योग्य वेवस्थापन, नेमान नियाळ गरजेचो

भांगरभूंय | प्रतिनिधी

भलायकी केंद्रांचो दर्जो वाडला. दर्जो वाडिल्लो आसलो तरी दोतोरांचो उणाव आसा. सांखळे भलायकी केंद्राचो विचार करीत जाल्यार ह्या केंद्रात ऑर्थोपॅडीक दोतोर सध्या ना.

भाजप सरकाराच्या कार्यकाळांत येवजण्यो वा घोशणांंचो उणाव ना. केंद्रात आसूं वा राज्यांत थारावीक काळांत
नव्यो येवजण्यो वा नव्या उपक्रमांंची घोशणा जायत आसता. सगल्या खात्यांंनी येवजण्यो सुरू जाल्या. मन की बात वा हेर कार्यावळींनी प्रधानमंंत्री एखादो नवाे उपक्रम वा घोशणा करतात. काँग्रेस आनी भाजप ह्या सरकारा मदलो हो फरक आसा. मुळाव्या सुविधांंच्या निर्मिती सयत नव्यो येवजण्यो वा उपक्रमांंची सुरवात भाजपा राजवटीत जाली. स्वच्छता अभियान, उक्तडाचेर शौच मुक्ती, कुशळटाय अभियान, हर घर नळ अश्यो मोहीमो सुरू जाल्यो. देशाच्या हेर वाठारां सयत गोंयांत लेगीत सगल्या येवजण्यांची कार्यवाही सुरू जाल्या. हेर खंयच्याय सरकारा परस मोदी सरकारान सगल्यांत चड कल्याणकारी येवजण्यो सुरू केल्यात. ह्या येवजण्यांची प्रसिद्धी आनी कार्यवाही लेगीत नेटान सुरू आसा. हाका लागून बऱ्याच जाणांक ह्या ना त्या येवजण्यांचो लाव मेळपाक सुरवात जाल्या.
राज्यांतले एक कार्यक्षम मंत्री म्हूण विश्वजीत राणे हांचें नांव घेवपाक जाय. खूबशीं वर्सां तांचे कडेन भलायकी खातें आसा. तांचे कारकिर्दींत भलायकी केंद्रां तशेंच हॉस्पिटलांचो कायापालट जालो. हॉस्पिटलांनी नव्यो सुविधा निर्माण जाल्यो. भलायकी केंद्रां तशेच हॉस्पिटलांचो दर्जो सुदारपाक भलायकी मंत्री विश्वजीत राणे हांचो मोटो वांटो आसा. तरी लेगीत सुदारणा करपाक वाव आसा. दिगंबर कामत मुख्यमंत्री आसतना विश्वजीत राणे हेच भलायकी मंत्री आशिल्ले. तांचेच कारकिर्दींत 108 एम्बुलन्स सेवा सुरू जाली. अपघात जालो वा कोणाक काळजाचो आताक आयलो जाल्यार 108 सेवेक फोन करपाचो उपाय आसा. बऱ्याच वर्सां पयलीं ही सुविधा नासली. हे सुविधेक लागून कितल्याशाच लोकांचे जीव वाटावपाक मजत जाल्या. कांय खेपे 108 एम्बुलन्स उसरां पावता. तरी ताची गरज उणी जायना. वाहनांंचो आंंकडो दिसांन दीस वाडत आसा. वाहनांंचो आंंकडो जसो वाडटा, तस तसो अपघातांंचो आंंकडो वाडत आसा. अपघातांत जखमी जाल्ल्यांंचेर बेगोबेग उपचार जावप गरजेचे आसता. सगल्या भलायकी केंंद्रांंनी 108 एम्बुलन्सीची वेवस्था आसा. अपघात थळाचेर बेगिनात बेगीन पावून जखमीचेर बेगोबेग उपचार जावपा खातीर आनीक 108 एम्बुलन्सीची गरज आसा. अपघात थळार जखमीचेर उपचार करपा सयत तांकां हॉस्पिटलांत पावोपाचे काम 108 सेवा करता. साध्या गाडयेंतल्यान दुयेंतींक हॉस्पिटलांनी पावोवप आडखळीचे थारता. अशा वेळार 108 एम्बुलन्स लावकारी थारता.
राज्याक आनीक 108 एम्बुलन्सीची गरज आशिल्ल्याचें भलायकी मंत्री विश्वजीत राणे हांणीच सांगलां. आनीक वीस ते पंचवीस 108 एम्बुलन्सी हाडपाचो प्रस्ताव आसा. राज्यांत भलायकी सुविधा तयार जायत आसा. तरी ह्यो सुविधा उबारतना नियोजनाची गरज आसा. राज्यांत कसल्यो, कसल्यो सुविधा आसा. कसल्यो सुविधा आसपाक जाय. उपलब्धता आनी गरज हांचे मदलो फरक सोदपाची गरज आसा. हो फरक पयस करपाच्या हेतान सुविधा तयार जावपाची गरज आसा.
