भांगरभूंय | प्रतिनिधी
यत्ता णववेच्या प्रस्नपत्रिकांची शालांत मंडळ करतलें छाननी
पणजी : यत्ता णववेच्या दुसर्या सत्राच्यो प्रस्नपत्रिका विद्यालयांक काडपाची मेकळीक शालांत मंडळान दिल्या आसली तरी तांचो दर्जो आनी नमुन्याची (फॉरमॅट) छाननी शालांत मंडळा वरवीं जातली. खासा समिती वरवीं ती जावन प्रस्नपत्रिका सुमार दर्जाची आसल्यार वा योग्य नमुन्या प्रमाण नासल्यार संबंदीत शिक्षक/ मुख्याध्यापकाचेर खर कारवाय जातली. णववेची परीक्षा ४ मार्च ते १२ मार्च मजगतीं जातली. शालांत मंडळान हे खातीरचें वेळापत्रक निश्चीत केलां.
णववेची परीक्षा जाली काय पांच दिसां भितर दरेकी विद्यालयाक एका बंद पाकिटांत घालून दरेकी विशयाच्यो प्रस्नपत्रिका मंडळाक धाडप बंधनकारक आसा. प्रस्नपत्रिकांच्या छाननी/ तपासणी खातीर शालांत मंडळ खासा समिती स्थापन करतलो. ही समिती प्रस्नपत्रिकांचे नमुने तशेंच दर्जाची तपासणी करतले. दरेकी विशया खातीर प्रस्नपत्रिका कशी आसची? ताचे नमुने (ब्ल्यू प्रींट) शालांत मंडळान तयार केल्यात. ह्या नमुन्या प्रमाण शिक्षकांक प्रस्नपत्रिका काडची पडटली. एखाद्या विद्यालयान एखाद्या विशयाची प्रस्नपत्रिका नमुन्या प्रमाण काडली ना वा ती सुमार दर्जाची आसली जाल्यार तशे संबदीत विद्यालयाक कळयतले. शिक्षका वरवीं विद्यालयाक हाचेर स्पश्टीकरण दिवचें पडटलें. प्रस्नपत्रिकेचो दर्जो सामको सुमार आसलो आनी ती नमुन्या प्रमाण नासली जाल्यार कारवाय करपाचे अधिकार मंडळाक आसा. शालांत मंडळान अशे तरेचे स्पश्ट निर्देश विद्यालयांक दिल्यात.
राष्ट्रीय शिक्षण धोरणा प्रमाण णवेच्या सत्र (सामाय) परीक्षांच्यो प्रस्नपत्रिका शालांत मंडळान काडपाचो निर्णय जाल्लो. प्रस्नपत्रिका मंडळान काडच्यो मात तपासणी विद्यालयांनी करची, अशें मंडळान थारायल्लें. मात आतां णववेच्या दुसर्या सत्राच्यो परिक्षा विद्यालयांकूच काडपाचे अधिकार दिल्यात. मात प्रस्नपत्रिकां खातीरचो नमुनो मंडळान तयार केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
