भांगरभूंय | प्रतिनिधी
सर्वोच्च न्यायालयान दिल्लींतल्या रस्त्यां वयल्या सुण्यांचो बंदोबस्त करपाचे निर्देश दितकच, सुणेमोगी आनी विरोधक दोगांय मदी वाद- विवाद सुरु जाला. कांय जाणांनी सुणे कशे हल्ले करतात, ताचे भयानक व्हिडियो सोशल मिडियाचेर घालपाक सुरू केलां. तर बाकीचे सुणो हो कितलो जिवाक जीव दिवपी ताचे व्हिडियो अपलोड करपाक लागल्यात. कोर्ट सांगता ते भशेन सुण्यांचो बंदोबस्त फटाफट जायत हाची खात्री ना. कारण आमचें प्रशासन कासवा परस सवकास चलता. तातूंत आसरो घरांत सुण्यांची रावपाची वेवस्था केल्यार तांकां वेळार खाण, वखदां मेळटलीं. तांची कुयदाद जातली, हाची खात्री दिवप धाडसाचें थारतलें. प्राणीसंग्रहालयांतल्या सुकणीं, सावदांचे जतनाये विशीं हाचे पयलीं वाद जाल्यात. सुण्यांचो बंदोबस्त हो जावपाकूच जाय, पूण दोनूय वटेनच्या लोकांक दुखयनासतना! योग्य तरेन.
गोवा एनिमल फेडरेशनान रस्त्या वयल्या सुण्यांचेर नियंत्रण दवरपाक 100 कोटींचो आराखडो सुचयला. जनावरां सांबाळ खात्याच्या 10 हजार कोटींच्या उपाय- येवजण्यांचेर तांणी टिका केल्या. ही येवजण परिणामकारक नाच, पूण अर्थीक नदरेनूय परवडपाची ना, अशें तांचें म्हणणें.
फेडरेशनाच्या मतान वर्साक निर्बिजीकरणाच्यो फक्त 15 हजार शस्त्रक्रिया जातात. प्रत्यक्षांत 50 हजार जावंक जाय. म्हणटकच सगलें वजें आपसेवी संस्थाचे तकलेर दवरिनासतना सरकारी यंत्रणांक स्वता पावलां उबारचीं पडटलीं. पंचायत पांवड्यार समिती नात, 24 वरां चलपी जनावरांची सेवा केंद्रां नात. देड लाख सुण्यांचें निर्बिजीकरण तीन वर्सां भितर पुराय करपाक जाय. सुण्यांच्या प्रजनन दरा परस वेगान काम करचें पडटलें. सद्दां 164 शस्त्रक्रिया शक्य आसा, अशें फेडरेशनाचें मत. दरेकी 300- 400 सुण्यांक आस्पावन घेवपी केंद्रां उबारून थंय दोतोर, हेर वैजकी कर्मचारी, सुणीं धरपी, प्रशासकीय कर्मचारी दवरपाची सुचोवणी तांणी आराखड्यांत केल्या. फक्त दोन ते तीन एकर जमीन खास ह्या केंद्रां खातीर दिवप सहज शक्य आसा. हीं केंद्रां चलोवपाक पुराय पालव मेळटलो, अशें फेडरेशनान म्हणलां. मुंबयंत अश्याच केंद्रांक लागून सुण्यांचो आकडो 80 टक्के मेरेन उणो जाला, अशेंय तांचें म्हणणें. सरकारी यंत्रणेन हाचेर विचार करूंक जाय.
काल ताळगांवचे ग्रामसभेंत सुण्यां विशीं भासाभास जाली. एनजीओच्या साह्यान सुण्यांचें निर्बिजीकरण करपाचें, तशेंच तांकां जेवण घालपी प्राणीमोगीं कडेन चर्चा करपाचें थारलां. पणजे म्हापालिकेन जशी सुणीं सांबाळपाची खाशेली वेवस्था केल्या, तशी प्रत्येक पंचायत, पालिकेन करपाक जाय. ते खातीर गांवा भायर जागो पळोवन ल्हानशें केंद्र उबारु येता. थंय सुण्यांचेर अन्याय जावचो ना हाची मात जतनाय घेवची पडटली. सुणें हो प्रामाणीक, जिवाक जीव दिवपी मात ताका लागून थोड्यांक जीव वगडावचो पडला, हें कोणे विसरचें न्हय. ह्या प्रस्नाचेर युक्तीवाद, वादा परस कृतीची चड गरज आसा!!
सुण्यांची शस्त्रक्रिया सारकी जाली ना, जाल्यार तांचो आंकडो वाडत वता. रस्त्यांचेर कांयजाण खाणां उडयतात. ताका लागून सुण्यांचो उपद्रव वाडला. तांचें लसीकरण नेमान जावंक जाय.
हे बाबतींत स्वराज्य संस्था व्हडलें योगदान दिवंक शकतात. दर म्हयन्याक निर्बिजीकरण मोहीम चालीक लावंक जाय. लोकांनी रस्त्यां वयल्या सुण्यांक पोसपाक घेत जाल्यार ही समस्या रोखडीच नियंत्रणा खाला येतली. सगल्याच पोशिल्ल्या सुण्यांची पंचायत, पालिके कडेन नोंदणी जावपाक जाय.
गोंयांत आक्रमक जातीचीं सुणीं पोसपाक बंदी आसा. तांकां दंडूय दिवपाचो निर्णय जाला. मात सध्या जांचे कडेन हीं सुणी आसात, तांचें कितें ते विशीं सांगप सरकारी यंत्रणेची लागणूक. सुण्यांचो आनी मनशाचो फाटल्या शेंकड्यांनी वर्सां सावन संबंद आसा, हें कोणे विसरचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
