भांगरभूंय | प्रतिनिधी
भावंडांनो,
देवान आमकां जल्माक घालतना जायते अवयव दिल्यात. तांची वाड सारकी जावपा पासत आनी ते वरवीं आमची उदरगत जावपा खातीर आमी जायते व्यायाम कसरती करतात. करतात न्हय तुमी? शाब्बास! तातूंतल्यान आमची भलायकी बरी उरता. तेचपरी ह्या अवयवांचो फावो तसो वापर केल्यार आमचे जिविताचें वाटेर, पावला कणकणीं आमी यशस्वी थारता. आमकां येस मेळत रावता.
भावंडांनो, देवान आमकां उतर दिवन हेर जनावरां परस वेगळे केल्यात. अमचे जिबेर दिल्ल्या उतरांच्या आदाराचेर आमी मनीस जग जिखूंक पावल्यात. उतरांक अमचे जिणेंत खूब म्हत्व आसा.
देवान, उलोवपाक आमकां जीब दिल्या. पुणून ती कशाय कशीय उलोवपाक न्हय. खंयचेय गजालीचो चड वापर केलो जाल्यार ती आमकां माल पडटा हें तुमी जाणांतूच. भावंडांनो, उतरांचेय तशेंच. पुराय संवसार जिखपाची तांक तातूंत आसा. देखूनूच अमचेर कांय बंधना घालून घेवनूच तांचो वापर वेवस्थीत रितीन करपाची भोव गरज आसता.
भावंडांनो, जिबे वरवीं भायर सरिल्लें उतर हें धारेच्या शस्त्रां वरवीं आसता. तें केन्ना कोणाचो घात घेयत जाचो नेम नासता. कळूंक ना? आयकात शस्त्रांनी जशे मनशाचे कुडीचेर घाय जातात तेचपरी मनशान उलयल्ल्या उतरांनीय मनाचेर खोल परिणाम जाता. मनाचेर घाय जातात. शस्त्रांनी केल्ले घावे पेखतात, भरून येतात. पुणून उतरांनी जाल्ले मनाचे घाये बेगीन पेकनात. भरून येनात. ह्या घायांतल्यान मनशा मनशांमदीं दुस्मानकाय, तिडक, दुस्वास, निर्माण जातात. देखून आपणें सदांच उलयतना विचार करूनच उलोवंक जाय. आपलें उतर कोणाक वायट लागचें ना ताचो विचार मतींत करूनच उलोवंक जाय. कित्याक जाणां भावंडांनो, कारण एकदां उलयल्लें उतर तें कोणाकय लागतकच, आरे रे हांवें तशें उलोवपाचें न्हय अशें म्हणपाची पाळी येवंक फावना. त्या उतरांनी आपणाकच पिकसांव जावंक उपकारना.
भावंडांनो, उतरां जशीं काळजां तोडटात, तशींच तीं काळजां जोडटात. कांय मनशांचें उलोवणें गोड आसता. तांची उतरां परमळत फुलां जावन दुसऱ्यांक परमळ दितात.
नामनेचे साहित्यीक स. चंद्रकांत केणी म्हाका म्हणटाले, ‘उतर कागदार अशे तरेन बरोवचें की तें फासचें पडूंक जायना,’ ’म्हणल्यारूच भावंडांनो, उतर हें मनांत बरें शिजोवन, जिबेर हाडचें अशें आई आमकां सांगताली. अन्न बरें शिजोवन जशें ताटांत वाडटात तशेंच उतरांचें आसता.
म्होवाळ उलोवण्यान सगळे जीव खोशी जातात. देखूनूच म्हज्या भावंडांनो, तुमच्या उलोवपांत म्हळेपणां हाडूं नाकात. तुमचे जिबेर नियंत्रण दवरून गोड उलयात. अशें केल्यार तुमी बरे देखीचीं भुरगीं जावंक पावतलीं. फुडाराचे बरे नागरीक जातलीं. जातलीं न्हय तुमी? येयात तर आंगणांत.- उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
