भांगरभूंय | प्रतिनिधी
न्हंयेचें उदक पयलेच खेपे आटलें, कर्नाटकान उदक घुंवडायिल्ल्याचो दुबाव
फोंडेंः धारबांदोडें म्हालांतल्या साकोड्डें वाठारांतल्यान व्हांवपी रगाडा न्हंयेचे उदक आटिल्ल्यान वाठारांत उदका खातीर लाेकांची धांदळ जाल्या. तातूंत उदका पुरवण करपी एक एमएलडी प्रकल्प बंद आशिल्ल्यान उदकाची समस्या निर्माण जाल्या. नळा वरवीं उदक पुरवण बंद जाल्ल्यान विवीध वाठारांत उदका खातीर लोकांची बांयचेर गर्दी जावपाक लागल्या.
सोमारा सकाळीं पंचायत मंडळान बांदकाम खात्याच्या कार्यालयांत वचून टँकरा वरवीं उदक पुरवण करपाची मागणी करपी निवेदन सहाय्यक अभियंता देविदास बोरकार हांकां भेटयलें. पयलेचे खेपे रगाडा न्हंयेचे उदक आटिल्ल्यान नागरिकांनी दुबाव उक्तायला. कर्नाटकान उदक घुंवडायिल्ल्याचो तांकां दुबाव आसा. ते खातीर रगाडा न्हंयेचे उदक पयलेच खेपे आटलें.
मदलोवाड्या वयल्या प्रकल्पांतल्यान सुर्ला, बाराभूमी, मदलोवाडो, बट्टर, धारगे, तळडे, तांबडीसुर्ला आनी काऱ्यामळ वाठारांत उदकाची पुरवण जाताली. पूण रगाडा न्हंयेचे उदक आटिल्ल्यान प्रकल्प शेनवार पसून बंद दवरला. सध्या गांवांतल्या लोकांक टँकरा वरवीं उदकाची पुरवण सुरू केल्या. पूण कांय वाठारांत टँकर वचनाशिल्ल्यान थंयच्या लोकांक उदका खातीर वळवळे काडचें पडटात. सोमारा सकाळीं पानस-साकोड्डें प्रकल्पाच्या उदका पायप लायनीक जोडणी करून बांदकाम खात्यान मदलोवाडो आनी बाराभूमी लोकांक उदका पुरवण सुरू केल्या. जाल्यार सातपाला जोडणी करून सुर्ला गांवांतल्या लोकांक उदकाची पुरवण केल्या. पूण बट्टर, धारगे, तळडे, तांबडीसूर्ला आनी काऱ्यामळ गांवांतल्या लोकांक सध्या गांवांतल्या बांयच्या उदकाचेर निंबून रावचे पडला. थंयच्या लोकांनी सरपंच प्रिया खांडेपारकार आनी हेर पंच वांगड्या सयत सहाय्यक अभियंता देविदास बोरकार हांची भेट घेवन चर्चा केल्या. गांवांत उदकाची वेवस्था करपा खातीर पंचायी वतीन निवेदन दिलां. धारबांदोडें म्हालाचे सहाय्यक अभियंता देविदास बोरकार हांणी रगाडा न्हंयेचे उदक अचकींत आटिल्ल्यान प्रकल्यांतल्यान उदका पुरवण बंद दवरल्या. ते खातीर लोकांक टँकरा वरवी उदकाची पुरवण करतात.
————
थळाव्यांची घागर मोर्चा काडपाची शिटकावणी
बेतोडें पंचायत वाठारांतल्या दत्तगड आनी कासरवाडो नळां वरवीं उदका पुरवण जायनाशिल्ल्यान थळाव्यांनी सोमार बांदकाम खात्याच्या कार्यालयांत मोर्चा व्हेलो. पूण सहाय्यक अभियंता यशवंत मापारी तांकां मेळूंक ना. थळाव्यांनी कनिश्ठ अभियंत्या कडेन चर्चा करून उदका पुरवण करपाची मागणी केल्या. तशेंच सांजे मेरेन उदका पुरवण जाली ना जाल्यार मंगळारा घागर मोर्चा काडपाची शिटकावणी थळाव्यांनी दिल्या.
——————
गोंय राज्यांतल्या विवीध अधिकाऱ्यांनी 10 मे 21023 वर्सा रगाडा न्हंयेची पळोवणी केल्ली. त्या वेळार न्हंयेंत उदकाचो सांठो मोट्या प्रमाणांत आशिल्ल्याचे स्पश्ट केल्ले. पूण अंदूं मे म्हयन्यांत रगाडा न्हंयेचे उदक आटिल्ल्यान कर्नाटकान उदक घुंवडायिल्ल्याचो दुबाव उक्तायतात. ते खातीर कर्नाटकान उदक घुंवडायलें जाल्यार फुडारांत ह्या वाठारांतल्या लोकां मुखार उदकाची गंभीर समस्या निर्माण जावपाची चिन्नां आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
