भांगरभूंय | प्रतिनिधी
मडगांव : रत्नागिरीच्या चोरयेच्या प्रकरणांतल्या दोग गुन्यांवकारांक कोंकण रेल्वे पुलिसांनी धरले. कोंकण रेल्वे पुलिसांनी शादाब मोहम्मद मुश्ताकी (२८) आनी झुबिर लियाकत (२२) ह्या दोनूय मूळ उत्तरप्रदेशांतल्या दुबावितां कडल्यान ३४ हजारांचो चोरयेचो माल जप्त केलो. दोनाय दुबावितांक फुडले कारवाये खातीर रत्नागिरी पुलिसांचे सुवादीन केले.
रत्नागिरी पुलीस एका चोरयेच्या प्रकरणांत दोग गुन्यांवकारांचो सोद घेताले. गोंय पुलिसांकूय चोरां विशींची म्हत्वाची म्हायती दिल्ली. ते प्रमाण कोंकण रेल्वे पुलिसां वतीन मडगांव रेल्वे स्टेशनाचेर गस्तीवेळार बुधवारा रातीं दोग दुबावीत दिसले.
मडगांव रेल्वे स्टेशनाच्या फलाट क्रमांक एकावेल्यान दुबावितांक ताब्यांत घेवन तांची चवकशी करून, तांची वळख पटयली. दुबावीत शादाब मुश्ताकी आनी झुबिर लियाकत हे रत्नागिरीचे चोरयेचे गुन्यांवकार आशिल्ल्याचें स्पश्ट जाले उपरांत रत्नागिरी पुलिसांक हाची म्हायती दिली. दुबाविता कडल्यान चोरयेचे ३४ हजार रुपयांचो मुद्देमाल कोकण रेल्वे पुलिसांकडल्यान जप्त केल्लो. दोगूय दुबावितांक जप्त केल्ल्या मुद्देमाला सयत फुडले कारवाये खातीर रत्नागिरी पुलिसांच्या ताब्यांत केल्यात. पुलीस निरीक्षक सुनील गुडलर हांच्या नेतृत्वाखाला कोंकण रेल्वे पुलिसां वतीन कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
