरगांव) हांणी पदां रद्द करपाच्या सरकारच्या निर्णयाक आव्हान दिल्लें. ह्या याचिकेंत गोंय सरकार, नगर नियोजन खातें आनी कार्मीक खातें प्रतिवादी आशिल्ले. याचिकादारां खातीर टेरेंस सिक्वेरा हांणी जाल्यार सरकारा खातीर अतिरिक्त सरकारी आदोवगाद प्रवीण फळदेसाय हांणी बाजू मांडली.
27 फेब्रुवारी 2019 दिसा नगर नियोजन खात्यान नियोजन सहाय्यक, ओवरसीर, ड्राफ्टसमॅन, ज्युनियर स्टेनोग्राफर, एलडीसी आनी एमटीएस पदां भरपा खातीर जायरात दिल्ली. एलडीसीच्या 22 पदां खातीर याचिकादारानी अर्ज केल्ले. एलडीसी खातीर 100 गुणांची लेखी परिक्षा 9 फेब्रुवारी 2020 दिसा जाली. लेखी परिक्षेंत याचिकादार पास जाले. लेखी परिक्षेचो निकाल वेबसायटीचेर जाहीर केलो. हाचे उपरांत 5 जानेवारी 2022 आनी 6 जानेवारी 2022 दिसा कॉम्प्युटर टायपींग चांचणी जाली. याचिकादार ह्या चांचणेंत पास जाले. हाचे उपरांत 7 जानेवारी 2022 दिसा प्रमाणपत्रांची तपासणी जावन याचिकादार एलडीसी पदां खातीर पात्र आशिल्ल्याचे सिद्द जाले. हाचे उपरांत 8 जानेवारी 2022 दिसा विधानसभा वेंचणूक आचारसंहिता लागू जाली. हाका लागून फुडली भरतीची प्रक्रिया स्थगीत दवरची पडली. 15 मार्च 2022 दिसा वेंचणूक आचारसंहिता सोंपली. ते उपरांत लेगीत खात्यान निवड जाल्ल्या उमेदवारांची वळेरी जाहीर केली ना आनी नेमणूक पत्रां दिली ना. मात जायरातींतल्या नियोजन सहाय्यक, ओवरसीर, ज्युनियर स्टेनोग्राफर ह्या पदांची भरती प्रक्रिया पुराय जाली. मजगतीं सुनावणी वेळार जायरातीत दिल्ल्या एलडीसीचीं भरती प्रक्रिया रद्द करपाचो निर्णय सरकारान घेतिल्ल्याचे प्रतिज्ञापत्र सरकारान सादर केले. याचिका निकालांत काडून उच्च न्यायालयांत एलडीसी पदांची भरती प्रक्रिया रद्द करपाच्या निर्णयाक आव्हान दिवपाची मेकळीक याचिकादारांक दिली. ते प्रमाण याचिकादारांनी एलडीसीचीं पदां रद्द करपाच्या निर्णयाक आव्हान दिवपी स्वतंत्र याचिका दाखल केली.
सुनावणी वेळार मुखेल नगर नियोजकानी प्रतिज्ञापत्र सादर केले. निवडीची वळेरी जाहीर करचे पयली सरकारान पदांची भरती प्रक्रिया रद्द करपाचो निर्णय घेतलाे. परिक्षेत पासण जाले म्हूण उमेदवारांक पदांचेर हक्क सांगपाचो अधिकार ना. पदां भरची काय ना, हे विशी निर्णय घेवपाचो अधिकार सरकाराक आसा, अशें प्रतिज्ञापत्र मुखेल नगर नियोजकान सादर केले.
19 जुलय 2022 दिसा एलडीसीची भरती प्रक्रिया स्थगीत दवरून हेर पदां भरपाचो शेरो नगर नियोजन मंत्र्यांनी फायलीचेर मारलो. हाका लागून स्टेनोग्राफर, डॉफ्टसमॅन, ओवरसीयर पदांची भरती पुराय जाली. ताचे उपरांत 8 फेब्रुवारी 2023 दिसा एलडीसीचीं भरती रद्द करची आनी नव्यान प्रक्रिया करपाचो शेरो नगर नियोजन मंत्र्यांनी मारलो. कंत्राटी पद्दतीचेर बरेच एलडीसी 8 ते 10 वर्सां काम करतात, असाे उल्लेख मंत्र्यांनी फायलीचेर केलो. निवाड्यांत ह्या गजालींचो उल्लेख आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
