भांगरभूंय | प्रतिनिधी
ही सर्त सोंपल्या उपरांत सुर्यकुमाराचो निर्णय जातलो. फुडलो कॅप्टन घडये गिल आसतलो. ते नदरेन तो तयारीय करतलो, नाजाल्यार एक पावल फाटीं वचून हार्दिक पांड्याक ही माळ दिवची पडटली.
भारतीय क्रिकेट मंडळान टी-20 संवसारीक करंड सर्ती खातीर भारतीय पंगडाची निवड करतना काळीज हातान काडून दवरलें. शुभमन गिल आनी जितेश शर्मा हांकां पंगडांत घेवंक ना. हो निर्णय घेतना काळजाक गंभीर दुखापत जाल्या आसतलीच. संवसारीक करंड सर्त सामकीं लागीं तेंकल्या. ही सर्त जिखपाक जाय जाल्यार योग्य पंगड जाय. वैयक्तीक आवड-निवड कुशीक दवरून देशा खातीर कितें बरें तें पळोवपाक जाय आनी अजित आगरकराच्या फुडारपणा खाला निवड समितीन योग्य पंगड वेंचलो अशें म्हणूं येता, मात ह्या सर्ती खातीर तयारी मात अर्दवटूच आसा.
भारतीय पंगडा कडेन संवसारीक करंड सर्ती आदीं 5 टी-20 मॅची खेळपाची संद आसा. ह्या 5 मॅचींत एक निश्चीत पंगड खेळोवन अर्दवट आशिल्लीं तयारी कांय प्रमाणांत पुराय करपाची संद आसा. नाजाल्यार गंभीर प्रयोग करीत बसल्यार तयारी जावचीच ना.
शुभमन गिलाक भायर बसोवपाचो निर्णय योग्य काय अयोग्य? हो वादाचो विशय जावपाक शकता. वेल्यान पळयत जाल्यार निर्णय योग्य दिसता. मात, खोलायेन विचार केल्यार ताका भायर दवरप योग्य आशिल्लें काय? असो प्रस्न पडपाक शकता.
निवड समितीन ताका भायर दवरपाचो कठीण निर्णय घेतना सगल्या आंगान विचार केला, अशें म्हणूं येता. संजू सॅमसन आनी अभिषेक शर्मा परत एकदां ओपनर जोडी म्हूण खेळटली. दोगूय आक्रमक खेळपी. तशेंच तिसरें सुवातेर तिलक वर्मान ‘भिवपाची गरज ना’ अशी कामगिरी केल्ल्यान निवड समितीन भियेंनासतना निर्णय जाहीर केलो.
म्हत्वाचे मॅचींनी म्हणल्यार सेमी फायनल वा फायनलींत भारताचे तोडफोड करीत खेळपी आक्रमक बॅट्समॅन अकस्मात सुरवातीकूच बाद जायत गेले जाल्यार निमाणे मेरेन डाव व्हरपी बॅट्समॅन जाय, ह्या एकाच कारणा खातीर गिलाक संद दिताले, हें स्पश्टूच आसा. भारताची फाटल्या दोनूय वन डे वर्ल्ड कपांतली निर्णायक मॅचींतली कामगिरी पळयल्यार गिलाक कित्याक खेळयताले हें कळटले. भारतीय पंगडाच्या बॅटिगेंक वयल्यान घटसाण मेळपाक जाय ते खातीर संजू सॅमसनाचो बळी दिवन गिलाक खेळोवपाचो यत्न अपेशी थारलो. ताका गिलूच जापसालदार आसा. फॉर्म अचानक गेल्ल्यान आनी संजू सॅमसना सारको बॅट्समॅन एक्स्ट्रान बशिल्ल्यान गिल सामको उक्तो पडलो.
संजू सॅमसनाक फिनिशराची भुमिका दिवपाचो प्रयोगूय जालो. मात, संजूक सकयल पोरण्या बॉलान खेळपाक जमना, तें पळोवन जितेश शर्माक संद दिली. जितेशान ती दोनूय हातान घेतली. जितेशाची संवसारीक करंड सर्ती खातीर तिकेट पक्की अशें मानताले. मात, अकस्मात सय्यद मुश्ताक अली क्रिकेट सर्तींत दोळे दिकपावपी कामगिरी करपी इशान किशन निवड समितीच्या दोळ्या मुखार आयलो आनी निवड समितीन दोळे बंद करून ताका वर्ल्ड कपाची तिकेट दिली. हाचे वेल्यान देशी क्रिकेटीक निवड समिती कितलें म्हत्व दिता, हाचोय दिश्टावो जालो. इशान किशनाक 2 वर्सां पयलीं कसलेंच कारण दिनासतना पंगडांतल्यान भायर काडिल्लो. ताका ‘सेंट्रल कॉंट्रॅक्ट’ लेगीत रद्द केलो. भारतीय पंगडांत परत येतलो जाल्यार देशी क्रिकेटींत बरी कामगिरी करची पडटली, हें ताका दिस्त कळ्ळें, आनी ताणें तशेंच करीत थेट वर्ल्ड कपाची तिकेट जोडली.
