भांगरभूंय | प्रतिनिधी
चवदाव्या डी. डी. कोसंबी विचार महोत्सवाक सुरवात
पणजी : जिणेचो प्रवास सोबीत, अर्थपूर्ण, उद्देशपूर्ण आनी फळादीक करपाची जापसालदारकी स्वताची आसा. ती दुसऱ्यांचेर सोडल्यार दुख्खच मेळटले. येस म्हत्वाचें आसाच, पूण नातें आनीकय म्हत्वाचें अशें नामनेचे प्रेरणादायी वक्ते गौर गोपाळ दास हांणी डी. डी. कोसंबी विचार महोत्सवांत सांगलें.
गोंयच्या कला संस्कृती संचालनालयान आयोजीत केल्ल्या चवदाव्या डी. डी. कोसंबी विचार महोत्सवाक कला अकादमीच्या मास्टर दीनानाथ मंगेशकर कला मंदिरात गोपाळ दास हांच्या व्याख्यानान सुरवात जाली. ‘नाते संबंद आनी जिवीत’ ह्या विशयाचेर प्रेरणादायक विचार तांणी मांडले. मुख्यमंत्री डॉ. प्रमोद सावंत, कला संस्कृती मंत्री गोविंद गावडे, कला संस्कृती सचीव सुनील अंचिपका (आयएएस), कला संस्कृती संचालक सगुण वेळीप आनी गोपाल दास हांचे हाजिरेंत महोत्सवाचें उक्तावण जालें.
व्याख्यान दिवपा परस संवाद चड म्हत्वाचो अशें सांगून गोपाळ दास माचये वयल्यान देंवले आनी सभाघरांतल्या प्रेक्षकां कडेन संवाद सादून हासत, खेळत, फकांडां करून, चर्चांक फावो अशीं गितां गायतना विशय सादर केलो. भुरग्यांचेर दबाव हाडप बंद करात आनी तांकां प्रेरणा दिवपाचो यत्न करात. तुमचो जिणेचो प्रवास येसस्वी करपा खातीर जिणेंतल्या समस्यां आनी प्रस्नां कडेन एकठांय झुजूं नाकात. इत्साशक्त ही तुमची बळिश्ट संपत्ती हें लक्षांत दवरात अशें दास हांणी सांगलें.
मुख्यमंत्री प्रमोद सावंत हांणी म्हणलें, गोंय ही कलाकार तशेंच विचारवंतांची भूंय. डी. डी. कोसंबी हांचे सारके व्हड विचारवंत हांगा निर्माण जालें. गोंय मुखार व्हरपा खातीर बुंदीवंतांची व्याख्यानां आयकुपाची गरज आसा. उदरगतीच्या मळार गोंय हेर राज्यां परस फुडें आसा आनी 2037 वर्सा पयली उदरगत जावपाक जाय. विचार महोत्सवांक प्रेक्षकांक आपोवचे पडनात, ते स्वताच्या इत्सेन येतात आनी ताची आतुरतेन वाट पळयतात हें ह्या महोत्सवाचें येस अशें मुख्यमंत्र्यांनी सांगलें. सिद्धी उपाध्ये हांणी सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
