भांगरभूंय | प्रतिनिधी
जमीन रुपांतरणा विशीं सर्वोच्च न्यायालयाचो म्हत्वाचो निर्णय
जमीन रुपांतरण पोस्ट फॅक्टो मंजुरीन कायदेशीर जायना
झोनींग आनी प्रादेशीक आराखड्याक खरपणान पाळो दिवचो
भांगरभूंय । प्रतिनिधी
पणजी : जमीन रुपांतरण वा जमीन वापरांतलो बेकायदेशीर बदल पोस्ट- फॅक्टो मंजुरी वरवीं कायदेशीर करपाक शकना. झोनींग आनी प्रादेशीक आराखड्याक खरपणान पाळो दिवंक जाय आनी योग्य प्रक्रिये बगर कसलोच बदल बेकायदेशीर आशिल्ल्याचें सर्वोच्च न्यायालयान एका निवाड्यांत स्पश्ट केलां. गोंयांत प्रादेशीक आराखडो आसतानाय जमीन रुपांतरणाचें प्रमाण वाडिल्ल्यान ह्या निवाड्याचो गोंयाचेरूय परिणाम जावप शक्य आसा.
सर्वोच्च न्यायालयाचे न्यायमुर्ती विक्रम नाथ आनी न्यायमुर्ती संदीप मेहता हांणी पंजाब राज्या विशीं दिल्ल्या निवाड्यांत ही गजाल नमूद केल्या. पंजाबांत सिमेंटाच्या एका कारखान्या खातीर जमीन रुपांतरीत केल्ली. हाचे आड जनहीत याचिका पंजाब उच्च न्यायालयान भायर मारली. उच्च न्यायालयाच्या निर्णया आड सर्वोच्च न्यायालयांत याचिका दाखल केली. सर्वोच्च न्यायालयान उच्च न्यायालयाचो निवाडो भायर मारीत जमीन रुपांतरण बेकायदो आशिल्ल्याचें निरिक्षण नोंद केलां.
जमीन रुपांतरणाचेर निर्बंध हाडपा खातीर नगर नियोजन कायद्याचें कलम 39 ए रद्द करपाची मागणी जाता. पर्यावरणाचो सांबाळ करपा वांगडाच जमीन राखून गोंय वाटावपा खातीर आदले न्यायाधीश फेर्दीन रिबेलो हांच्या फुडारपणा खाला लोकचळवळ उबारतात. हे फाटभुंयेर सर्वोच्च न्यायालयान जमीन रुपांतरणा संबंदांत म्हत्वाचो निवाडो पंजाबचे एके घडणुके वयल्यान दिलो. भारतीय घटनेच्या परिशिश्ट 21 खाला जिणे खातीर नितळ आनी निरोगी पर्यावरणाचो अधिकार आस्पावता. हाका लागून पर्यावरणांत आडमेळीं हाडप हें परिशिश्ट 21 चें उल्लंघन थारता. घटनेच्या परिशिश्ट 14 त लेगीत अशेंच म्हणलां. उदरगत जरी गरजेची आसली तरी ती पर्यावरणाची संतुळाय राखून जावपाक जाय. शाश्वत उदरगतीचो सिद्धांत ही तडजोडीची घोशणा न्हय जाल्यार प्राधान्यक्रमाचो सिद्धांत. जेन्ना उदरगतीची प्रक्रिया मनशाची भलायकी वा पर्यावरणीय सुरक्षे खातीर धोक्याची थारता तेन्ना नेम संरक्षणाचे वटेन आसपाक जाय. अर्थीक फायदो वा उदरगतीक प्राधान्य दितना नागरी जीवन आनी भलायकेक लुकसाण जावचें ना हाची दक्षता धोरण वा कायदो करतना जावपाक जाय, अशें निरिक्षण सर्वोच्च न्यायालयान घडणुकेंतलो परिशिश्ट 14 आनी 21 चो संदर्भ दिवन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
