भांगरभूंय | प्रतिनिधी
शिवराम गांवकार : सर्द मोसमा खातीर ‘गोवा धान 3’ लेगीत उपलब्ध
भांगरभूंय । प्रतिनिधी
मडगांव : ‘रत्नागिरी 7’ ह्या तांबड्या भाताचे जातीची प्रायोगीक तत्वाचेर पोरूं चांचणी केल्ली. गोंयांत ही जात बरें उत्पादन दितां, तशेंच चवीक लेगीत रुचीक आसा. हे खातीर तीन वर्सांचे चांचणी उपरांत तें शेतकारां खातीर उपलब्ध करतले. तशेंच अंदूंच्या सर्द मोसमा खातीर खाजन वाठारा खातीर ‘गोवा धान 3’ हे जातीचें 2 टन बी तयार दवरलां, अशी म्हायती कृशी विज्ञान केंद्राचे मुख्य तशेंच प्रकल्प समन्वयक अधिकारी शिवराम गांवकार हांणी दिली.
दक्षीण गोंय कृशी विज्ञान केंद्रांत शेतकारांक विवीध तरांचे प्रशिक्षण दिवन तांच्या उत्पादनांत वाड करतात. तशेंच कृशी विज्ञान केंद्रा कडल्यान विवीध भातांचीं तशेंच हेर पिकांचें बीं आनी रोंपे हाडून गोंयच्या वातावरणांत कशे तरेन प्रतिसाद मेळटा, हाचीय चांचणी करतात. ते उपरांत तें शेतकारांक उपलब्ध करतात. कृशी विज्ञान केंद्रान पोरूं ‘रत्नागिरी 7’ हें तांबड्या भाताची सुदारीत जात गोंयांतल्या वातावरणांत कशे तरेन उत्पादन दिता हाची चांचणी घेतिल्ली. तांबड्या भाता कडेन आडनदर केल्ल्यान लागवड उणी जायत गेली. पूण हें भात पौश्टीक आशिल्ल्यान परतून ताचे लागवडीचेर भर दितात. ‘रत्नागिरी 7’ ही जात सुमार 110 दिसांनी पिकता. साश्टी सयत बार्से, काणकोण, धारबांदोडें ह्या म्हालांत लेगीत पिकाची लागवड केल्ली. अंदूं दुसऱ्या कांय शेतकारांक ही जात उपलब्ध करून दितले. तीन वर्सां चांचणी उपरांत शेतकारांक ही जात उपलब्ध करतले, अशें गांवकार हांणी सांगलें.
सध्या सर्द मोसमांतले भातशेती खातीर कृशी विज्ञान केंद्राची तयारी सुरू आसा. ‘गोवा धान 3’ ही जात खाजन जमनीर बरी पिकता. ताका लागून उत्तर आनी दक्षीण गोंयांतल्या शेतकारां खातीर ‘गोवा धान 3’चें सुमार 2 टन बी उपलब्ध आसतलें. ते भायर शेतकारांक गरजेच्या रोंपांची विक्रीय सुरू केल्या. दुर्गा फार्मांत 20 हजार कवाथे आसात, ते 90 रुपयांक एक ह्या दरान विकतात. तशेंच काजीचे रोंपेय उपलब्ध आसात, अशें गांवकार हांणी सांगलें.
नुस्तें सुकोवपाची वेवस्था
दक्षीण गोंय कृशी विज्ञान केंद्रांत विवीध तरांचीं नुस्तीं सुकोवपा खातीर ड्रायर उपलब्ध आसात. 1 रुपयाक एक नग असो दर आसा आनी दोन हजार नग एकाच वेळार मशिनांत दवरून फक्त 8 वरांनी खारीं तयार जातात. हातूंत नुस्त्याची खारसाण आनी उश्णतेचेर नियंत्रण दवरपाक मेळटा. उक्तडार सुकोवचे परस ही पद्दत भलायकेक पुरक आसा, अशें शिवराम गांवकार हांणी सांगलें.
शेतकारां खातीर विवीध प्रशिक्षण
दक्षीण गोंय कृशी विज्ञान केंद्रांत नुस्तें उत्पादन, दूद आनी दुदाचे पदार्थ निर्मिती, घरांतलें पोरसूं, एकात्मीक शेती हाचेर नेमान प्रशिक्षण दितात. पोशण पंद्रस कार्यावळ आयोजीत केल्ली. नुस्तें विक्रेत्यांक ट्रायबल सबल्पानांतल्यान इन्सुलेटेड बॉक्स लेगीत दिल्यात. शेतांतल्यान चडांत चड उत्पादन मेळचें हे खातीर शेतकारांक प्रशिक्षीत केल्यात. नवी जात प्रायोगीक तत्वाचेर चांचणी उपरांत शेतकारांक दितात. हाचो फायदो गोंयांतल्या शेतकारांक जाता अशी म्हायती शिवराम वायंगणकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
