भांगरभूंय | प्रतिनिधी
आयज सेल्समन म्हूण राज्यभर हजारांनी गोंयकार चले, चलयो काम करतात. तांकां सरकारा वतीन ….
मोगान पिशें जालां खोशी, पाट्यार घालून फुलां राशी, वाटेक अशे लायले दोळे, यो रे यो….. आशालतान गायिल्लें हें उदयबाबाचें गीत. आयच्या अर्थंसंकल्पा उपरांत भोवतेक गोंयकार खोशयेन पिशे जाल्या आसतले आनी तातूंतल्यो तरतुदी केन्ना चालीक लागतल्यो, हाची दोळे लावन वाट पळयतात आसतले. वेंचणूक लागीं पावल्या म्हणटकच कोणाकूच तशे दुखयनासतना खोशी करपाचो यत्न अर्थसंकल्पांत जाला. विकसीत गोंयचें उद्दिश्ट दवरून सर्वसमावेशी अर्थसंकल्प सादर केला, कसलीच करवाड करूंक ना, अशें मुख्यमंत्री डाॅ. प्रमोद सावंत हांणी सांगलें. तर फुडल्या वर्सा जावपी वेंचणूक दोळ्यां मुखार दवरून केल्लो हो अर्थसंकल्प म्हणल्यार नवे बाटलेंत पोरणोच सोरो, अशी टिका विरोधी पक्ष फुडारी युरी आलेमांव हांणी केल्या. येवजण्यां खातीर दुडू खंयच्यान हाडटले, तेंय तांणी सांगचें अशेंय ते म्हणटात. बाकी प्रतिक्रिया सदचे भशेन. समर्थकांच्यो समर्थन करपी आनी विरोधकांच्यो टिका करपी.
बायलांच्या आप मजत गटांक म्हाल येरादारी खातीर गाडयो दितले. थळाव्या उत्पादनांक उर्बा दिवपाक विशेश येवजण तयार करतले. आदिवासी कल्याण खात्या खातीर 178 कोटींची तरतूद केल्या. शेती, पोरसूं वेवसायांत आदिवासी समाजूय आसा. ते आनी हेरां खातीर जमनी तिगोवन दवरूंक जाय. गोंयांत पिकता तें सगलें आप मजत गटांनी विकत घेतल्यार सगल्यांकूच बऱ्याक पडटलें. खाजगी आस्थापनां, उद्देगांनी गोंयकारांक नोकरी दिल्यार तीन वर्सां तांच्या पगाराचो कांय वांटो सरकार दितलें. ही येवजण हाचे आदींय जाहीर जाल्ली. गोंय हें पर्यटन राज्य आसलें तरी हांगा आसात तितलीं सोऱ्याचीं दुकानां पुरो. नवें दुकान, बार्र नाकाच. तें सुरू करपाक 20 लाख रुपया परवानो शुल्क दवरलां. ताचो परवानो बिगर गोंयकारांक हस्तांतरीत करपाक 25 लाख शुल्क भरचे पडटले. फक्त बार्र, सोरो दुकाना खातिरूच न्हय, तर बाजारांतल्या प्रत्येक स्टाॅल, गाळो, दुकाना खातीर हें शुल्क लागू करपाक जाय. कारण कांय पयशेकार 3- 4 दुकानां घेतात आनी मागीर तीं भायल्यांक भाड्यान दितात. 90 टक्के बाजार गोंयकारांच्या हातांतल्यान गेल्यात, ताचे फाटल्यान हें परवाने हस्तांतरण आसा, हें मान्य करचेंच पडटलें.
वारकऱ्यां खातीर मुख्यमंत्री वारकरी सहाय्य येवजण चालीक लायतले. ते खातीर 1 कोटींची तजवीज केल्या. अयोध्येंत श्रीराम निवासा खातीर 25 कोटींचो भुंयखंड घेतला. मुंबय आनी पंढरपूराकूय निवासाचें काम सुरू जातलें. अजमेर, वालंकिणीय निवास बांदूं येतात. भक्तीमार्गाचेर चलपी हजारांनी गोंयकारांक हें बऱ्याक पडटलें. ह्या निवासां प्रमाण, शिक्षण, भलायकी उपचार, खेळां- कला प्रशिक्षण आनी सर्तीं खातीर वचपी गोंयकार विद्यार्थी, खेळगड्यां खातीर पुणें, बंगळुरू, कोलकाता सारक्या म्हत्वाच्या शारांनी गोंय निवास उबारल्यार तांचो खूब फायदो जातलो. थोडें शुल्क दिवपाक कोणूच मनाय करचो ना. समाजीक सुरक्षा, गृह आदार अशा साबार येवजण्यांच्या मानधनांत वाड जातली. ते खातीर 479 कोटी रुपयांची तरतूद केल्या. आयज सेल्समन म्हूण राज्यभर हजारांनी गोंयकार गरीब चले, चलयो काम करतात. तांकां सरकारा वतीन दोन, अडेज हजार मानधन मेळचे म्हूण कितें तरी हालचाल सरकारी पांवड्यार जावंक जाय, कारण देशांतल्या सगल्यांत चड म्हारगाय आशिल्ल्या राज्यांत 10- 12 हजार रुपया पगाराचेर कांय जायना. कंत्राटाचेर सरकारी नोकरी करप्यांकूय कायम करपाक जाय. खाजेकार, फुलकार आनी हेर परंपरीक वेवसायिकां खातीर कांय वर्सां पयलीं अर्थीक येवजण जाहीर जाल्ली. तांकां आतां एक रकमी मजत करतले. ह्या वेवसायांत चडांत चड तरणाटे येवचे म्हूण यत्न जावंक जाय. अर्थसंकल्पांत जाहीर जाल्यात, त्यो सगल्यो येवजण्यो चालीक लागतल्यो, हाची वाट गोंयकार
पळयतात आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
