भांगरभूंय | प्रतिनिधी
हरियाना विधानसभा वेंचणुकेंतल्या निकालान भारतीय जनता पक्षाचो आत्मविस्वास वाडला. ताचें प्रत्यक्ष दर्शन महाराष्ट्र विधानसभेचे वेंचणुकेंत जातना ठळकपणान दिसून येता. हरियानांत काँग्रेसीच्या ‘हाता’तल्यानूच न्हय जाल्यार अक्षरशा घाशांतल्यानूच जैताचो घांस हिरावन घेतले उपरांत जे आक्रमकतायेन भाजपान महाराष्ट्रांतूय परतून सत्ता हातासपा खातीर जो नेट लायला तो पळयत जाल्यार विरोधी महाविकास आघाडीचें काम खूबशें कठीण जालां. उमेदवारी अर्ज दाखल करपाच्या निमाण्या दिसां मेरेनूय सुवातो वांटपाचें चित्र स्पश्ट जायत नासत जाल्यार काँग्रेसप्रणीत महाविकास आघाडींत नेमकें कितें चल्लां हाची कल्पना येता. भाजपाच्या फुडारपणा खालचे महायुतींतय सुवातांच्या वांटपा वेल्यान मतभेद आशिल्ले हें मान्य करून लेगीत ते फाटीं उडोवन भाजप आनी तांचे इश्ट पक्ष आयज मतदारा सामकार वचपाक तयार जाल्ल्याचें दिसतात. हाचें उरफाटें नेमकें महाविकास आघाडींत चालू आसून ऊबाठाची शिवसेना आनी काँग्रेस हांचे मदीं एकामेकांचेर ताण करून चडांत चड सुवातो कश्यो हातासूं येतल्यो हे खातीर दगाबाजीचो तांचो जो खेळ चल्ला तो पळयल्यार प्रत्यक्ष वेंचणुकेंत हे लोक खंयच्या थराक वचूंक शकतले हें समजुपा सारकें आसा. हरियानांत ‘बटेंगे तो कटेंगे’ हो उत्तर प्रदेशाचे मुख्यमंत्री आदित्यनाथ योगी हांचो मंत्र भाजपाच्या बऱ्या कामाक आयलो. आतां महाराष्ट्रांतूय भाजपान ‘बटेंगे तो कटेंगे’ ह्या मंत्राचेरूच भर दिवन आपली रणनिती आंखिल्ली स्पश्ट दिसता.
ऐन दिवाळेंत महाराष्ट्रांत एका नव्या रणधुमाळेक सुरवात जाल्ली आसून दिवाळेचो आनंदोत्सव सोंपले बरोबर ह्या रणधुमाळींत कोण कोणाचेर सरशी करतलो, मतदार नेमके कोणा फाटल्यान रावले हें चित्र स्पश्ट दिसून येतलें. ‘बटेंगे तो कटेंगे’ ह्या मंत्राची मोहिनी महाराष्ट्रांतल्या मतदारांचेरूय पडटना जाणवता, आनी तातूंत मात्शें लेगीत तथ्य आसत जाल्यार हरियाना फाटोफाट हें राज्यूय व्हगडावपाची वेळ काँग्रेस आनी तांच्या कथीत इंडी आघाडीचेर येवंक शकता. महाराष्ट्रांतल्या मुंबय तशेंच हेर खूबशा शारांनी आनी जिल्ह्यांनी ‘बटेंगे तो कटेंगे’ चे पोस्टर्स सद्या झळकतना दिसतात. ह्या नाऱ्याचो महाविकास आघाडीच्या यशाचेर कांयच फरक पडचो ना अशें आमचे संजय राऊत म्हणत आसले तरी तांकां ताचे कडेन आडनदर करूंक मेळची ना. मुंबयचे भाजपा फुडारी विश्वबंधू राय हांणी ह्या पोस्टरा फाटलो उद्देश स्पश्ट करतना म्हणलां की, विरोधी काँग्रेस आनी तांचे इश्ट पक्ष ज्यो राजकी चाली खेळटात ताका हे पोस्टर्स म्हणल्यार आमी दिल्ली जाप आसा. उत्तर प्रदेशांत योगींचो हो नारो बरोच हीट थारला. हरियानांत तर होच मंत्र थंयच्या सत्ता विरोधी ल्हारांतूय भाजपा खातीर तारणहार थारलो असो निश्कर्श राजकी अभ्यास काडटात. मागीर ताचोच राजकी लाव भाजपान महाराष्ट्रांत घेवपाचो यत्न करूंक नासलो जाल्यार ती एक नविदाद थारपाची. हरियानांत एकवट करून मतदारांनी भाजपाक अनुकूल कौल दिलो हें स्पश्ट आसतना महाराष्ट्रांतल्या सुज्ञ मतदारांनी तोच कित्तो गिरोवप आमकां अपेक्षीत आसा अशेंय विश्वबंधू राय म्हणटात.