भलायकी केंद्रांचो दर्जो वाडला. दर्जो वाडिल्लो आसलो तरी दोतोरांचो उणाव आसा. सांखळे भलायकी केंद्राचो विचार करीत जाल्यार ह्या केंद्रात ऑर्थोपॅडीक दोतोर सध्या ना. दरेका भलायकी केंद्रांतले सप्तकांत एक वा दोन दीस स्पेशालिस्ट दोतोर उपलब्ध जावपाक जाय. दोळे, काळीज, हाडां (ऑर्थोपॅडीक), ईएनटी हे दोतोर उपलब्ध जावपाक जाय. तशेंच भलायकी केंद्रांनी बरेच खेपे ईसीजी मशीन वा एक्स रे मशीन चलना. मशीन इबाडलें जाल्यार ते दुरुस्त करपाक उशीर जाता. एका परस चड ईसीजी, एक्स रे मशिनां उपलब्ध जावपाक जाय. भलायकी केंद्रांनी शस्त्रक्रियेच्यो सुविधा ना. अपघातांत गंभीर जखमी जाल्ल्यांचेर मुळावे उपचार करून तांकां गोमॅकॉ वा जिल्हो हॉस्पिटलांत धाडटात. आपत्कालीन स्थितीत शस्त्रक्रिया करपाची सुविधा आसपाक जाय. दिवचले आनी सांखळे भलायकी केंद्रात आतां मोतिबिंदू शस्त्रक्रिया सुरू जाल्या. ऑर्थोपॅडीक तशेंच हेर शस्त्रक्रियांची सोय जावपाक जाय. भलायकी केंद्रांनी शस्त्रक्रियेची सोय जाली जाल्यार गोंय वैजकी म्हाविद्यालय हॉस्पिटला वेलो ताण कांय प्रमाणांत उणो जातलो.
आतां सांखळे आनी दिवचलच्या भलायकी केंद्रांंत मोतीबिंंदुंंचेर शस्त्रक्रिया करपाची सोय उपलब्ध जाल्या.
भलायकी सेवांंचो विस्तार नेटान जायत आसा. लोकसंंख्या वाडटा, तसतशी दुयेंतींंचाे आंकडो वाडटा. सरकारी हॉस्पिटलांंनी दोतोर तशेंच नर्सींंचो सेगीत उणाव आसता. सरकारी सेवे परस चडशा दोतोरांंचो कल खासगी प्रॅक्टीस करपा कडेन आसता. खासगी दोतोर लेगीत दुयेंतींंचेरूच उपचार करतात. खासगी हॉस्पिटलां, नर्सींग होम आनी खासगी दोतोर आसा, म्हूण सरकारी हॉस्पिटलांं वेलो ताण काय प्रमाणांत तरी हलको जाता. राज्यांत आतां नर्सींग शिक्षण संस्था सुरू जाल्या. हाका लागून फुडाराक नर्सींंचो उणाव जावचो ना. राज्यांत सध्या तरी एकूच वैजकी म्हाविद्यालय आसा. ह्या म्हाविद्यालयांतल्यान वर्साक सुमार देडशे एमबीबीएस दोतोर तयार जातात. हो आंंकडो वाडपाची गरज आसा. हाका लागून आनीक एक वैजकी म्हाविद्यालय सुरू जावप आवश्यक आसा. मडगांव जिल्हो हॉस्पिटलांत वैजकी म्हाविद्यालय सुरू जातलें, अशी घोशणा भलायकी मंंत्र्यांंनी केल्या. हे घोशणेची कार्यवाही अजून जावंंक ना. हॉस्पिटलांं, खाटींं, एम्बुलन्सी ह्या सुविधांं सयत दोतोरांंची गरज आसा. दोतोर ना, जाल्यार हेर सुविधांंचो उपेग किदें? राज्यांत आतां आयुर्वेदीक आनी होमिओपॅथी म्हाविद्यालयांं सुरू जाल्यांत. आयुर्वेदीक आनी होमिओपॅथी दोतोरांंचो लेगीत खूब उपेग जाता. आयुर्वेदीक विज्ञान तशेंच आयुर्वेदीक उपचार पद्दतीक उर्बा दिवपाचे केंद्राचे धोरण आसा. हाचो परिणाम म्हूण सगळी कडेन आयुर्वेदीक दोतोरांंचो आंकडो वाडत आसा.
राज्यांतली हॉस्पिटलांं, खाटींं, दोतोरांंचो आंंकडो ह्या सगल्या गजालींंचो नियाळ घेवपाचो निर्णय भलायकी मंंत्र्यांंनी घेतला. सांखळे, दिवचले, वाळपय, तुयां, हळदोण्यां, चिखली, काणकोण, कुडचड्यार, सांग्यार भलायकी केंद्रां आसात. ते भायर जिल्हो हॉस्पिटलांं आसात. सुविधा आसप जितलें म्हत्वाचें तितलेंच तांंचे वांटप योग्य तरेन जावप म्हत्वाचें आसा. हाचे खातीर भलायकी सुविधांचो नेमान नियाळ जावप गरजेचें आसा. भलायकी सुविधांंचे मॅपींग जातलें अशें भलायकी मंंत्री विश्वजीत राणे हांंणी जाहीर केलांं.

गणेश जावडेकार
9860610762