भांगरभूंय | प्रतिनिधी
नवी दिल्ली, खबरां संस्था:‘इंडियाज गॉट लेटेंट’ ह्या युट्युब शोचेर रणवीर अलाहाबादियाचें विधान फाटल्या कांय दिसां सावन चर्चेक आयलां. ह्या विधानाचे परिणाम देशभरांत जाल्यात आनी ह्या पुराय प्रकरणाची प्रशासकीय एजन्सी चवकशी करता. मात रणवीरचे हे कार्यावळींतल्या विधानाची झळ हेर कॉमेडियन्सांचेरूय बसतना पळोवपाक मेळटा. कारण स्टँड अप कॉमेडियन अनुभव सिंग बस्सीचो लखनौवाक आशिल्लो शो रद्द जालो. कायदो आनी सुवेवस्थेचे प्रस्न हजर करून पुलिसांनी ताच्या शो खातीर परवानगी दिवंक ना.
उत्तर प्रदेश राज्य बायलां आयोगाची उपाध्यक्ष अपर्णा यादव हांणी बस्सीच्या शो संबंदीं डीजीपी प्रशांत कुमार हांकां पत्र बरयल्लें. जातूंत ह्या शोंत बायलांचो अपमान जावचो न्हय हाची खात्री करची वा शो रद्द करपाचो विचार करचो अशी विनंती तिणें केल्या. हाचे उपरांत कायदो आनी सुवेवस्थेचो प्रस्न फुडें हाडून बास्सीचो शो करपाक मेळूंक ना.
‘‘आमकां ह्यान पयलींच्या कार्यावळींनी अक्षेपार्ह भास आयकूंक आयल्या आनी भौशीक कार्यावळींनी शिश्टाचार राखप ही आमची जापसालदारी‘‘ अशें अपर्णा यादव हांणी पुलिसांक बरयिल्ल्या तांच्या १४ तारखेच्या पत्रांत म्हणलां. आक्षेपार्ह कंटेन्टचे फाटभूंयेर सुरक्षेचे कारण दिवन बस्सीच्या शोलाक ना हरकत प्रमाणपत्र दिवपाक न्हयकार दिलो.
राजू श्रीवास्तव, कपिल शर्माचें दिलें उदाहरण
राज्य बायलां आयोगाच्या उपाध्यक्ष अपर्णा यादव हांणी हे विशीं, सर्गेस्त कॉमेडियन राजू श्रीवास्तव आनी कपिल शर्मा सारक्या ज्येश्ठ विनोदी कलाकारांची तोखणाय केली. लोकांक हांसपा खातीर अश्लील भास वापरपाची गरज ना, अशेंय तिणें ह्या वेळार म्हणलें.
मेरठच्या ३२ वर्सांच्या कॉमेडियन अनुभव सिंग बस्सी हो लखनऊच्या राम मनोहर लोहिया राष्ट्रीय कायदो विद्यापीठांतल्यान कायद्याचे पद्वीधर आसा. तांणी २०१७ त आपल्या करिअराक सुरुवात केली. देशांत आनी संवसारभर ताचो व्हड फॅन. ताचें ३७ लाखां परस चड यूट्यूब सबस्क्राइबर आनी १.८ दशलक्ष इंस्टाग्राम फॉलोअर्स आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
