भांगरभूंय | प्रतिनिधी
म्हजी घरकान्न सविता आनी हांव मे 2023 वर्सा काश्मीरांत गेल्लीं. आमी गोंयांतल्यान श्रीनगर आनी दिल्ली सावन श्रीनगराक उड्डाण केल्लें. श्रीनगरांत देंवतना म्हाका बर्फान भरिल्ले दोंगर आनी सकयल सोबीत देंगणांनी (व्हॅली) येवकार दिलो. खूब उमेद जाली. श्रीनगर पावतकच आमकां पेहालगांवच्या एका हाॅटेलांत व्हेले. म्हज्या पजनेलांतल्यान बर्फान भरिल्ले दोंगर म्हाका दिसताले.
दुसऱ्या दिसा आमी काश्मीरांतल्या ‘मिनी स्वित्झर्लंडा’ कडेन गेलीं, जी प्रत्यक्षांत पहलगामांत आशिल्ली बैसरन व्हॅली. ताच्या अदभूत गॉर्ज आनी भोंवतणच्या दोंगरांक लागून मिनी स्वित्झर्लंड म्हणून वळखतात. पहलगामा सावन पोनी रायड वा ट्रेकिंग करून बैसारणाक पावूं येता. सैमीक सोबीतकाय आनी नदरेक पडपी दृश्यां खातीर वळखतात ती व्हॅली आनी अरु व्हॅली पहलगामांतलीं सुरम्य देंगणां. आपोलांच्या बागांनी आनी दृश्य सोबीतकायेक लागून ह्या वाठाराची वळख आसा.
तिसऱ्या दिसा आमी गुलमार्गाक वचपाक भायर सरली. गोंडोला घेवन ग्लेशियर पॉयंटाक गेलीं. बर्फ धरपाक इतलो रोमांच, मजा आयली म्हूण सांगूं? गोंडोलाचे जायते फोटो काडले. उपरांत सोनमार्गाक भेट दिली. श्रीनगरांतल्या जबरवान दोंगररांगेच्या माथ्यार आशिल्ल्या शंकराचार्य देवळाक वा श्रेष्ठेश्वर देवळाक आमी भेट दिली. तें देवूळ शंकराक समर्पीत केलां. तें एक हजार फूट उंचायेचेर आसून श्रीनगर शार सुरक्षेचेर लक्ष दिता. उपरांत श्रीनगरांतल्या शालीमार बाग आनी निशात बाग ह्या दोन नामनेच्या मोगल बागांक भेट दिली. आमच्या काश्मीर भोंवडेचो निमाणो दीस आमी दाल तळ्याचेर हावस बोटींत रावून काडलो. दल तळ्यांत शिकारांतय पासयो मारली. तो एक अद्भुत अणभव आशिल्लो. काश्मीरांत, हावसबोटी दल तळ्या मुखार भितरल्या भागांत आसात आणि त्यो स्थिर आसात. केरळा भशेन त्यो चलयनांत. दल तळ्याचे देगेर धक्के बांदिल्ले आसात, थंयच्यान शिकारा घेवन हाऊसबोटींत वचपाक मेळटा.
हावस बोटीचेर जिवीत मनभुलोवपी आसता. बोटीचेर रावप खूब शांत, शांत आनी आरामदायक. केअर टेकर आनी खलाशी तुमचे खातीर सगळेंच सांबाळटात.
श्रीनगर विमानतळा वयल्यान दिल्ली आणि दिल्लीच्यान गोंयां, जड अंतःकरणान आमी काश्मीर सोडले. आमचो प्रवास आरामदायी आणि संस्मरणीय केल्ले खातीर ट्रॅव्हल बगचे द्कशल आणि अनुष्का हांचे उपकार.
– जाॅन आगीयार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
