भांगरभूंय | प्रतिनिधी
भांगरभूंय । प्रतिनिधी
वाळपयः रणमालें हो एक विशीश्ट लोककला प्रकार आसा. लोकनाट्यांचो तो एक वांटो आसा. रणमालें संबंदी चड संशोधन जावपाची सामकी गरज आसा. रणमालें कला जिती उरची तशेंच संशोधनाचो वावर करपा खातीर गोंय सरकारान लोकनाट्य अकादमी स्थापन करपाची गरज आसा असो सूर वाळपयची ग्रामीण कला आनी सांस्कृतीक संस्था आनी कला आनी संस्कृती खात्या वतीन आयोजीत केल्ल्या 12व्या रणमालें महोत्सवाच्या समारोपाचे कार्यावळींत वक्त्यांनी सांगलें.
समारोपाचे कार्यावळीक प्रा भूषण भावे, केरी जिल्लो पंचायत वांगडी देवयानी गांवस, वाळपय ग्रामीण संस्थेचो अध्यक्ष अंकुश धुरी, सचीव प्रकाश गांवकार, थळावो पंच वांगडी विनायक गांवस, रणमालें अभ्यासक झिलू गांवकार, सल्लागार रघुनाथ धुरी, अभिषेक गांवस आनी प्रशांत नायक हाजीर आशिल्ले.
रणमालें हो सत्तरींतल्या लोकांचे सांस्कृतीक सचिताची ठेव आसा. आधुनिकतेचे झोतींत ही कला ना नपयत जावपाची भिरांत आसा. गांवगिऱ्या वाठारांतल्या ही कला ना जावपाक लागल्या. मात वाळपयच्या ग्रामीण कला आनी सांस्कृतीत संस्थेन रणमालें कला प्रकार तिगोवन दवोवपाचो वावर हातांत घेतला अशें रघुनाथ धुरी हांणी सांगलें. फाटल्या बारा वर्सां सावन रणमालें महोत्सव आयोजीत करून ताच्या माध्यमांतल्या गांवगिऱ्या वाठारांत नवे पंगड तयार जावपाक लागल्यात. ही एक बरी गजाल आसा अशें तांणी सांगलें.
सत्तरी तालुक्यांक लोक कलेचो 450 वर्सांचो इतिहास आसा. तरणाट्यांक आकर्शीत करपाक जाय जाल्यार समाजांत घडपी दरेका गजालीचें पडबिंब रणमाल्यांत पडपाक जाय अशें प्रा भूषण भावे हांणी सांगलें. नवे विशय रणमाल्यांत आयल्यार तें लोकांक आकर्शीत करपाक शकतलें. असें सागून गोंयांत 250 परस चड लोक कला प्रकार आसात. रणमालें हो तातूंतलो म्हत्वाचो आशिल्ल्यान ताचें संवर्धन जावपाची गरज तांणी उक्तायली. आमच्या पूर्वजांनी ही काल तिगोवन दवोरली. तिचें संवर्धन करपाचें काम तरणाट्यांनी आपल्या भूजार घेवपाक जाय अशें देवयानी गांवस हिणे सांगलें.
समारोपाचे कार्यावळींत लोक कलाकार पार्वती महादेव गांवस आनी लक्ष्मी शिवा गांवस हांचो मानेस्ताचें हुस्तींक भोवमान केलो. दोन दिसांच्या ह्या रणमाले महोत्सवांत वांटेकार जाल्ल्या सगल्या पंगडाचे आयोजकांनी उपकार मानले. कार्यावळीचें सूत्रसंचालन सुभाष गांवस हांणी केलें आनी कृष्णा गांवस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
