भांगरभूंय | प्रतिनिधी
गोंय खंडपिठांत जनहीत याचिका दाखल
पणजी: गोंयांत येरादारी सिग्नलांचेर ल्हान भुरग्यांचें सोशण करून तांकां भीक मागपाक भाग पाडटात. तशेंच तांकां शिक्षण आनी हेर मुळावे अधिकार न्हयकारीत आशिल्ल्याचो दावो केला. तशेंच अशा भुरग्यांची सुटका करून तांची रावपाची, शिक्षणाची आनी हेर मुळावी वेवस्था करपाची मागणी करपी जनहीत याचिका मुंबय उच्च न्यायालयाच्या गोंय खंडपिठांत दाखल केल्या. ह्या प्रकरणांत उच्च न्यायालयान प्रतिवादींक नोटीस बजावन फुडली सुनावणी 18 फेब्रुवारीक दवरल्या.
ह्या प्रकरणांत वकील मोझेस पिंटो हांणी उच्च न्यायालयांत जनहीत याचिका दाखल केल्या. हातूंत राज्य सरकार, बायलां आनी भुरगीं उदरगत संचालनालय, गोंय राज्य बाल हक्क संरक्षण आयोग, शिक्षण संचालनालय, येरादारी संचालनालय हांकां प्रतिवादी केल्यात. तशेंच उत्तर आनी दक्षीण गोंय पुलीस अधिक्षकांक प्रतिवादी करपाक न्यायालयान मंजुरी दिल्या.
याचिकादाराक डिसेंबर 2024 त पणजी, मडगांव तशेंच म्हापशें वाठारांत येरादारी सिग्नलाचेर ल्हान भुरग्यांचें शोशण करून ताकां भीक मागपाक भाग पाडत आशिल्ल्याचें नदरेक आयलें. उपरांत तांणी 10 डिसेंबर 2024 दिसा हे विशीं पळोवणी केली. तशेंच हे विशींचे पुरावे एकठांय केले तेन्ना, नातलाच्या सुटयेच्या दिसांनी तातूंत वाड जाल्ल्याचें मुखार आयलें. हाचेर आळो घालपा खातीर गोंयांत कसलीच वेवस्था कार्यरत जायत नाशिल्ल्याचें मुखार आयले उपरांत याचिकादारान वयले मुद्दे उपस्थीत याचिकेंत मांडले. तशेंच गोंयांत कृती दळ स्थापन करून भुरग्यांक रावपाची सोय, शिक्षण दिवपाची तशेंच हेर मुळाव्यो गरजो दिवपाची मागणी केल्या.
हे विशींची न्यायालयांत सुनावणी जाली तेन्ना न्यायालयान प्रतिवादींक नोटीस बजावन फुडली सुनावणी 18 फेब्रुवारीक दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
