येवपी घटक राज्य दिसा मेरेन गोंय जातलें १०० टक्के साक्षर
भांगरभूंय | प्रतिनिधी
उल्लास मेळाव्यांत मुख्यमंत्र्यांची घोशणा
पणजी : गोंयांत साक्षरतेचें प्रमाण ९४ टक्के आसा. उरिल्ल्या ६ टक्के निरक्षरांक येवपी ३० मे मेरेन साक्षर करतले. येवपी घटक राज्य दिसाक गोंय १०० टक्के साक्षर जाल्ल्याची घोशणा करतले, अशें मुख्यमंत्री डॉ. प्रमोद सावंत हांणी म्हणलें.
प्रजासत्ताक दिसा पर्वरी आयोजीत उल्लास मेळाव्यांत ते उलयताले. नव भारत साक्षरता अभियाना खाला एससीईआरटी आनी शिक्षण संचालनालयान कार्यावळीचें आयोजन केल्लें. कार्यावळीक शिक्षण सचीव प्रसाद लोलयेंकार, शिक्षण संचालक शैलेश झिंगडे, एससीईआरटीच्या संचालक मेघना शेटगांवकार आनी हेर मानेस्त हजर आशिल्ले.
उदकाची पुरवण, वीज पुरवण आनी हेर जायत्या गजालींनी गोंय हेर राज्यां परस मुखार आसा. सगळ्यांक साक्षर करून १०० टक्के साक्षरता मेळोवपी पयलें राज्य, हो मान गोंयांकूच मेळटलो. प्रौढ साक्षरता अभियान हो उपक्रम देशांत कितल्याशाच वर्सां सावन सुरू आसा. प्रधनमंत्री नरेंद्र मोदी हांणी नवभारत साक्षरता अभियान सुरू करुन साक्षरतेचे मोहिमेक गती दिली. दरेकल्या बरोवपाक, वाचपाक येवंक जाय. हिशेबूय करपाक कळपाक जाय. ह्या अभियाना खाला निरक्षरांक साक्षर केले उपरांत तांची परिक्षा घेता आनी उपरांतूच तांकां साक्षर म्हणून घोशीत करतात,अशें मुख्यमंत्र्यानी म्हणलें.
ह्या वेळार शिकपी स्वयंसेवकांक आनी साक्षर जाल्ल्यांक प्रमाणपत्रां वाटलीं. ह्या वेळार मुख्यमंत्री डॉ. प्रमोद सावंत हांचे हस्तुकीं ‘इंटर डीसीप्लीनरी एरीया एनवायरमेंट एज्यूकेशन’ पुस्तिकेचें प्रकाशन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