लोकसभेचे वेंचणुकेंत जे तरेन ‘व्होट जिहाद’ विरोधकांनी घडोवन हाडलो ताका हो नारो म्हणल्यार समर्पक अशी जाप आसून प्रधानमंत्री नरेंद्र मोदी हांचे पसून राष्ट्रीय स्वयंसेवक संघाच्या मुखेल पदाधिकाऱ्यां मेरेन योगी हांच्या ह्या नाऱ्याक येवकारूच दिल्ल्याचें ‘बटेंगे तो कटेंगे’ हो मंत्र महाराष्ट्रांतूय मतदारांचेर आपलो प्रभाव पाडूंक शकतलो अशें खूबशा जाणांक दिसता. लोकसभा वेंचणुकेंतल्या काँग्रेसीच्या ‘व्होट जिहाद’ हाका हरियानांत मतदारांनी जी जाप दिली ती पळयत जाल्यार लोकसभे वेळार महाराष्ट्रांत जें कितें घडलें ताचीच पुनरावृत्ती जावपाची आशा काँग्रेस आनी तांच्या इश्ट पक्षाक बाळगूंक येवची ना. मतदारांक प्रभावीत करपा खातीर महाविकास आघाडीच्या फुडाऱ्यांक वेगळें कशें कितें करून दाखोवपाची वेळ आसतना हे पक्ष दरेक सुवातां खातीर अजून एकामेकांच्या हड्ड्यार बशिल्ल्याचें जें चित्र दिसता तें तांचे खातीर निश्चितूच आशादायक आशिल्ल्याचें म्हणूंक येवचें ना. ‘बटेंगे तो कटेंगे’ ह्या नाऱ्यांतल्यान भाजपाक अर्थांतूच हिंदू समाज एकवटान रावलो ना जाल्यार कितें जातलें हाची समज दिवपाची आसा. तें करतना जाती, भाशा, मागास, दलीत असो वांटचो न्हय आनी तसो वांटत जाल्यार ते एकूण समाजा खातीर कशें घातक थारूंक शकता हो संदेश दिवपाचो आसा. हरियाना उपरांत महाराष्ट्रांतूय हो मंत्र भाजपाक तारक थारतलो काय कितें हें फुडल्या कांय दिसांतूच कळून येतलें.
महाराष्ट्रांत परंपरेन तीन राजकी पक्षां मदींच मुखेलपणान वेंचणुको जायत आयल्यात, हें खरें आसलें तरी ह्या वेळार वट्ट स राजकी पक्षां मदीं हें झूज जायत आशिल्ल्यान हे फावटीच्यो वेंचणुको आदींचे तुळेन निश्चितूच वेगळ्यो आसतल्यो हातूंत दुबाव ना. दोन शिवसेना आनी दोन राष्ट्रवादी पक्ष वेंचणुकेच्या रिंगणांत आशिल्ल्यान थोडी गोंदळाची स्थिती निर्माण जाल्ली आसली तरी भाजपाक लागीं आशिल्ले खरे शिवसेनेन आनी राष्ट्रवादी काँग्रेसीनूय एकूण सुवातो वांटपा वेळार व्हडलो भाव ह्या नात्यान भाजपा कडेन केल्लें सहकार्य खुबूच मोलाचें थारूंक शकता. हाचे उरफाटें उबाठाची शिवसेना आनी काँग्रेस पक्षांतलीं सदचीं झगडीं पळोवन मतदारांनी कौल कोणाक दिवप तें आतांच थारायलां आसतलें अशें म्हणूंक येवचें ना. उबाठा शिवसेना आनी काँग्रेस हांची तर व्हडलो भाव आपुणूच कसो हें सिद्ध करपा खातीर अजून धडपड चल्ल्या. ह्या यत्नांत शरद पवारान आपली पोळी भाजून घेतल्या. शिवसेना उबाठाचे मुखेली कोण हे विशींय आतां त्या पक्षाच्या कार्यकर्त्यां मदीं भ्रम निर्माण जाला. हाचें कारण म्हणल्यार आमचे संजय राऊत आपूणच शिवसेना मुखेली आशिल्ल्याचें वावुरतना दिसतात. सरन्यायाधीश धनंजय चंद्रचूड हांणी न्यायदेवतेच्या दोळ्या वेली काडून उडयिल्ली काळी पट्टी आतां उद्धव ठाकरेंच्या दोळ्यार आशिल्ल्याचें खूबशा जाणांक दिसता. संजय राऊतांची अरेरावी भाशा उबाठाक अडचणींत हाडटली अशें आयज म्हणूंक येवचें ना. पूण ह्या दोनूय पक्षां मदीं एकामेकांचेर राजकी कुरघोडी करपा खातीर जे कितें चल्लां ताचो फायदो घेवपा इतले राजकी चातुर्य देवेंद्र फडणवीस आनी तांच्या इश्ट पक्षांच्या फुडाऱ्यां कडेन आसा हें विसरूंक येवचें ना.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
