भांगरभूंय | प्रतिनिधी
भावा- भयणीचें नातें फकत रक्षाबंधनाक राखी बांदपा पुरतेंच नासता. जाल्यार जल्मभर तें निभावपाचें आसता.
रक्षाबंधन हो भाव- भयणी मदीं आशिल्ले आपुलकायेचो सण. भारतांत ह्या सणाक भोव महत्व आसा. कारण भारतान पुराय जगाक वेळा वेळार भावकीची देख दिल्या. स्वामी विवेकानंदांनी तांच्या फामाद अश्या शिकागोंतल्या भाशणांत थंयच्या लोकांक ‘भावांनो आनी भयणींनो’ अशें म्हणिल्लें हें आमकां खबर आसा. ‘हे विश्वची माझे घर’ अशेय आमीं भारतीय मानतात. म्हणटकच राखणेचें हे बंधन म्हणल्यार मोग, माया, अपुरबाय आनी विस्वास हांचे प्रतिक.
एक कथा हांवें आयकल्या तीं अशीं, एकदां कृष्णाक हाताक घावो जालो. तेन्ना द्रौपदीन आपले साडयेचो कुडको घाव्यार बांदलो. तेन्ना कृष्णान तिका ‘भाव ह्या नात्यान सदांच तुजी राखण करतलो’ अशें वचन तिका दिल्लें. उपरांत जेन्ना द्रौपदीचे वस्त्रहरण जालें तेन्ना कृष्णान तिका वस्त्र दिवन तिची राखण भाव ह्या नात्यान केली. हे गजालींतल्यान आमकां देख मेळटा तीं अशीं, भावा- भयणीचें नातें फकत रक्षाबंधनाक राखी बांदपा पुरतेंच नासता. जाल्यार जल्मभर तें निभावपाचें आसता.
राखी म्हणल्यार एक पवित्र धागो. सादे अशें तें सूत. पूण सुता पुनवेक ताका खूब मोल फावो जाता. फकत सांस्कृतीक न्हय जाल्यार समाजाक एका समजिकायेच्या सूतान बांदून दवरपी सणाची आयज चड गरज आसा. एक मनीस दुसऱ्या मनशाच्या राखणे खातीर यत्न करता. अश्या तरेन आपुलकाय आनी विस्वास वाडटा. राखी बांदून भावाक आमी भेट दितात. भाव पयस आसता तेन्ना भयण आयच्या काळांत व्हिडियो कॉल करून रक्षाबंधन मनयता. दोन काळजां मदीं नात्यांची घट्ट जोड अशें तरेन तिगून उरता.
आमच्या सरान वर्गांत ‘एक राखी सैनिक भावा खातीर’ हो एक उपक्रम घेतिल्लो. आमकां घरगुती सामान वापरून एक राखी करपाक लायिल्ली. तीं राखी आमीं देशाच्या शिमेर रावन भारतीयांची राखण करपी जवान भावां खातीर धाडून दिली. अंदूं रक्षाबंधनाक हो एक वेगळो अणभव आमीं घेतलो. देशाच्या बऱ्या खातीर दीस रात वावुरपी सैनिक भावाक आमीं राखी धाडली म्हूण आमकां खूब खोशी जाली. आमकां सर सांगतात, रक्षाबंधन फकत मनशां वांगडा न्हय जाल्यार आमच्या झाडां वांगडा, न्हंयां वांगडा, धर्तरे वांगडाय मनोवपाक जाय. कारण तीं सगळी आमकां राखता ताका लागून आमीय आयज तांची राखण करप गरजेचें थारता.
रूत्वा रूपेश प्रियोळकार
जी. के. नायक क्लासीस
प्रियोळ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