फाटलें 5 म्हयनें भारतीय पंगडांत गंभीर प्रयोग चलताले. कोणूय खंयच्याय क्रमांकाचेर बॅटींग करतालो. कोण खंय खेळटलो हें निश्चीत नाशिल्लें. मात, संवसारीक टी-20 क्रिकेट सर्ती खातीर पंगड वेंचतना हो क्रम निश्चीत जालो. हाच्या फाटल्यान खुबश्यो घडामोडी आसतल्यो. वर्ल्ड कप जिखल्या उपरांत ताचे स्रय कॅप्टनाक मेळटाच मात येसाचे वांटेकार खूब जाण आसतात. मात, हारल्यार सगलें कॅप्टनाच्या माथ्यार मारून मेकळें जातात. कॅप्टन सुर्यकुमारान आपलो ट्रम कार्ड वापरून आपल्या हक्काचो वापर केला आसतलो. तिलक वर्मा तिसऱ्या आनी आपूण चवथ्या क्रमांकाचेर आनीक प्रयोग ना. विकेट किपर ओपनर आसतलो. एकलो जखमी जालो जाल्यार दुसरो विकेट किपरूय ओपनरूच आसचो, जाका लागून सकयलो बॅटींग क्रम हालचो ना, अशी जतनाय ताणें घेतली. तशेंच रोहित शर्माचे शाळेंत तयार जाल्ल्या सुर्यकुमारान बॉलरांची निवड करतना आनी बॅटिंगेक खोलाय दितना फाटल्या टी-20 संवसारीक करंड सर्ती खातीर जसो पंगड आशिल्लो लागीं लागीं तसोच पंगड वेंचला. म्हणल्यार फाटल्या सर्तींत जडेजा आठव्या क्रमांकाचेर बॅटिंगेक येतालो, ही भुमिका आता अक्षर पटेल करतलो, अक्षर जखमी जालोच जाल्यार वॉशिंग्टन सुंदर ती सुवात घेवपाक शकता, असो समतोल आसा. तशेंच फिनिशर म्हूण सिक्सर किंग रिंकू शर्माक सुवात मेळ्ळी. हें सगलें करतना जितेश शर्माचो मात बळी गेलो. जितेशान पंगडा भायर वचपा सारकी कामगिरी करूंक ना. फुडाराक ताका संद मेळपाक शकता.
फाटल्या वर्ल्ड कपांत रोहित-विराट ओपनर आशिल्लें. तिसऱ्या सुवातेर पंत येतालो, मागीर सुर्या, अक्षर, पांड्या, दुबे, जडेजा असो क्रम आशिल्लो. रोहित स्फोटक, विराट थीर, पंत स्फोटक असो पयल्या 3 क्रमांकाचेर फॉर्मुला आशिल्लो. आतांय तसोच आसा. अभिषेक-संजू स्फोटक, तिलक थीर. उपरांत सुर्या, हे फावट अक्षर आठव्या सुवातेर आसतलो. सुरवातीक विकेटी पडल्यार अक्षर पांचवें सुवातेर दिसपाक शकता. बॉलिंगेंत कुलदिपाक नाजाल्यार अर्शदीपाक भायर बसचें पडटलें.
भारतीय पंगड तसो कागदार घटमूट दिसता. मैदानार सगल्यांचो खेळ जावपाक जाय. खास करून सुर्यकुमाराचो. फाटलो कितलो तेंपूच ताचो बॅडपॅच चालू आसा. सुर्या कांय म्हयन्यां पयलीं नंबर वन टी-20 बॅट्समॅन आशिल्लो. ताचो खेळ जायत जाल्यार भारताक आठव्या क्रमांकाच्या बॅट्समॅनाची गरजूच पडचीं ना, बॉलींग अॅटॅक खर करपाची संद मेळटली. हो सगलो विचार करून भारतीय पंगडाची निवड जाल्या.
भारतीय पंगड सेमी फायनलींत निश्चीत पावतलो. मात, सेमी फायनलींत कांय मिणटांचो बाबत खेळ घात मारपाक शकता. हो घात जावपाक जायना म्हूण गिलाक तयार करताले, गिल तयार जायना, दबाव वाडपाक लागिल्लो, ह्या सगल्या कारणांक लागून निमाणे खिणाक विकेट किपर ओपनर ही कांय म्हयन्यां पयलींची संकल्पना परत मुखार हाडून गिलाक भायर दवरून गिलपुराण भारतीय निवड समितीन एकदांचें सोंपयलें. हो निर्णय योग्य थारूं, अशी इत्सा.
गिलाकूय टी-20 क्रिकेटीचें म्हत्व कळ्ळां आसतलेंच. 2020त पदार्पण करीत सावन ताका चवथे फावट टी-20 संवसारीक करंड सर्तीची तिकेट चुकली. ही सर्त सोंपल्या उपरांत सुर्यकुमाराचो निर्णय जातलो. फुडलो कॅप्टन घडये गिल आसतलो. ते नदरेन तो तयारीय करतलो, नाजाल्यार एक पावल फाटीं वचून हार्दिक पांड्याक ही माळ दिवची पडटली. सध्या तरी सगल्यांचो फोकस येता त्या संवसारीक करंड सर्तीचेरूच.
– अमर पाटील (7507495151)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
