भांगरभूंय | प्रतिनिधी
संवसारीक रगतदान दीस मनोवपाची पद्दत 2005 वर्सा आयचे दिसा सुरू जाली. संवसारीक भलायकी संघटना, आंतरराष्ट्रीय रेड क्रॉस फेडरेशन आनी रेड क्रिसेंट सोसायटींच्या आदारान 2005 वर्सा पयलो संवसारीक रगतदान दीस मनयलो. ते उपरांत संवसारभर तो मनोवप सुरू जालें.
अंदूं रगतदान दिसाचें घोशवाक्य अशें आसा, ‘रगत दियात, प्लाझ्मा दियात, जिवीत वांटून घेयात, सदांच वांटून घेयात’. ह्या वर्साचो प्रायोजक देश म्हळ्यार आल्जेरिया.
रगत हो जिणेचो म्हत्वाचो भाग. मनशान रगतदान केल्या उपरांत रगत मेळिल्ल्या मनशाक आजीवन दान मेळटा. ताचो जीव वाटावंक मेळटा. रगतदान करचे पयलीं जतनाय घेवप म्हत्वाचें. रगतदान करचे पयलीं प्रतिजैव (अण्टिबायोटिक्स) वखदां घेवचीं न्हय. तशेंच रगतदान करचे पयलीं आंगाचेर गोंदण (टॅट्यू) काडचो न्हय. गोडेंमूत, हुरहुरें आदी वासीन केल्लें नासचें. गंभीर दुयेंस आशिल्ल्या लोकांनी आनी भुरग्याक स्तनपान करपी आवयांनी रगतदान करचें न्हय.
रगत दिवप्याची पिराय 18 ते 65 वर्सां मदीं आसूंक जाय. रगतदान केल्यार जायते फायदे आसात. एक जीव वाटावता. वजन उणें जावपाक आदार जाता. तशेंच रोगप्रतिकार शक्त तयार करता. काळजाचे दुयेंस बरे जावपाक आदार करता. कॅन्सर सारकिल्ल्या दुयेंसांचो धोको उणो जाता. खास करून मानसीक भलायकी सुदारता. आयज भारतांतले जायते लोक परत परत रगतदान करतात. सुरेश कुमार सैनी हांणी 130 फावटीं रगतदान आनी प्लेटलेट 93 फावटी मेळून वट्ट 223 फावटीं रगतदान करपाचो विक्रम केला.
अपघातांत वा गंभीर दुयेंसांत रगताची खूब गरज आसता. रगताचे चार प्रकार आसतात. कार्ल लॅंडस्टाइनर हाणें ताचो सोद लायलो. हे खातीर ह्या शास्त्रज्ञाक 1930 वर्सा नोबॅल पुरस्कार मेळ्ळो. रगताचे अ, ब, अ ब आनी ओ अशे चार गट आसतात. ओ गटाचें रगत खंयच्याय रगत प्रकारांत चलता. मनशाची कूड इतली गतीशील आसता की पोशक आहाराच्या आदारान कांय दिसांनी तांबड्या रगतपेशींची पुनरुत्पादन जाता. चड रगत वचत जाल्यार मरण येवंक शकता. तेन्ना अपघातांत सांपडिल्ल्या मनशाक रगतदान करप ही जीव वाटावपी कृती. आयज जायत्या सुवातींनी हॉस्पिटल, रगतपेढी रक्त एकठांय करतात. ह्या दिसा जायत्या सुवातींनी रगतदानाचो प्रचार जाता. रगतदान शिबिरां आयोजीत करतात. लोकांक ताचे विशीं जागृत करतात. रगतदानाचें म्हत्व लोकांक सांगतात.
1942 वर्सा भारतांत रगतदान सुरू जालें. दुसऱ्या म्हाझुजाच्या काळांत कलकत्ता हांगा रगतदान बँक स्थापन जाल्ली. 1954 वर्सा लीना मुळगांवकार हिणें रगतदाना विशीं लोकां मदीं व्हड प्रमाणांत जागृताय केली. वाडदीस आनी वर्धापन दिसा रगतदान केल्यार त्या दिसाचें म्हत्व वाडटा.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
