भांगरभूंय | प्रतिनिधी
ये ता ते 21 तारखेक पुराय संवसारभर योगदीस मनयतले. शिक्षण खात्यान हें योग मार्गदर्शन शाळा सुरू जातकच पसून सुरूच दवरपाक सांगलां. जशी देशभक्ती ही फक्त कांय दिसां पुरतीच आसना, तशी ही योगविद्या. ती जिणभर आपणावपाक जाय. योगाक लागून तुमची भलायकी बरी उरताच, पूण तुमची जगपाची पिराय पसून वाडटा. आमची एकाग्रताय वाडटा. समग्र शिक्षा अभियाना खाला वावुरपी एक मार्गदर्शक संदेश बाराजणकार सांगतात, ‘वर्गांनी शिकिल्ल्या ध्यानाचो वापर तुमी थोडो वेळ पसून करशात जाल्यार तुमकां खूब लाव जाता.’ तांचो बापूय खाजगी कंपनींत काम करतालो. ते मूळ सुर्लाचे. संदेशाक शिकपा खातीर खूब खटपट करची पडली. मुळावें शिकप होंडां जालें. उपरांत गिरी, फातोड्डें, मडगांव. मागीर पदवी शिक्षण सांखळे जालें. पदव्युत्तर शिक्षण कोल्हापूरा जालें. अशे तरेन सगल्या भोंवडी करून तांणी शिक्षण पुराय केलें.
संदेश मागीर पिळगांवच्या आयडियल शाळेंत रुजू जालो. शाळेचे चेरमन श्री गर्दे आनी हेर बऱ्याच लोकांनी तांकां उर्बा, प्रेरणा दिली. हातूंत पर्यावरण अभ्यासक राजेंद्रबाब केरकार, गोमंतक मराठी अकादमीचे अध्यक्ष अनिल सामंत, काॅलेजीचे प्राचार्य बाबली सर हांचो आसपाव आसा. योगा खातीर प्रेरणा मेळ्ळी ती रामदेवबाबा कडल्यान. तांचें एक शिबीर तांणी 2005 त पणजे केल्लें. रामदेव बाबा स्वता तांच्या बाबाच्या वेसनाचेर पिकार आशिल्ले. तांणी बापायचें वेसन सुटचें म्हूण अहिंसात्मक आंदोलन केलें. तातूंत येश मेळयलें. भारतांत रामदेवबाबानूच योग लोकप्रीय केला. आपूण समाजाक निसुवार्थी भावनेन कितें तरी दिवचें हे खातीर तांणी योगाचें मार्गदर्शन सुरू केलें. लाखांनी लोक आस्था टिव्ही वयल्यान योग शिकपाक लागले.
तांचे भशेन आपणे पसून कितें तरी करचे म्हूण संदेश बाराजणकार हांणी सांखळेच्या रवींद्र भवनांत सकाळचे योग वर्ग घेवपाक सुरवात केली. तांणी कितलेशेच मार्गदर्शक तयार केल्यात. योगाचे शिक्षण गोंयांत मेळचें म्हूण आमचे मानादीक मुख्यमंत्री डाॅ. प्रमोद सावंत यत्न करताले. जर तुमकां योगाचें शिक्षण घेवपाक जाय जाल्यार तुमी संदेश हांचे कडेन संपर्क सादू येता. कुंडय तपोभुमीचेर तें दितात. सांखळे लेगीत दितात. कन्याकुमारीच्या विवेकानंद केंद्रांत, रामदेवबाबांच्या हरिद्वार आश्रमांत तुमकां योग शिकपाक मेळटलो. प्रत्येक पीटी शिक्षकाक योगाची म्हायती आसपाकूच जाय. आमी योगासनां करतात, त्या प्रत्येकाचो कितें ना कितें लाव आसता. तें कोणाक सांगीत जाल्यार ते पसून योगा कडेन आकर्शित जातले. मार्गदर्शन शिबिरांत शिक्षक जशें शिकयतात, तें आमकां विद्यार्थ्यांक सांगचें पडटलें. तरूच विद्यार्थी तातूंत रस घेतले.
संदेशाच्या मता नुसार, थियरी भाग जरी तुमी आॅनलायन पद्दतीन शिकले तरी आसनां मात तशीं शिकचीं न्हय. वेळान वेळ काडून तुमी मार्गदर्शका कडल्यानूच तीं शिकचीं. तुमची भलायकी योगाक लागून बरी उरता, तेन्ना मात्सो योग गंभीरपणान घेयात. तुमी आॅनलायन करतात जाल्यार बरेंच आसा. पूण संदेशाच्या मतान तुमी तो आॅफलायनूच करचो. कित्याक तर आसनां कशीं करचीं ताची नेमकी म्हायती तुमकां मेळटली. मार्गदर्शक तुमकां योग्य ती म्हायती दितलो. खंयच्या दुयेंसाक खंयचें आसन बरें तेंय तो सांगतलो. विद्यार्थी हातूंत लक्ष घालून स्वता प्रशिक्षक म्हूण काम करपाक शकतात. स्वताचे वर्ग सुरू करपाक शकतात. हातूंत तुमी परदेशी विद्यार्थीय घेवपाक शकतात. तुमकां शाळा, काॅलेजींनी योग शिक्षक म्हूण रुजू जावपाक मेळटा. शाळांनी भुरग्यांक मार्गदर्शन करपी सहजा मेळनात. थंय तुमी काम करपाक शकता.
रामटेकाच्या कवी कालिदास संस्कृत विद्यापीठांत संदेशबाबान खाशेली योग पदवी घेतल्या. आपल्या अणभवाचो फायदो सगल्यांक जावचो म्हूण तो रातदीस वावुरता. सध्या समग्र शिक्षा अभियानांत तो काम करता. पूण योगाक तो केन्नाच विसरना.
नुस्तेमारी खात्याचें आवाहन
गोंयच्या नुस्तेमारी खात्यान पोरणें गोंय हांगा स म्हयने प्रशिक्षण दवरलां. अर्ज भरपाची निमणी तारीख 20 जून आसा. चड म्हायती खातीर तुमी www.goafishries.com वेबसायटीचेर वचपाक शकतात. डॉ सुनीता पावसकार 98507 64554 ह्या क्रमांकाचेर, नाजाल्यार सिद्धेश केरकार हांचे कडेन 94212 48792 क्रमांकाचेर संपर्क करचो, अशें कळीत केलां.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
