भांगरभूंय | प्रतिनिधी
आयज समाजीक न्याय दीस. समाजीक न्याय मुखार व्हरपा खातीर गरजेचे हक्क, रोजगार संदी, समाजीक संरक्षण आनी सरकार, मालक आनी कामगार हांचे मदीं रचनात्मक समाजीक संवाद गरजेचे आसात अशें संयुक्त राष्ट्र मानता.
संवसारभर दर वर्सा 20 फेब्रुवारीक ‘समाजीक न्यायाचो संवसारीक दीस’ मनयतात. समाज कल्याणाक धोको निर्माण करपी अन्याय आनी कामगार असुरक्षीतताय हांकां लक्ष्य करून समतायेचेर आदारिल्लो समाज तयार करपाचें म्हत्व समजावप हो ह्या दिसाचो हेत.
ह्या दिसाची अंदुंचो विशय आसा, “समावेश सशक्त करप: समाजीक न्याया खातीर समाजातलें अंतर भरून काडप.” पद्दतशीरपणान विषमता वेवस्थापन करपाक समावेशक धोरणां आनी समाजीक संरक्षण हांचे म्हत्वाचेर भर दिवप. संवसारीक आव्हानांक तोंड दिवपाचे वावरांत भागीदारी करप आनी योगदान दिवपाच्या हेतान दर वर्सा संयुक्त राश्ट्र समाजीक विशयाच्या संवसारीक दिसाची मोख (विशय) जाहीर करतात.
दिसाचो इतिहास
संवसारीक समाजीक न्याय दीस हो म्हत्वाचो दीस म्हूण संयुक्त राश्ट्रांच्या सार्वत्रिक सभेन 26 नोव्हेंबर 2007 दिसा जाहीर केलो. 20 फेब्रुवारी हो मनोवपाचो दीस म्हूण वेंचून काडलो. 10 जून 2008 दिसा आयएलओची (संवसारिक कामगार संघटना) समाजीक न्यायाची घोशणा एकमतान न्याय्य जागतीकीकरणा खातीर आपणायली. तो पयलेच खेपे 2009 वर्सा मनयलो.
1995 वर्सा डेन्मार्कांतल्या कोपनहेगन शारांत समाजीक उदरगती खातीर संवसारीक शिखर परिशद जाली. थंय शंबरां वयर राजकी फुडाऱ्यांनी गरिबी आड झुजप, पुराय रोजगार सुनिश्चीत करप आनी स्थिर, सुरक्षीत समाज तयार करपाचो सोपुत घेतलो. उदरगत येवजणेंत लोक केंद्रबिंदू आसचो अशेंय ताणीं मान्य केलें.
समाजीक उदरगतीचेर राश्ट्रां भितर आनी राश्ट्रां मदीं न्याय, एकचार आनी समता हांचेर भर दिवचो अशें संवसारीक शिखर सभेंत भर दिलो. समाजीक न्याय, समता, नितीमत्ता हीं सगळ्या समाजां खातीर गरजेचीं मुल्यां. राष्ट्रीय, प्रादेशिक आनी जागतीक पांवड्यार समाजीक न्यायाक चालना दिवपी चौकटी तयार करपाची, समान नोकरी संदी, येणावळीचें न्याय्य वांटप आनी सगळ्यांक साधनसुविधा मेळपाची खात्री करप ही सरकारांची जापसालदारकी आसा.
मुळावें तत्व
समाजीक न्यायाचो संवसारीक दीस पाळप हो समाजीक न्यायाक प्राधान्य दिवप हो राश्ट्रीय आनी आंतरराश्ट्रीय दोनूय धोरणांचो मुखेल हेत आसूंक जाय अशा कल्पनेचेर आदारिल्लो आसा. समाजीक न्याय मुखार व्हरपा खातीर गरजेचे हक्क, रोजगार संदी, समाजीक संरक्षण आनी सरकार, मालक आनी कामगार हांचे मदीं रचनात्मक समाजीक संवाद गरजेचे आसात अशें संयुक्त राष्ट्र मानता.
चालू आव्हानां
अन्याय, व्यापक कामगार असुरक्षीतताय, वाडत वचपी असमानताय आनी दुबळ्यो जाल्ल्यो समाजीक कबलाती टिकून उरल्यात हें संयुक्त राष्ट्र संघटनेन मान्य केलां. हीं सगळीं संवसारीक संकश्टां आनीक वाडल्यांत. राश्ट्रां भितर आनी राश्ट्रां मदीं शांतताय आनी सुरक्षीतताय तिगोवन दवरपा खातीर समाजीक उदरगत आनी समाजीक न्याय गरजेचो आसा. पूण शांतताय, सुरक्षीतताय आनी मनीस हक्क आनी मुळाव्या स्वातंत्र्याची राखण केल्याबगर हीं ध्येयां साध्य करपाक मेळनात.
जागतिकीकरण आनी परस्पर संबंद वेपार, गुंतवणूक, भांडवल प्रवाह आनी म्हायती तंत्रगिन्यान सयत तंत्रीक उदरगत हांचे वरवीं नवी संद दिता, पूण मुखेल आव्हानां अजून उरल्यांत. तातूंत अर्थीक संकश्ट, असुरक्षीतताय, गरिबी, बहिश्कार आनी समाजां भितर आनी समाजां मदीं असमानताय तशेंच एकात्मतेंत आडमेळीं हांचो आस्पाव जाता. हीं सगळीं आव्हानां आयच्या दिसाचे म्हत्व अधोरेखित करतात.
– प्रकाश वामन कामत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
