रगत विकपाक मेळना, फकत पुरवण करुं येता ः डीसीजीआय
भांगरभूंय | प्रतिनिधी
रगताचे पोतये खातीर शुल्क घेवपाचेर बंदी, डीसीजीआयचो निर्णय
नवी दिल्ली, खबरां संस्था ः राज्यां सयत देशभरांतल्या जायत्या सुवातींनी ब्लड बँको रगताच्या पोतयां खातीर जाय तितलें शुल्क घेतात. हाका लागून दुयेंतीच्या सोयऱ्यांक आडमेळीं येतात. देखून रगत ही विक्रीची गजाल न्हय अशें भारताचो ड्रग्स कंट्रोलर जनरलान स्पश्ट (DCGI) सांगला. देखून आतां ब्लड बँकांक वा हॉस्पिटलांक रगत विकपाक मेळचें ना. रगत फकत पुरवण करूं येता अशेंय डीसीजीआयन स्पश्ट केलां. तशेंच रगताच्या पोतयेचेर फकत प्रक्रिया मोल घेवंक मेळटा अशें डीसीजीआयन जारी केल्ल्या परिपत्रकांत नमूद केलां.
निर्णय नेमको कितें?
देशभरांतल्या हॉस्पिटलांनी लाखांनी दुयेंती उपचार घेतात. जायत्या दुयेंतींक व्हड प्रमाणांत रगताची गरज आसता. देखून हें रगत हॉस्पिटलांतल्यान वा खाजगी वा सरकारी ब्लड बँकेंतल्यान दुयेंतींक दितात. जायते एनजीओ ब्लड बँक चलयतात. साबार खाजगी ब्लड बँकेंतल्यान रगत विकतना दुयेंतीच्या सोयऱ्यांकडल्यान जाय तितलें शुल्क घेतात. देखून डीसीजीआय सप्टेंबरांत जाल्ले बसकेंत हे संबंदी चर्चा करून नेम जारी केल्यात.
ह्या नेमा प्रमाण रगत कोणाक विकूंक मेळना. फकत रगताची पुरवण करूं येता. अशें करतना रगताच्या पोतयेचेर विक्री मोल घेवंक मेळना. रगत दुयेंतीक दिवचे पयलीं ताचेर प्रक्रिया ते राखीव करचें पडटा. देखून फकत हे प्रक्रियेचोच खर्च रगताच्या पोतयेचेर घेवंक मेळटा असो उल्लेख डीसीजीआयन केला.
प्रक्रिया मोल नेमकें कितें?
रगतदान शिबिरांतल्यान एकठांय केल्लें रगत खंयच्याच दुयेंतीक थेट घालना. त्या रगताचेर प्रक्रिया केल्या उपरांतच हें रगत दुयेंतींक घालूंक मेळटा. रगतदान शिबिरांतल्यान एकठांय केल्ल्या रगतांत दात्याचे कुडीचे हेर घटकूय आसतात. हे घटक वेगळे केल्या उपरांत तांबड्यो पेशी, धव्यो पेशी, प्लेटलेट्स आनी प्लाझ्मा ह्या रुपांत रगत शुध्द करतात. ते उपरांत तें फावो त्या तापमानांतय सांबाळून दवरतात. ह्या सगळ्या प्रक्रियेचो खर्च प्रक्रिया खर्चांत आस्पाव जाता. पूण हाचेर कसलीच विक्री किंमत घेवंक मेळना अशें डीसीजीआयन स्पश्ट केलां.
मजगतीं, केंद्रान 2022 वर्सा जारी केल्ल्या नेमा प्रमाण दात्या कडल्यान घेतिल्ल्या रगताचेर प्रक्रिया करपाचो खर्च 1550 रुपया परस चड आसूंक फावना. तांबड्या पेशी, प्लाझ्मा आनी प्लेटलेट्स हांचे खातीर अनुक्रमान 1550 आनी 400 रुपयांची मर्यादा थारायली. सरकारी ब्लड बँकांनी हें मोल 1100 रुपया थारायल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
