भांगरभूंय | प्रतिनिधी
फकत 18 वर्सां पिरायेचेर फिडे संवसारीक बुद्दीबळ सर्तीचे फायनलींत सुवात मेळोवन इतिहास घडोवपी भारताचो ग्रॅण्डमास्टर आर प्रज्ञानंद आनी संवसारीक क्रमवारींतलो पयल्या क्रमांकाचो ग्रॅण्डमास्टर आनी पांच खेपेचो संवसारीक चॅम्पीयन मॅग्नस कार्लसन हांचे मदलो दुसरो क्लासिकल डाव लेगीत बरोबरींत सोंपलो. ताका लागून आतां आयज टायब्रेकर मॅची जातल्यो.
ह्या दोगां मदीं पयर जाल्ली पयली क्लासिकल मॅच लेगीत बादाबाद रितीन सोंपिल्ली. दुसरे मॅचींत जो जैत जोडटलो तो जैतिवंत थारतलो आशिल्लो. पूण, धव्या घुलांनी खेळपी नॉर्वेचो कार्लसन हाणें सुरवाती सावन बचावात्मक खेळ केलो. ताका लागून तो बादाबाद दवरपाक खेळटा हें स्पश्ट जालें. दुसरे वटेन प्रज्ञानंदान आक्रमक चाली खेळपाक सुरवात केली. तो घुलांचे बाबतींत लेगीत कार्लसना परस मुखार आशिल्लो. पूण, 21वे चाली उपरांत वेळाचे बाबतींत प्रज्ञानंद फाटीं पडलो.
प्रज्ञानंदाच्या घडयाळांत एक वर आनी दोन मिनटां जाल्ली, जाल्यार कार्लसनाच्या घडयाळांत एक वर 14 मिनटां जाल्लीं. हो मॅचींतलो सामको नाजूक खीण आशिल्लो. मॅच बादाबादचे दिकेन वताली. अखेरेक दोगूय ग्रॅण्डमास्टर बादाबाद दवरपाक तयार जाले.
कार्लसन संवसारीक क्रमवारींत पयले सुवातेर आसलो तरी ताका अजून मेरेन संवसारीक बुद्दीबळ सर्त जिखपाक जमूंक ना, जाल्यार दुसरे वटेन प्रज्ञानंद पयलेच खेपे फायनलींत पावला. ताका लागून हे खेपे नवो वस्ताद मेळटलो.
संवसारीक बुद्दीबळ सर्तीचे फायनलींत खेळपी प्रज्ञानंद भारताचो दुसरो खेळगडो थारलो. ताचे आदीं विश्वनाथन आनंदान फायनलींत सुवात मेळयिल्ली. तशेंच प्रज्ञानंद कॅण्डिडेट सर्ती खातीर लेगीत पात्र थारला. कॅण्डिडेट सर्त जिखपी ग्रॅण्डमास्टर संवसारीक बुद्दीबळ वस्तादपण किताब जिखपी ग्रॅण्डमास्टराक आव्हान दिता. सध्या चीनाचो डिंग लिरेना कडेन हो किताब आसा.
संवसारीक बुद्दीबळ सर्तींतले पयले तीन खेळगडे थेट कॅण्डिडेट सर्तीक पात्र थारतात, पूण, मॅग्नस कार्लसनान आपूण कॅण्डिडेट सर्तींत खेळचो ना हें आदींच जाहीर केल्ल्यान ताका सोडून सेमी फायनलींत पाविल्ले तीन ग्रॅण्डमास्टर कॅण्डिडेट सर्तीक पात्र थारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
