भांगरभूंय | प्रतिनिधी
डीटीसी कडल्यान दिल्ली उच्च न्यायालयान मागली जाप
नवी दिल्ली, खबरां संस्था ः रंग दिसनाशिल्ल्या (Color blindness) मनशाची ड्रायव्हर म्हणून नेमणूक करपा संबंदी दिल्ली उच्च न्यायालयान दिल्ली येरादारी म्हामंडळा कडल्यान जाप मागल्या. ताची नेमणूक 2008 वर्सा जाल्ली. 2011 मेरेन ताणें दिल्लीच्या रस्त्यांचेर बस चलयली. जानेवारी 2011 वर्सा जाल्ल्या अपघाता उपरांत ताका कामा वेल्यान काडून उडयलो.
2008 वर्सा अशा शंबरां परस चड लोकांक नोकरी मेळ्ळी अशें डीटीसीन न्यायालयांत सांगलें. हे प्रकरण उजवाडाक आयले उपरांत 2013 वर्सा वैजकी मंडळ स्थापन केल्लें. ह्या सगल्या लोकांक गुरू नानक हॉस्पिटलांतल्यान वैजकी प्रमाणपत्रां दिल्ले अशें चवकशेंतल्यान स्पश्ट जाले.
डीटीसीची ही बेपरवाय ः कोर्ट
न्यायमूर्ती चंद्रधारी सिंग हांणी म्हणलें, डीटीसीन ड्रायव्हरान सादर केल्ल्या वैजकी प्रमाणपत्राचेर आदारून रावचे न्हय. हांतूत भौशीक सुरक्षेचो प्रस्न आशिल्ल्यान ही गजाल सामकी गंभीर आसा. डीटीसीची ही बेपरवाय खूब निरशेणी करपी आसा. नेमिल्ले ड्रायव्हर सगळ्या बाबतींत बरोबर आसात काय ना हें डीटीसीन पळोवपाक जाय आशिल्लें. भौशीक सुरक्षेचो विचार करिनासतना डीटीसीन ड्रायव्हराक कित्याक आनी खंयच्या परिस्थितींत कामाक घेतले तें आमकां कळपाक जाय.
डीटीसीन 2013 वर्सा वैजकी मंडळ स्थापन केलें. न्यायालयान डीटीसी मुखेल्याक ह्या प्रकरणांत वैयक्तीक प्रतिज्ञापत्र दाखल करपाक सांगलां. तशेंच जबाबदार अधिकाऱ्यांचीय म्हायती मागल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
