भांगरभूंय | प्रतिनिधी
पणजी ः गोंयांत वाडत वचपी अपघात आनी तांतूत जावपी मरणांचो आंकडो दिसांन दिस वाडत आसा. हो वाडटो आंकडो सध्या गंभीर विशय जाला. वेगवेगळ्या कारणांक लागून हें अपघात जातात. पूण हांतूतले जायते अपघात येरादारी नेमांक पाळो दिवंक नाशिल्ल्यान घडटात अशें पुलिसांच्या चवकशेंतल्यान स्पश्ट जालां. येरादारी पुलिसांनी राज्यांत अपघातांत येवपी मरणांची दखल घेवन एक विशेश मोहीम चालीक लायिल्ली. हातूंत येरादारी नेम मोडपी 1524 जाणांक नोटीस दिली.
फाटल्या दोन दिसांत जाल्ल्या अपघातांत दोगांक मरण आयलें जाल्यार तीग जाण जखमी जाल्यात. चड वेगान गाडी चलोवप, सोरो, ड्रग्ज घेवन गाडी चलोवप अशा कारणांक लागून अपघात जाल्यात. हें अपघात आडावपा खातीर येरादारी पुलिसांनी विशेश मोहिम सुरु केल्या. नेम मोडपी लोकांक दंड भरचो पडटलो अशी शिटकावणी गोंय येरादारी पुलिसांनी सोशल मिडिया प्लॅटफॉर्म ‘एक्स’ वरवीं दिल्या.
दंड आनी फुडली कारवाय टाळपा खातीर चालकांनी येरादारीचे सगले नेम पाळचे अशेंय तांणी सांगलें. सोमारा येरादारी नेम मोडपी 658 वाहन चालकांक चलन दिवपा वांगडाच एकाच दिसांत येरादारी नेम मोडपी 1524 जाणांक नोटीस जारी केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
