भांगरभूंय | प्रतिनिधी
बरे भलायके खातीर जेवणांत कार्बोहायड्रेट, भाजी, चरबी आनी प्रथिनां आसपाक जाय. पूण तांचे प्रमाण बदलून रगतांतली साकर चड बरी नियंत्रीत करूं येता. फाटल्या कांय दिसांनी जेवणाची क्रमवारी बदलपाचो ट्रेंड दिसून आयल्या. हाचे खाला पयलीं दाळ आनी भाजी खावची पडटा आनी तांदूळ, चपाती सारकिल्ले कार्बोहायड्रेट उपरांत खावचे पडटात. देखून रगतांतली साकर नियंत्रीत उरपाक मजत जाता.
प्री- डायबेटिक लोकां खातीर गोडेंमूत जावपाचो धोको आशिल्ल्या लोकांक ही नित्यनेम फायद्याची थारूंक शकता अशें तज्ञ म्हणटात. भलायकेन बऱ्या मनशां खातीर ताची गरज ना. वेल कॉर्नेल वैजकी तज्ञ डॉ. अल्पना शुक्ला हांच्या मतान पयलीं भाजी, उपरांत फॅट-प्रोटीन आनी निमाणें कार्बोहायड्रेट खावपाचो सल्लो दितात. 2023 वर्सा केल्ल्या 19 संशोधनांच्या आदारीत, तज्ञांनी विश्लेशण केलें की पयलीं सॅलड, उपरांत प्रथिनां (देखीक दाळ, दूद आनी मांस) आनी निमाणें कार्बोहायड्रेट (पोळी, शीत, ब्रेड, बटाट) खाल्यार रगतांतली साकर नेटान वाडना.
प्री-डायबिटीस आशिल्ल्या 15 जाणांचेर केल्ल्या अभ्यासांत डॉ. शुक्ला आनी ताच्या वांगड्यांनी तीन वेगवेगळ्या दिसांनी तीन वेगवेगळे ऑर्डरांत ग्रील्ड चिकन, सॅलड आनी खाशेल्या प्रकारचो ब्रेड खावपाक दिलो. जेवणा पयलीं आनी दर 30 मिनटांनी तीन वरां मेरेन वांटो घेतिल्ल्या लोकांची रगतांतली साकर मेजली. भाग घेवप्यांनी चापाती पयलीं चिकन आनी सॅलड खाल्लें तेन्ना जेवणा उपरांत तांची रगतांतली साकरेची वाड पयली चपाती खाल्ल्या वेळा परस 46% उणी आशिल्ली.
वजन नियंत्रणा खातीरय अन्नाची पद्दत फायदेशीर
यूसीएलए भलायकी एंडोक्रोनोलॉजिस्ट डॉ. विजया सुरमपुडी म्हणटा, अन्नाच्या पध्दतूनूय वजन नियंत्रणांत दवरुं येता अशें जायत्या अभ्यासांतल्यान दिसून आयलां. आमचो हेतू फकत उच्च दर्जाचें जेवण आसूंक जाय, जें आमकां आवडटा.
पीसा विद्यापीठातले डॉ. डोमेनिको ट्रायको सांगता, फूड ऑर्डर वा क्रमवारीचेर लक्ष केंद्रीत करचे परस आहारांत भाजीपालो आनी प्रथिनां वाडयली जाल्यार भलायकेचे फायदे मेळपाक लागतले. दनपारां आनी रातच्या जेवणांत सॅलड आनी भाजयेचें प्रमाण वाडयल्यार खावपाच्या क्रमाचेर चड लक्ष दिवपाची गरज ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
