भांगरभूंय | प्रतिनिधी
जूनाचे 21 वेर आमी उमेदीन योग दीस मनयलो. खाशेली गजाल म्हणल्यार आतां संवसारभर तो पाळूंक लागल्यात. हातूंत तुमची भलायी बरी उरता. हजारांनी वर्सां पयलीं भारतीय रुशींनी आमकां हें शास्त्र दिलें. तेंच आमी संवसारांत पावयलें. आतां तर हाचे भितर करियर लेगीत करपाक शकतात. फाटल्या कांय वर्सांनी हे वर्ग जळामळा जाल्ले दिसतात. सगल्यांकूच ताचो लाव मेळटाच अशें ना. हाका लागून आॅनलायन पर्याय बऱ्याक पडटा. पुण्यां योग वर्ग चलोवपी दोतोर बायल भार्गवी विजय बर्डे आसात. त्यो कातीच्यो दोतोर. तशेंच ती आनी तिचे घरकार सुरक्षे संबंदी कार्यशाळा घेतात. हालींच तीं कार्यशाळेक लागून गोंयांत येवन गेल्लीं.
दो. भार्गवी सांगतात, तांचे लागीं दुयेंती येतात. तातूंतली एक रिया. नोकरेक वचपी. खावन जेवन लेगीत बरी आसा. घोव कामाक आसता आनी घरची स्थिती बरी आसा. अशें आसतनाय तिका बरे दीस नासले. कारण कितें तर घरचो ताण. आतां तर मोबायल फोनाक लागून हो ताण वाडत चल्ला. कोणाचें चूक, कोणाचें बरोबर हें सांगप कठीण. पूण म्हाका दिसता आमी बऱ्योच गजाली उण्यो करूंक शकतात.
योग हें उतर संस्कृत. युज म्हणल्यार आस्पाव जावप. आमच्या देशान सप्टेंबर 2014 सावन हो दीस मनोवपाक लागले. पूण युनोन 21 जून हो दीस आंतरराष्ट्रीय दीस म्हूण जाहीर केलो. वांगडी राष्ट्रांतल्या 175 देशांनी हाका तेंको दिलो. सगले 193 देश आसात. तेंको दिवपी देशां मदीं अमेरिका, इंग्लंड, चीन, फ्रान्स, रशिये सारके देश आसात. योग सदांच करतात, ताका ताचे लाव कळटात. तो दीसभर उत्साही उरता. ताची कात चकचकता, तो शांत रावता… अशे कितलेशेच लाव तुमकां मेळटात. पूण ते खातीर ताचो अणभव घेवपाक जाय. योगाचें गिन्यानूय तुमकां बऱ्याक पडटलें.
संयुक्त कुटुंब पद्दत उणी जाल्या. ताका लागून ताण वाडपाच्यो घडणुको वाडल्यात. दोतोरा लागीं येवपाचें प्रमाणूय वाडलां. शारिरीक दुयेंस वखदांनी बरें जाता, पूण मानसीक दुयेंसाचें कितें? हे खातीर योग सदांच बरो. तुमचें मानसीक आरोग्य पसून बरें दवरता. आतां तुमकां हाचेर भरपूर साहित्य मेळटा. तरीय योगांतलीं आसनां तुमकां मार्गदर्शका कडल्यानूच शिकपाक जाय. हाचे खातीर ही आॅनलायन पद्दत बरी. तिचो तुमी मुजरत लाव घेवचो. डाॅ. भार्गवीक 9881801700 ह्या क्रमांकाचेर फोन करचो.
पावसाचें उदक
वतां वतां सांगन दिसता, तुमचीं सगलीं प्रमाणपत्रां आतां पसूनच वेगळे फायलींत दवरचीं. खास करून जातीचीं, दिव्यांग आशिल्ल्याचीं, शिक्षणाचीं प्रमाणपत्रां तुमकां नोकरे खातीर म्हत्वाचीं आसतात. दुसरी गजाल पावसाची. पावसाचें उदक तशेंच फुकट वता. आमी ताचो उपेग करीनात. जर हें उदक योग्य सुवातींनी जिरयलें, जमनीपोंदां सांठोवन दवरलें जाल्यार ताचो पावस ना तेन्ना उपेग जावंक शकता. गोंयच्या कांय वाठारांनी ए्प्रीलांतूच उदकाची गरज जाय पडटा. म्हादय न्हंय कर्नाटकान वळयल्या, देखून आमकां उदकाचें मोल कितें तें कळटा. ताका लागून उदक सांठोवन दवरपाक जाय. हालींच पद्मश्री पुरस्कार फावो जाल्ले सावयवेरेंचे संजय पाटील हांणी उदक सांठोवन दवरलें म्हणून ते पाचवेंचार कुळागर करपाक शकले. तांची देख घेवया. शेवटाक सगल्यांनी हाचो विचार करचो- जाण्ट्यांनी झाडां लायलीं म्हूण आमकां सावळी, फळां मेळटात. आमीय फुडले पिळगेक कितें तरी दिवया.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
