रगत शुद्ध दवरपाचे सैमीक उपाय

भांगरभूंय | प्रतिनिधी

खावप-पिवपाच्यो वायट सवयो कुडींतलें रगत अशुद्ध करतात. आनी हाका लागून दुयेंस जातात आनी आमची कूड निरोगी उरता. देखून रगत शुद्ध दवरपाची आमी सदांच जतनाय घेवंक जाय. पूण ते खातीर वखदां घेवपाची गरज ना. फकत कांय सैमीक उपायांक लागून रगत शुद्ध दवरूं येता.

ब्रोकोली
रगत शुद्ध करपा खातीर ब्रोकोली सगळ्यांत बरें. कुडींतल्यान हानीकारक विखारी पदार्थ भायर काडपाक मजत करता. हांतूंत जीवनसत्व सी, कॅल्शियम, जीवनसत्व के, ओमेगा 3 फॅटी अॅसिड, पोटॅशियम, मॅगनीज, फॉस्फोरस सारकिल्ले घटक आसतात. देखून नेमान आहारांत ताचो आस्पाव केल्यार रगत शुद्ध दवरपा वांगडाच वेगवेगळ्या तरांनी ते फायदेशीर थारता.

लिंबू
दर दिसा लिंबाचो रोस गरम उदकांत मिक्स करुन घेतल्यारय रगत शुद्ध जाता. तातूंतले मिनरल्स आनी जीवनसत्वां कुडींतल्यान विखारी पदार्थ भायर काडपाक मजत करतात. तशेंच तुमची मूत्रपिंडय निरोगी दवरता.

पाचव्यो भाजयो
पालक, मेथी, सोया आदी पाचव्या भाजयांनी क्लोरोफिल आनी अँटी-ऑक्सिडेंट आसतात. तांचो आहारांत आस्पाव केल्यार रगत शुद्ध उरता. इतलेंच न्हय तर तातूंतले एन्जाइम्सम यकृताक कुडींतल्यान विखारी पदार्थ काडून उडोवपाक मजत करता.

गाजर
गाजर खाल्यार रगत शुद्ध उरता आनी कातय बरी उरता. तातूंत जीवनसत्व अ, पोटॅशियम, तंतू, बायोटीन, जीवनसत्व क, मॅगनीज, फॉस्फोरस सारकिल्ले पोशक तत्व भरपूर आसतात. जाका लागून रगत शुद्ध करपाक मजत जाता.

ताजीं फळां
अॅपल, आलूबुखारा, पेर ह्या ताज्या फळांत पॅक्टीन फायबर आसता. रगतांतले विखारी पदार्थ भायर काडपाक मजत जाता. तेभायर स्ट्रॉबेरी आनी जांबळां यकृताक कुडींत विषमुक्त करपाक आदार करतात.

बीट
बीटांत नायट्रेट आनी वेगवेगळे अँटीऑक्सिडेंट आसतात. बीटाचो रोस पियेल्यार बॉडी डीटॉक्स आदार जाता अशें एका संशोधनांत म्हणला. ताका लागून रगत शुद्ध जाता आनी यकृत निरोगी उरता.

गूळ
रगत शुद्ध करपाखातीर गूळ हो सगळ्यांत बरो सैमीक उपाय मानतात. गूळांतल्या आयर्नाक लागून रगतांतल्या हिमोग्लोबीनाचें प्रमाण वाडटा. ताका लागून ब्लड सर्कुलेशन वाडटा. हाचे वांगडाच कुडींतलें विखारी पदार्थूय काडून उडयतात. तशेंच कुडींतल्यान रक्ताच्यो गुठल्यो काडून उडयतात.

हळद
हळद ही एक बरी अँटीबायोटिक मानतात. हळदीचे सेवन केल्यार रगतपेशींत सूज येना आनी तातूंत चरबी एकठांय जायना. दूदांत हळद घालून दूद पियेल्यार रगत शुद्ध जाता. देखून आहारांत हळदीचो आस्पाव करचो.

उदक
उदक हें नॅच्युरल ब्लड प्युरिफायर आसा. मूत्रपिंड मुतावरवीं कुडींतल्यान विखारी पदार्थ भायर काडटात. हातूंत उदकाचो म्हत्वाचो वांटो आसता. आयुर्वेदा प्रमाण रातभर तांब्याच्या आयदनांत दवरिल्लें उदक पियेल्यार रगत शुद्ध जाता.