येस

भांगरभूंय | प्रतिनिधी

एखादो मनीस जो तत्वां कडेन तडजोड करिना ताका खूबशे फावटी संद मेळना. तेन्ना अशा मनशाक येसस्वी म्हणप काय अपेशी म्हणप?

येस साल्यांकूच जाय. पूण येस म्हणल्यार नेमकें किदें? येसस्वी जावप म्हणल्यार किदें हाची व्याख्या एका वाक्यांत करूंक जायना. येस ही एक अखंड प्रक्रिया. जी जिवीतभर चालूच उरता, उरपाक जाय. येस हें एक रसायन.
मनशाच्या जिविताचे दोन भाग करूं येता, वैयक्तीक जिवीत आनी वेवसायीक जिवीत. जो ह्या दोनूय मळार संतुलन सादता आनी वैयक्तीक जिविताक आनी वेवसायीक जिविताक सारको न्याय दिता ताका येसस्वी म्हणप. कांय जाण वेवसाय वा कारकिर्दीचे नदरेन खूब येसस्वी जातात. पूण भितरल्यान खंगिल्ले वा निरशेल्ले आसतात. कांय जाण वैयक्तीक जिवितांत खूब सुखी आसतात, पूण तांचे समाजाक योगदान आसना.
येस ही फक्त गजाल न्हय. येस ही Lifelong Journey. मनीस जल्माक येत सावन, मरसर तो कसो जगतलो हो पुराय प्रवास ताचें येस-अपेस थारायता. येस म्हणल्यार एक पूर्ण जिवीत जगप, संतुलीत जिवीत जगप. ज्या जिवितांत कसलोच अतिरेक ना वा उणाव ना.
आमी जेन्ना मनशाचें येस मेजता, तेन्ना फक्त ताची उपलब्धी वा सिद्धी मेजप आसना. ताणें खंयच्यान सुरवात करून तो खंय पावलो ती पुराय प्रक्रिया पळोवपाची आसता.
एखादो मनीस जो तत्वां कडेन तडजोड करिना ताका खूबशे फावटी संद मेळना. तेन्ना अशा मनशाक येसस्वी म्हणप काय अपेशी म्हणप? तत्वां सांबाळून जो येसस्वी जाता तो खर्‍या अर्थान येसस्वी.
केन्ना केन्ना मनशाचें वैयक्तीक जिवीत सोंपें आसना वा ताका कांय गजाली मेळना, जशें संवसार मोडप वा लग्न जायना, भुरगीं आसनात. तेन्ना ही पोकळी कारकिर्दींतलें येस भरून काडटा. पूण मनशाचें वैयक्तीक जिवीत कितलेंय सुंदर आसूं, आपणें कांयच केलें ना हो खेद मनांत उरता. कारकिर्दींत येसस्वी जालो ना जाल्यार मनशा भितर एक पोकळी उरताच.
येस वेगळें आनी फाम वेगळी. कांय वेवसाया बराबर फाम येता. फामाद जावप म्हणल्यार येसस्वी जावप न्हय. येसस्वी लोक फामाद आसतातूय बी, नाय बी. आनी फामाद लोक येसस्वी आसताच अशें ना. कांय जाण वायट कामां खातीर फामाद जातात. ती फाम येस जायना. कांय सादारण लोक खूब अर्थपूर्ण जिवीत जगतात.
ही जाली सादारण मनशा खातीर येस- अपेसाची व्याख्या. धर्तरेर Once in a Life time अशीं व्यक्तीमत्वां जल्माक येतात. सादारण मनशाक जे अणभव मेळटात ते तांच्या वांट्याक येनात. पूण तांणी दिल्लें योगदान समाजाक, राज्याक आनी देशाक समृद्ध करता. तांच्या जिवितांत कांय वैयक्तीक अणभव ना म्हूण ते अयेसस्वी अशें म्हणपाक जावचें ना. हीं असादारण कर्तुबीं मनशां सादारण मनशां खातीर आशिल्ली येस- अपेसाची फास्की तोडटा आनी नवो आदर्श तयार करता. अशा व्यक्तीमत्वांक सादारण मनशाच्या येस- अपेसाच्या मापान मेजप योग्य न्हय. जशी जशी मनशाची उदरगत जाल्या, तशें तशें तांचे भावनीक संतुलन इबाडत चल्ला काय हें पळोवप म्हत्वाचें. जे येस सूख दिना, उरफाटें भावनीक संतुलन इबाडून उडयता तें खर्‍यांनीच येस? काय दिखव्या खातीर केल्ली तडजोड?
आयज एक ‘अचिव्हमेंट कल्चर’ तयार जालां. जो सामको विखारी. समाज माध्यमां खातीर ह्या उपलब्धी संस्कृतायेक उदक- सारें पडलां अशें म्हणचें पडटलें. देखून जायत्या जाणांक आपूण ‘अंडर अचिव्हर’ दिसता.
जें दोखोवंक, मिरोवंक मेळटा तेंच येस. देखून लोक बाह्य गजालींचेर लक्ष दितात. आनी विसरतात भितरल्या वाडिकूय तितलेंच म्हत्व आसा. ह्या ‘ऑवर अचिव्हमेंट’ संस्कृतायेन मानसीक आरोग्य इबाडटा. सैमांत सर्त आसना. देखून सर्त ही असैमीक. जी गजाल असैमीक ती मनशाक मानसीक आनी भावनीक त्रास दिताच. सर्त वायट. जें आपल्याक आवडटा तें प्रामाणीकपणान करतकच येस मेळटलेंच, आनी तेंच येस टिकता. मनशाक समाधान दिता आनी तृप्त करता.
तुमी तुमचें पुराय जिवीत कशे तरेन जगले हाका म्हत्व आसा. जिविताचो दरेक टप्पो म्हत्वाचो. जाण्टेंपण कशें गेलें हाकाय म्हत्व आसा. क्रिस्तोफर मोर्ले म्हणटात- “There is only one success – to be able to spend your life in your own way” आपल्याक जाय तशें आपलें जिवीत जगपाक मेळप हेंच येस खरें. कोणाकूच त्रास दिनासतना जो आपल्याक जाय तसो जगपाक शकता तो येसस्वी.

संपदा कुंकळ्ळकार
9850149319