भांगरभूंय | प्रतिनिधी
सरकारी खातीं, महामंडळांतले 8119 कर्मचारी जातले निवृत्त
पणजी : सरकारी खातीं, सरकारी महामंडळां आनी अनुदानीत संस्थेंतल्या वट्ट 8119 कर्मचार्यांची पिराय 55 परस चड आशिल्ल्यान ते येवपी 3 वर्सां मेरेन निवृत्त जातले. हाका लागून येवपी ३ वर्सांच्या काळां सरकारी खातीं, म्हामंडळां आनी अनुदानीत संस्थांनी मेळून 8119 नोकर्यो तयार जातल्यो. कर्मचारी निवृत्त जाता तसतश्यो ह्यो नोकर्यो तयार जातल्यो. हाका लागून सगल्यो नोकर्यो एकाच वेळार तयार जावचो नात. तरणाटे तशेंच उचेलें शिक्षण घेवपी विद्यार्थ्यां खातीर ही खोशयेची खबर आसा.
नियोजन आनी सांख्यिकी खात्यान सरकारी कर्मचार्यांचो जनगणना अहवाल तयार केला. ह्या अहवालांतल्यान ही गजाल स्पश्ट जाता.
भौशीक बांदकाम, वीज, शिक्षण, लेखा अशा 89 सरकारी खात्यानी मेळून वट्ट 43921 सरकारी कर्मचारी आसा. हाचे मदली 5160 कर्मचार्यांची पिराय 55 परस चड आसा. भलायकी खात्यांत 448, वीज खात्यांत 627, जीएमसीत 245, उदका पुरवण खात्यांत 139, रानां खात्यांत 143, गोरवां पोसपी खात्यांत 109 कर्मचारी 55 वर्सा परस चड पिरायेचे आसा. हे निवृत्त जाता तशी सरकारी खात्यांनी 5160 पदां तयार जातलीं.
कदंबा तशेंच हेर म्हामंडळांनी मेळून 3372 कर्मचारी आसात. हातुतले 520 कर्मचारी 55 परस चड पिरायेचे आसात. म्हामंडळांनी नोकरेचीं 520 पदां 3 वर्सांत तयार जातली. कदंबा म्हामंडळाचे 318 कर्मचारी 55 परस चड पिरायेचें आसा.
गोंय विद्यापीठ सारकिल्ल्या 14 स्वायत्त संस्थांनी 174 कर्मचारी 55 वर्सा परस चड पिरायेचे आसात. 14 स्वायत्त संस्थांनी सगळे मेळून 848 कर्मचारी आसात.
शाळा, विद्यालया सारख्या अनुदानीत संस्थांनी 2265 कर्मचार्यांची पिराय 55 परस चड आसा. हे कर्मचारी निवृत्त जाता तशी 2265 पदां तयार जातली. अनुदानीत संस्थांनी सगळे मेळून 15829 कर्मचारी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
