भांगरभूंय | प्रतिनिधी
आतां लव जिहाद करप्याक मेळटली जल्मठेप
नवी दिल्ली, खबरां संस्था ः योगी सरकारान पावसाळी अधिवेशनाच्या पयल्या दिसा विधानसभेंत यूपी बेकायदेशीर धर्मांतर प्रतिबंध (दुरुस्ती) विधेयक मांडलें. तातूंत जायत्या गुन्यांवांची ख्यास्त दुपेटीन वाडोवपाचो प्रस्ताव मांडलो. तेच बरोबर लव्ह जिहाद सारक्या गुन्यांवांक जल्मठेपेची तरतूद आसा.
गुन्यांवाची गंभीरताय, समाजीक स्थिती आनी बायलांची प्रतिश्ठा आनी एससी- एसटी लोकांचे बेकायदेशीर धर्मांतरण जावचें न्हय हे खातीर ख्यास्त आनी दंड वाडोवपाची गरज आसा अशें सरकारान म्हणलां.
० हाचे पयलीं धर्मांतर आनी फटोवन लग्न केल्यार एक ते पांच वर्सां बंदखण आनी 15 हजार रुपया दंडाची तरतूद आशिल्ली. आतां ह्या गुन्यांवाक 3 ते 10 वर्सां बंदखण आनी 25 हजार रुपया दंडाची तजवीज केल्या.
० नेण्ट्या एससी, एसटी बायले वांगडा लव्ह जिहाद केल्यार 2 ते 10 वर्सां बंदखण आनी 25 हजार रुपया दंड भरपाची ख्यास्त आशिल्ली. आतां तांतूत वाड करुन 5 ते 14 वर्सां बंदखण आनी 1 लाख रुपया दंड केलां.
० सध्या बेकायदेशीर सामुहीक धर्मांतर केल्यार 3 ते 10 वर्सां बंदखण आनी 50 हजार रुपया दंड भरचो पडटा. आतां 7 ते 14 वर्सां बंदखण आनी एक लाख रुपया दंड भरचो पडटलो.
० ह्या कायद्या खाला बेकायदेशीर धर्मांतरा खातीर निधी दिवपाचोय आस्पाव गुन्यांव म्हूण केला. खंयचेय परकी संघटने कडल्यान वा खंयच्याय बेकायदेशीर संघटने कडल्यान धर्मांतरा खातीर निधी मेळटा जाल्यार त्या संस्था संचालकाचेर कारवाय जातली.
० कोणेंय जिवाचो वा मालमत्तेचो भंय दाखयलो, बळगें वापरल्यार वा कोणाचेरूय धर्मांतर करपाक चेंपण हाडल्यार ताका जन्मठेप आनी दंड भरपाटी ख्यास्त जातली.
० विधीमंडळाच्या दोनूय सभाघरांनी 2021 वर्सा हें विधेयक मंजूर केल्लें. त्या वेळार चडांत चड 10 वर्सां बंदखण आनी 50 हजार रुपया दंडाची तरतूद आशिल्ली. प्रस्तावीत दुरुस्ती विधेयकांत सरकारान ख्यास्त आनी दंड दोनूय वाडयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
