भांगरभूंय | प्रतिनिधी
ए. श्रीकर प्रसादः मास्टरक्लासींत दिले चित्रपट एडिटींगाचे धडे, सांगलीं गुपितां
भांगरभूंय । पीआयबी
पणजीः चित्रपट निर्मात्यांक आपल्या प्रेक्षकांक बरे तरेन समजून घेवपाक जाय. आपल्या प्रेक्षकांची आवड बरे भशेन कळ्ळी जाल्यार चित्रपट येसस्वी जावपाक आदार मेळटा. प्रेक्षकांक चित्रपट आवडलो आनी ताका येस मेळ्ळें जाल्यार निर्मात्याक खोस जाता, अशें नामनेचे फिल्म एडिटर ए श्रीकर प्रसाद हांणी सांगलें.
इफ्फींत आयोजीत केल्ले ‘टू कट ऑर नॉट टू कट’ ह्या विशया वयले मास्टरक्लासींत प्रसाद उलयताले.
अतिशयोक्तीची पातळी चित्रपट आनी कलाकारां प्रमाण बदलता. स्टार चित्रपटांनी आमी प्रेक्षकांक खोशी करचे खातीर प्रसंग रंगोवन सादर करतात, पातळी वेगळीवेगळी आसपाक शकता. चित्रपटाचो आनंद दिवचे खातीर तातूंत गती येता. तुमी ताका वेगळी करपाक शकना. तातूंत अतिशयोक्ती जावपाक जायना आनी वास्तव मांडपाक जाय, हेंवूय तितलेंच गरजेचें, अशें प्रसाद हांणी सांगलें.
चित्रपट एडिटींगा विशीं आपले अणभव सांगतना प्रसाद हांणी म्हणलें, दर अणभव दुसऱ्या अणभवा वटेन व्हरता. दर खेपे कितें ना कितें नवें शिकपाचो अणभव मेळपाक जाय. हार पत्करप खूब सोंपें, पूण मोखी वटेन काम करप आनी तातूंत येस जोडप चड आव्हानात्मक आसता.
प्रसाद हांणी विवीध एँगल्स आनी साबार कॅमेऱ्यांचो कवरेज तंत्र आनी एडिटींगाचेर जावपी परिणाम हाचे विशीं तांणी म्हायती दिली. बारीक फिल्म निर्माते ते मेरेन ‘कट’ची कल्पना करपाक शकनात जे मेरेन ते कटींग टेबलाचेर बसनात. कितल्याशाच दिग्दर्शकांक एडिटींग रुमाचो अणभव आसना. आपलें काम प्रभावी दिसपा खातीर तांचे कडेन एडिटींग टेबलाचो अणभव आसप खूब गरजेचो. आतां चड करून सॉफ्टवेयरच्या आदारान अदीक एडिटींग करपाची संद आसता, पूण बरी गजाल भायर काडप कठीण जाता, अशें मत उक्तायलें. चित्रपटांनी पॉज (मातसो विसव) हाचें म्हत्व सांगतना प्रसाद हांणी म्हणलें, पॉज ही भारतीय संकल्पना. पूण हेरशी दक्षीणेंतल्या चित्रपटांनी पॉज हो शॉट्सा मदीं न्हय जाल्यार पुराय काणयेंत आसता. चित्रपट एडिटराक टायमींग कळप म्हत्वाचें आसता. दर स्थितीची आपली टायमींग आसता. योग्य वेळार कट गरजेचो आसता, तोच एक विशेश प्रभाव घालता. स्थिती पळोवन पॉज घालपाचो निर्णय घेवचो पडटा. दृश्यांक केन्ना केन्ना जाप दिवपाची गरज आसना, अशा वेळार त्या दृश्याक अदीक प्रभावी करपा खातीर पॉजचो आदार घेतात. जावं येता अभिनेत्यान शुटींगे वेळार पॉज घेतिल्लो आसना, पूण दृश्य प्रभावशाली करचे खातीर आमी पॉज वाडयतात. देखीक ही गजाल विनोदा वेळार घडटा. प्रेक्षकांक भावना समजचे खातीर आनी ताच जाणीव जावचे खातीर तांकां वेळ दिवप गरजेचो आसता, अशेंय प्रसाद हांणी सांगलें.
प्रेक्षक क्लायमेक्स घेवन वतातः प्रसाद
क्लायमेक्स म्हणल्यार काणयेची तेंगशी. काणयेंत ताचें खूब म्हत्व आसता. क्लायमेक्स जर बरो नासत जाल्यार पुराय चित्रपट अर्दकुटो उरता. भारतीय सिनेमाच्या दुर्दैवान आमचे कडेन दोन क्लायमेक्स आसात. एक इंटरवालाक आनी दुसरो चित्रपटाचे अखेरेक. इंटरवाल मेरेन चित्रपटाक एके उचायेर व्हरचे खातीर ताची गरज आसता. चित्रपटाचे अखेरेक येवपी क्लायमेक्स निमाणे दृश्य आसता, जें प्रेक्षक आपल्या वांगडा घेवन वतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
