भांगरभूंय | प्रतिनिधी
बंगल्यांत नवी राणी येतली. हें आयकुन सगळी अजापांत पडलीं. राणी मोगाळ. ती भोव मायेस्त. आतां आमका जाय तशें रावंक मेळटलें. आनंदान रावया. झाडां सुकणीं सगलीं लागलीं कामाक. दोंगुल्लेचेर पाचवेचार रान जालें. वेलींनी सोबित फुलां फुलयलीं. फळांच्या घोंसांनी सोबिताय आयली. रानांतलो बंगलो काजुल्यांच्या लकलकान भरलो. काजुल्यांच्यो पिकपिक लायटी, चंद्रिमाचो बॅटरी झोत. सगले वन डे क्रिकेट मॅच खेळुंक जमले. डे एन्ड नायट. रोहित,पांड्या, बुमराह, अश्विनाचे सुवातेर घुघुम, बेबो, मुंगुस, हुंदीर, कोळहुंदीर, रान माजर, रानदुकर ….. घे मजा. रातीची तयारी चलिल्ली. हुंदरान भात, बेब्यान गायन, मुंगुस आनी रान माजर राखणदार. रान दुकरान राणयेच्या जेवणाची तयारी केली. मोरान आपल्या सुंदर कलेन सगल्याक खोशी करपाचें .राणी आनी क्रिकेट! म्हूण माकडान आपलें शाणपण केलें. दिसरात सगल्याक कामाच्या निमतान एक केलीं.
दोन दीस उरिल्ले. अंपायर कोणाक करया? बावलेन म्हळें
अंपायर?…म्हळें भुरग्यांनी.
“माकोडमाम” रायनान सांगलें.
हय , माकडाक अंपायर करुंया.
माकड सगळ्यांक जाय आशिल्लो. माकडाक वाऱ्यान रकाद दिलो. माकोड आयकून नाचुंक लागलो.
हांव अंपायर! व्वा! व्वा!
विजेची गरज नाशिल्ली. पुनवेचो चंद्रिम… सगल्याक लख्ख उजवाड. बंगल्या भितर नवो रंग. दारांत नवी फुल झाडां. आंब्या पणसांचो घमघम. अनसांचो सुवास. तातुंत वालीचेर धोलपी तवशीं, कुंवाळे, कणंगां…सगले खोशी. रान वाठार निवळ नितळ. राणयेक बसपाक सोबीत झोपाळो. वेलींचो फुलांनी भरिल्लो. एके सुवातेर सगळी फळावळ तेंकूनच आडसरां, उकडिल्लीं कणगां, तवशाच्यो निरपी, पिकिल्ले आंबे… ज्युस. सगले जमिल्ले तांकां आपले खातीर इतले सोबीत जेवण, चान्न्याची रात. झाडार शेपटी फुलोवन जागरण करपी चानी.
व्वा…व्वा!….हां…..हा…..हांसत खेळुंया, मजा घेवया.
खरें रान पूण सांगात….?! ती रावतालीं कशी…!?
एकवटान…रमेश मोट्यान आड्डलो.
एकमेका सांगातान… शायना हांसलें.
मजेन……. प्रणवान म्हळें.
राणयेन तांकां एकवटाचें बळ दिलें, समजीकाय दिली.
खरीच मजा येतली… शायना आड्डलें. सगले आमचे भशेन एकवटान रावतले…
हय, हय…….म्हळें बावलेन.
मेळुंया….अशींच.
नाचुंया, खेळुया, एकवटान रावुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
